Lesona mai le Feagaiga Fou
O Iesu Keriso, o le Areto o le Ola
A o i ai Iesu Keriso i le lalolagi, na Ia faia vavega e tele e pei o le suia o le vai i le uaina, faamaloloina o ma’i ma e le atoatoa, e oo lava i le faatuina mai o Lasalo mai le oti. Atonu o le vavega na molimauina e tagata aupito toatele o le fafagaina lea o le toa 5,000 i areto e lima ma ia e lua. O lenei vavega o loo faamatalaina i Evagelia uma e fa (tagai Mataio 14:13–21; Mareko 6:34–44; Luka 9:12–17; Ioane 6:5–14). Sei o tatou iloiloina nisi o faamatalaga o lenei tala faavavega ma talanoaina pe aisea e taua ai i o tatou aso.
O Le Alofa Mutimutivale o le Faaola
Na faia e le Faaola lenei vavega ona o Lona alofa mutimutivale i tagata. Na tusia e Mareko e faapea a o silasila atu Iesu i le motu o tagata o faalogologo ma le naunautai i Ana afioga, “ona mutimutivale ai lea o lona alofa ia te i latou, aua ua faapei o mamoe i latou e leai so latou leoleo” (Mareko 6:34). Na silafia e Ia ua “levaleva le aso” ma, o le i ai i se “mea tuufua” (Mareko 6:35), na le mafai ona maua e tagata ni meaai.
Ae peitai na taofia e Iesu Lona mana i le faia o se vavega mo sina taimi, ma finagalo ina ia tofotofoina muamua ona soo. Na Ia fetalai ia Filipo, “O i fea tatou te faatauina mai ai ni areto, ina ia aai ai i latou nei?” (Ioane 6:5). Aisea na Ia fetalai atu ai ia Filipo i lenei fesili a “ua silafia lava e ia le mea o le a na faia” (Ioane 6:6)? Masalo na Ia finagalo i Ona soo ina ia atoatoa ona latou malamalama e le mafai ona latou fafagaina ia tagata e toatele i le tupe ma le taimi ua tuuina atu ia i latou. Afai na tatau ona fafagaina le motu o tagata, o le a manaomia ai se vavega.
Ona aumai lea e le au soo o le meaai na i ai i se tamaitiiti, na pau lava lea o le meaai na maua e i latou: e lima areto ma i’a laiti e lua. Ou te fia faapea ifo atonu na fiaai lenei tamaitiiti ae na teuina le meaai mo lona Faiaoga maoae nai lo le popole ia te ia lava. Atonu na fesoasoani lenei tulaga i le saunia o le faatulagaga taua o le vavega.
“Ma Sa Latou Nonofo i Vasega”
Na toe faatinoina ma le faamoemoeina e Iesu Keriso le isi foi gaoioiga a o lei faia le vavega: Na Ia poloaiina Ona soo “ia latou fai atu i tagata uma ia [nonofo] i latou i vasega i le mutia. Ona [nonofo] ai lea o i latou i vasega, e taitoaselau, ma taitoalimagafulu” (Mareko 6:39–40). Aisea na Ia fetalai ai ina ia nonofo faapea tagata? E moni lava na Ia finagalo ina ia mautinoa lelei na lelei le tufatufaina o meaai. Ua faaopoopo mai Elder Bruce R. McConkie (1915–85) o le Korama a Aposetolo e Toasefululua i lo tatou malamalamaaga: “Na leai lava se mea le aloaia pe le faatulagaina e uiga i le fuafuaga po o le faatinoga a lo tatou Alii. Na nonofo le motu o tagata na potopoto i se auala faatulagaina lelei i vaega ma vasega. Na te lei faasalalau atu ana faamanuiaga e tele i se tulaga faamaumau i ni tagata salalau solo le faatulagaina lelei. Ae na Ia saunia meaai na matua manaomia ae na semanu e le maua mo se faapotopotoga o le au faalogologo fia malamalama. I lena foi taimi, na lei toe i ai se fesili i le mafaufau o se isi e uiga i le mea moni na tupu. O le tiute o aposetolo o le tufatufa atu o areto ma i’a i se auala faatulagaina lelei, ma taulimaina ai tagata uma i se auala tutusa ma le le faapito.”1
I le faaopoopo atu i ai, ou te talitonu e faapea—e pei o Filipo—na finagalo le Alii ia iloa e tagata le tulaga o le toatele o le motu o tagata i le taimi na faatinoina ai le vavega. Atonu na Ia finagalo ina ia faamautinoa o le a leai ni fefinauaiga e uiga i le fuainumera o tagata o e na auai i lenei vavega maoae.
O le fuainumera tonu lava o tagata i le faapotopotoga na sili atu i le 5,000 aua e lei faitauina ai fafine ma tamaiti. O lea la, e matua toatele atu nai lo le 5,000 tagata o e na fafagaina faavavega i areto e lima ma i’a e lua.
Ina ua tauaaoina e le Faaola areto e lima ma i’a, ona “ia tepa ae lea i le lagi, ua faafetai, ona tofitofi lea i areto” (Mareko 6:41) ona ia tuuina atu ai lea i Ona soo e tufatufa atu i tagata. Ona latou tufatufa atu lea o i’a. E lei aveina e tagata na o ni nai fasi meaai, ma le popole ina nei le lava. Ae peitai, na latou aveina “faitalia i latou” (Ioane 6:11) ona “aai uma lea o i latou, ua maoona” (Mareko 6:42).
Na faaauau ona aoao atu Iesu ina ua maea ona faatinoina le vavega. Na Ia fetalai atu i Ona soo, “Ia faapotopoto toe’aiga, nei ai ni mea e maumau” (Ioane 6:12). Ona faapotopoto lea e le au soo o ato meaai e 12!
Na manino lava e ala i Lona mana na faatinoina ai e Iesu le vavega. O le tala i le tusi a Ioane e faaiu i le manatu lenei: “Ua iloa e nei tagata le faailoga na faia e Iesu, ona faapea lea o i latou, E moni, o lea lava perofeta lenei, o le maliu mai i le lalolagi” (Ioane 6:14).
Meaai Faaleagaga
E le muta ai iina le tala. O nei mea uma lava na tutupu ua na o se teuteuala i aoaoga mulimuli ane a le Faaola. Na ia faatinoina lenei vavega i se tulaga uiga ese ina ia malamalama manino ai tagata o loo ia te Ia le mana maoae, ma na saunia lelei ai i latou e talia Ana aoaoga—lea na matua sili atu le taua nai lo le faaaogaina o areto ma i’a.
I se taimi puupuu ina ua maea le faatinoina o lenei vavega, na aoao atu ai Iesu i tagata ia aua nei tulimatai atu i meaai faaletino ae ia saili mo le areto e silisili atu le taua: “Aua tou te galulue i mea e ai e pala, a o mea e ai e tumau i le ola e faavavau, e foaiina atu ia te outou e le Atalii o le tagata” (Ioane 6:27).
Sa le mautonu tagata e uiga i Lana fetalaiga. Sa i ai pea o latou mafaufau i areto na latou aai ai. Sa le mafai ona latou malamalama i le uiga o le upu “areto o le ola.”
Na fetalai Iesu, “O a’u nei le areto o le ola: o le sau ia te au e le laina lava ia; o le faatuatua foi ia te au e le toe fia inu lava ia” (Ioane 6:35).
Na faaauau ona ia fetalai: “O a’u o le areto o le ola… . O lenei le areto ua alu ifo mai le lagi, ai se ai ai ona le oti lea o ia. O a’u le areto ola na alu ifo mai le lagi: pe a ai se tasi i lenei areto ona ola ai lea o ia e faavavau” (Ioane 6:48, 50–51).
Sa muimui nisi tagata ona o Lana fetalaiga. Na latou manatu na latou iloa Iesu, le atalii o Iosefa le kamuta. Na galo ia i latou le mana na faia ai e Iesu se vavega maoae faapena. E toatele e na filifili e tuua o Ia. Na fetalai atu Iesu i Ona Aposetolo e Toasefululua, “Pe tou te fia o ese foi?” (Ioane 6:67). Ona tali atu lea o Peteru i se molimau na matua mamana i lona faigofie: “Le Alii e, a matou o ea ia te ai? o ia te oe upu o le ola e faavavau” (Ioane 6:68).
E ui lava na saunia lelei e le Faaola tagata mo le aoaoina i ai o Lona natura ma Lana misiona paia, ae na latou le malamalama lava i le taua o le vavega po o le taua o aoaoga a Iesu o Ia o le Areto o le Ola. Ae o le Toasefululua, na taitaia e Peteru, na tautino atu ia te Ia a latou molimau. Atonu o lenei mea na maua ai e le Alii se faamafanafanaga tele.
O Le Taua i o Tatou Aso
I le aso, atonu e manatu nisi o le vavega o areto ma i’a ua na o se tala anamua ma e le taua i o tatou aso. I le faia o lea tulaga, latou te le iloa ai le aano o lenei tala faavavega ma le malamalama ai i le taua o le “areto o le ola.”
Na faapea mai Elder Jeffrey R. Holland o le Korama a Aposetolo e Toasefululua, “I o tatou faamanuiaga ma tulaga maoae faaonaponei atonu tatou te savavali ese ai foi mai le areto o le ola matua maoae lona taua, atonu o le a tatou filifili ia le fafagaina i tatou faaleagaga, ma malilie e faaloloto i se ituaiga o galala ma le fia aai faaleagaga.”2
Ua faamalamalama mai i le Lomifefiloi o le Tusi Paia o vavega o se “elemene taua i le galuega a Iesu Keriso, e le gata o galuega paia, ae o loo faatuina foi se vaega o aoaoga faaleatua” (732; tagai foi i le Guide to the Scriptures, “Miracle,” 165). O le vavega o le areto ma i’a o se faataitaiga lelei o lenei faamalamalamaga. Na fafagaina e Iesu tagata e sili atu i le 5,000 i le na o le 5 areto ma i’a e lua—o se gaoioiga faaleatua. Na Ia folafola atu o Ia lava o le “areto o le ola”—o se aoaoga faaleatua.
I le iloa ai o Iesu Keriso o le Areto o le Ola—le ala e mafai ai e tagata uma ona maua le ola e faavavau—ua ia i tatou se tiutetauave taua. E tatau ona tatou saili e fesoasoani i tagata e o mai ia te Ia ma taumamafa i Lana afioga, e pei o tagata o e na maoona i areto ma i’a. Atonu e le iloa e a tatou uo o loo fiaaai i latou i le agaga. Atonu e taumafai i latou e faaaoga le tele o mea ina ia faamalieina ai lo latou fiaaai faaleagaga, ma o se taunuuga, atonu o le a latou le fiafia ma leiloloa. Ia tatou fesoasoani ia i latou ia iloa pe faapefea ona latou maoona faaleagaga—e ala i le o mai ia Iesu Keriso, le Areto o le Ola.