Uo e Fetusia’i ma Tagata e Faailoa Mai
Na tuu mai e la’u soa ia te a’u se teutusi ma faapea mai, “Sister Jones, ou te manatu o le tusi lea mo oe.” Na ou tilotilo i le tuatusi ma ou fiafia ai i le vaaia o le igoa o lo’u tausoga o lolomi lelei ai i le tulimanu. Na faatoa ou siitia lava i se aai fou mai le isi itu o Farani i saute ma ou te le’i manatu na iloa e se isi o lo’u aiga i le Iunaite Setete lo’u tuatusi fou. Na ou tatalaina le teutusi ma faitau se faamatalaga puupuu lea na faapea mai ai lo’u tausoga na faatoa ia maua lava se imeli mai lana uo e fetusia’i tusitusi mai Farani ina ua mavae le valu tausaga e le’i toe fesootai.
Na faamalamalama mai e lo’u tausoga e ui lava na maua e i laua ma Céline o la tuatusi i a la vasega faaFarani ma le faaPeretania i le aoga maualuga, ae e lei matua tusitusi lava le tasi i le isi. Na matua faateia lo’u tausoga i le maua atu o se imeli mai ia Céline. Na te le’i iloaina pe nofo Céline i Farani i saute i le mea na ou auauna atu ai, ae na ia tuuina i ai lona igoa ma lona tuatusi, ma talosaga mai ia te a’u e faafesootai o ia pe a mafai.
Talu ai sa ou fou i le eria, o lea na ou tuuina atu ai le pepa i la’u soa ma fesili i ai pe nofo le uo fetusia’i a lo’u tausoga i le eria. “E le gata ina nofo o ia i totonu o tuaoi o le misiona,” o lana tali lea, “ae nofo foi o ia i lo tatou itu!” I le fiafia tele, na ma telefoni loa ia Céline e faailoa atu i maua, ma na malie o ia matou te feiloai. Na ma faia loa se malaga puupuu i le nofoaafi i Montauban.
A o ma tulioso ese mai le nofoaafi, na faafeiloai fiafia i maua e Céline ma ona matua. Na latou valaaulia i maua i lo latou fale ma talosaga mai e faasoa atu le ma savali. A o ma aoaoina i latou e uiga i le Tusi a Mamona ma le Perofeta o Iosefa Samita, na molimau atu le Agaga i le moni o le talalelei toefuataiina. Na faaalia e le aiga lo latou talisapaia o aoaoga taua o loo aoaoina e le Ekalesia, ma ina ua maea se talanoaga umi lava na ma tuua ia i latou se kopi o le Tusi a Mamona, o se tatalo, ma se tautinoga ma te toe foi atu.
O le amataga lena o nisi feiloaiga faatasi ma Céline ma lona aiga. Na faaiuina la’u misiona a o faagasolo pea a latou aoaoga e uiga i le Ekalesia, ae ou te lei faatofa atu ia Céline, na ou fesili ia te ia pe aisea na ia filifili ai e faafesootai atu lo’u tausoga i le tuanai ai o le valu tausaga. O lana tali na faateia ai a’u: “A o teu la’u pusatoso, na ou tau ai i lona tuatusi i se fasi pepa itiiti na ou faapea ua leiloa. Na ia te a’u se lagona malosi lava e tatau ona ou tusi atu ia te ia.”
I le auala e agai atu i le ma fale mautotogi na ou vaai atu i fafo mai le faamalama o le nofoaafi ma maofa ai i le alofa o se Tama ma le avanoa e maua ai se tuatusi na leiloa ma se fesootaiga ua leva ina ia toe faia i le taimi lava na ou siitia faafuasei ai i se aai fou mo vaiaso faaiu e ono o la’u misiona. Na te silafia tagata uma ma o le a ia faia vavega, e oo lava i se mea itiiti ma le faatauvaa e pei o se tuatusi o se uo e fetusia’i.