O Mai e Faalogo i le Siufofoga o se Perofeta
Ia Faateleina le Faamagalo Atu
Na ou otiina mai se tala na tusia e Jay Evensen mai le Deseret Morning News. O lana faatagaga, ou te sii mai ai:
“Mata o le a sou lagona i se talavou ua filifili na te togiina se pīpī aisā e 20 pauna [9-kg] mai se taavale saosaoa, i luma tonu o le tioata o le taavale o loo e aveina? Mata o le a sou lagona ina ua maea le ono itula sa e onosaia ai lou taotoga sa faaaoga ai uamea ma isi meafaigaluega e tau fonofono ai ou foliga? …
“… O le tagata na aafia fua o Victoria Ruvolo, … sa sili atu ona naunau i le faasaoina o le ola o le na faamanualiaina o ia, e 19 tausaga le matua, o Ryan Cushing, nai lo … e taui ma sui… . Sa faatauanau atu o ia e faia se talosaga mo ia. E mafai ona faafalepuipui Cushing mo le ono masina i le falepuipui faaitumalo, ma faanofo vaavaaia ai mo le lima tausaga pe afai e faamaonia lona faaoolima e le’i faamoemoeina.
“Pe a na faapea e tausalaina i le faaoolima faamoemoeina—o le faasalaga e pito i fetaui ma le solitulafono —semanu o le 25 tausaga i le falepuipui… .
“E tusa ai ma se faamatalaga a le New York Post, sa savali atu … Cushing … i le mea sa nofo ai Ruvolo i le potu faamasino ma musumusu atu ma le maligi o loimata se faatoesega. ‘Ou te faatoese atu ona o le mea sa ou faia ia te oe.’
“Ona tulai lea o Ruvolo, o le na aafia fua ma feopoa’i ma le na faaoolima ia te ia, ma fetagisi. Sa milimili e [Ruvolo] le ulu o [Cushing] ma popo lona tua a o tagi masusu, ma sa lagona atu e molimau … o faapea atu o ia, ‘E le afaina. E na ona ou manao lava ia sili atu ona lelei lou olaga.’”1
O ai e mafai ona lagona se isi mea vagana ai le faamemelo i lenei tamaitai? I se isi itu o le loto faamagalo, faatasi ma le alofa ma le faapalepale, e tula’i mai ai vavega e le mafai ona tupu i se isi lava auala.
O le Togiola sili o le faatinoga maoae lea o le faamagaloga. Sa matua tele naua le puapuaga, sa ogaoga le mafatiaga, ma e leai se tasi o i tatou e mafai ona malamalama i ai ina ua ofoina atu e le Faaola Ia lava e fai ma togiola mo agasala a tagata uma lava. Na pau le mea ou te iloa na tupu, ma sa faia mo au ma oe. O Ia lea tatou te maua ai le faamagaloga. O Ia lea o le a tuuina mai ai i tagata uma le toetu mai le oti. O Ia ma Lana taulaga taua tele ua tatou maua ai le avanoa e ala i le usiusitai, o le ola e faavavau.
Ia fesoasoani mai le Atua ina ia tatou agalelei atili atu, ia atili maua le loto faamagalo, ia faagalo mea e le o fiafia ai ma ia le toe fafagaina lava.
Mai se lauga o le konafesi aoao ia Oketopa 2005.
Mea e mafaufau i ai
-
O le a sou manatu na faapefea ona aafia Ryan Cushing i le faamagaloga a Victoria Ruvolo? Aisea?
-
Ua faamanatu mai e Peresitene Hinckley ia i tatou o Iesu Keriso na puapuagatia mo a tatou agasala. O Ia tatou te maua ai le faamagaloga pe a tatou salamo. E faapefea ona tatou fesoasoani e faamagalo atu i isi, e ala i le iloaina o lenei mea?
-
O le uiga ea o le faamagalo atu o se tasi, o le tatou tuu pea lea o i latou e faatiga mai ia i tatou?