Ua Faailogaina e le Ekalesia le Faamanatuina o le 200 Tausaga o le Soifua Mai o Uilifoti Uitilafi
O le aso 1 o Mati, 2007, ua faailoga ai le faamanatuina o le 200 tausaga o le soifua mai o Uilifoti Uitilafi, le Peresitene lona fa O Le Ekalesia a Iesu Keriso o le Au Paia o Aso e Gata Ai.
O Uilifoti Uitilafi sa avea o se tagata vili falaoamata, sa soifua mai i le aso 1 o Mati, 1807, ma na tuputupu ae i Farmington, Connecticut. Sa auai o ia i le Ekalesia i le 1833 ma sa faataunuuina ni [ana] misiona se lua ao lei faauuina o se Aposetolo i le 1839.
I le avea ai ma se tasi o le Korama a Aposetolo e Toasefululua, sa ia faamaeaina ai nisi misiona faaopoopo se fa; pulefaamalumalu i le malumalu o St. George, Iuta; ma sa tautua mo le ono tausaga o se Tusi Talafaasolopito o le Ekalesia.
Sa lagolagoina o ia e avea ma Peresitene o le Ekalesia i le aso 7 o Aperila, 1889. Sa ia faapaiaina le Malumalu i Manti Iuta ma le malumalu ua leva ona tatali o le Malumalu o Sate Leki, ma vaaia foi le faalapotopotoga o le Sosaiete o Mea Tau Gafa i Utah, ma toe faamamafaina le taua o le tausia o tusi o talafaasolopito.
O Peresitene Uitilafi o se paionia faatuatua, sa auai i le Tolauapiga a Siona faatasi ma le Perofeta o Iosefa Samita. I le 40 o ona tausaga sa taunuu ai o ia i le Vanu o Sate Leki i le aso 24 o Iuni, 1847, ma sa i ai o ia faatasi ma Polika Iaga ina ua ia folafola atu, “O le nofoaga tonu lenei.”
O le viiga “E Galue le Alii i se Auala Ofoofogia” (Liahona, Ian. 2006, 24) o le viiga lea sa sili ona fiafia i ai Peresitene Uitilafi. “ ‘E ese le fiafia o ia i [lena viiga],’ na saunoa mai ai Peresitene Heber J. Grant [1856-1945], o le sa auauna o se Aposetolo ao avea Uilifoti Uitilafi ma Peresitene o le Ekalesia. ‘Sa matou usuina, ou te mautinoa, i nisi taimi e faalua i le masina i a matou fonotaga faalevaiaso i le Malumalu, ma e seasea lava ona te’a atu se masina ae lei talosagaina e Uso Uitilafi lena pese ina ia usuina. Sa ia talitonu i lenei galuega ma lona loto ma lona agaga atoa, ma galue ai ma le mana atoa lea sa tuuina atu i ai e le Atua mo lona faaalualuina i luma’ ” (Aoaoga a Peresitene o le Ekalesia: Uilifoti Uitilafi [2004], xvi).
E manatuaina pea Peresitene Uitilafi ona o le avea ma se tagata e fiafia e tausia api o talaaga. Sa ia tausia se api talaaga o lona olaga o se tagata matua, “o lana faamaumauga faaiu o Aokuso 31, 1898, toe lua aso ae maliu” (Aoaoga a Peresitene o le Ekalesia, 129).
I se tasi fonotaga, sa ia aoao mai ai se mataupu faavae e mafai ona faatatauina i api o talaaga faapea foi ma faamaumauga aloaia a le Ekalesia: “A o savavali ai i se vaitafe, e le mafai lava ona tatou laa faalua i le vai e tasi. E le mafai foi ona tatou faaalu faalua se taimi e tasi. A tatou te’a atu i fafo ma lena faitotoa, o taualumaga o lena fonotaga o le a tapunia mo i tatou e faavavau. O le a le toe i ai lava lenei afiafi tatou te faaaluina lona taimi. Pe le tatau ea la ona tatou tausia se faamaumauga o a tatou galuega, aoaoga, ma fautuaga o loo tatou tuuina atu i lenei fonotaga? E tatau ia i tatou” (Aoaoga a Peresitene o le Ekalesia, 131).
Sa ia uunaia fanau ina ia amata ona tausia ni api o talaaga i le amataga o o latou olaga: “Afai o le a amataina e au uo laiti ona faia lenei [mea] ma faaauauina, o le a avea ma mea sili mamao atu lona taua ia i latou i le lumanai nai lo le auro,” sa ia saunoa ai (Aoaoga a Peresitene o le Ekalesia, 136–37).
I le maea ai o le tele o le mafaufau loloto ma le tatalo, sa maua ai e Peresitene Uitilafi se faaaliga e tatau i le Au Paia o Aso e Gata Ai ona faamutaina le faia o faaipoipoga e tele. I le 1890 sa ia tusia ai le Tautinoga Tonu, e tautino atu ai ua faamutaina e le Ekalesia le faia o faaipoipoga e tele. E faaopoopo atu i le avea ai ma fofoga o le Alii mo lena faaaliga, sa faapea foi ona tuua ai e Peresitene Uitilafi se talatuu e faamamafaina ai le galuega faafaifeautalai ma galuega faalemalumalu sa.
Na maliu Peresitene Uitilafi i San Francisco, Kalefonia, ISA, i le aso 2 o Setema, 1898, i le 91 o ona tausaga.
I le 2006 na aoao ai tagata uma o le Ekalesia i le lalolagi atoa i le molimau a lenei perofeta mai le tusi lesona Aoaoga a Peresitene o le Ekalesia: Uilifoti Uitilafi. O loo i totonu o le tusi lesona le tele o tala mai le soifuaga ma le galuega a Peresitene Uitilafi.
Ao saili ai mo le upumoni, sa lagona e Peresitene Uitilafi le tatau ona vaai i se perofeta o aso nei: “Ina ua amata ona ou matua sa ou tatalo i le ao ma le po ina ia ou ola ou te vaai i se perofeta. Semanu ou te alu lava i se afe maila tau ina ia ou vaai i se perofeta, po o se tagata sa ono mafai ona aoaoina mai a’u i mea na ou faitau ai i le Tusi Paia. Sa le mafai ona ou auai i se ekalesia, talu ai sa le mafai ona ou mauaina se ekalesia sa lagolagoina nei aoaoga faavae i lena taimi” (Aoaoga a Peresitene o le Ekalesia, xxi).
Sa aoao atu e Peresitene Uitilafi le taua o faaaliga i aso nei: “E le mafai ona ola le Ekalesia a le Atua i se luasefulufa itula e aunoa ma ni faaaliga” (Aoaoga a Peresitene o le Ekalesia, 49).
Sa ia faamamafaina foi faaaliga mo le tagata lava ia e ala i le Agaga: “O le a e mauaina galuega a agelu; o le a e vaai i le tele o vavega; … ae ou te tautino atu o le meaalofa o le Agaga Paia o le meaalofa silisili e mafai ona faaeeina i luga o tagata” (Aoaoga a Peresitene o le Ekalesia, 50).
Sa masani ona apoapoai Peresitene Uitilafi i ona uso o le Au Paia ina ia tofotofo i faamanuiaga o loo maua i le malumalu. Sa ia saunoa, “Ou te manatu o le fausiaina o malumalu o se tasi lea o mea sili ona taua e manaomia e le Alii mai le Au Paia o Aso e Gata Ai i le augatupulaga o le atoatoaga o taimi, ina ia tatou o atu ai i na malumalu ia le gata i le faaolaina o e o ola mai a o le faaolaina foi o o tatou tagata o e ua oti” (Aoaoga a Peresitene o le Ekalesia, xxxi). O lona filiga, sa ia faia ai se faataitaiga o galuega faalemalumalu, e faamautinoaina ai le faia o le galuega mo le afe ma afe o ona tuaa ua mavae.
E pei foi o isi perofeta o ona aso, sa folafola mai e Peresitene Uitilafi o le a oo mai le taimi o le a i ai malumalu i le lalolagi atoa.