Gaoioiga Faatamaoaigaina o Aiga, Auaiga, ma le Tagata Lava Ia

O gaoioiga e faatamaoaigaina ai le aiga, auaiga, ma le tagata lava ia e le matua maoti lona fuafuaina nai lo lotu faalekuata. E mafai ona faatulagaina e tagata e i ai tomai faapitoa, i lalo o le taitaiga a le au peresitene. O le taimi muamua, o le manatu e uiga i gaoioiga na foliga faigata i nisi o taitai. Ae ina ua latou iloiloina tulaga manaomia o uso, talanoa ai ma taitai perisitua, ma tatalo mo musumusuga, ua latou maua ai ni manatu lelei ma atiina ae lagona mautinoa. O nisi o manatu faamanuiaina e aofia ai le aoaoina o lipea e fai e oe lava ia i le fale, vasega e faatamaoaigaina ai faaipoipoga [ulugalii], vaega suesue e faaaoga ai le Talai La’u Talalelei, aumaia o taumafataga i uso nofofale, ma se vaega lagolago mo uso e i ai faafitauli i le mauaina o fanau.

“Sa ou mafaufau pe faapefea ona aumaia faatasi uso e lenei polokalama fou pe a latou faatasitasi i vaega toalaiti, ae na ou naunau lava e taumafai,” na tusia ai e Richelle Pearce o le Uarota a Shadowbrook, Siteki o Kaysville Iuta Saute. “E tai faalua i le vaiaso ona ou faia falaoa, ma i le maea ai o le faia o feutagaiga tatau, na valaaulia loa e taitai o le Aualofa soo se tasi o le na fia sau i lo’u fale mo se gaoioiga.

“I le aso Tofi na sosoo ai e toalima uso na tutu mai i lou faitotoa. E eseese uma tulaga o le olaga e o mai ai: e toatasi le tina fou, tasi le tina faigaluega, tasi le uso matua, ma le toalua e i ai aiga o ni aiga toatele e pei o a’u. O le mea na tupu i le isi lua itula na sosoo ai o se molimau ia te au e uiga i lenei polokalama musuia. E le gata ina aoaoina e uso le viliina o le sana ma fai falaoa, ae na latou talatalanoa, talie, fetufaai manatu, ma matuai fesootai. E oo ane i le taimi na latou malaga ese ai ma a latou falaoa ma falaoamata enaena, na ou iloa o lenei polokalama e mafai ona auamaia faatasi ai uso i se auala matagofie.”

I Nigeria, o le aoaoina o le faiga o le falaoa e tele atu mea na faia ai nai lo le aoaoina o se tomai taua. Fai mai se uso i le Paranesi a Ikot Ekpene, i le Misiona o Nigeria Uyo, o gaoioiga faatamaoaigaina ua suia ai lona olaga. Na ia faamatala mai ina ua maea lona papatisoga ma le faamauga na le toe alu o ia i le lotu. Ona valaaulia lea o ia e se uso o le Aualofa i se gaoioiga faatamaoaigaina lea na latou aoaoina ai le faiga o le fasimoli, o se oloa e faigata ona maua i le nuu mamao lea na nofo ai o ia. I se isi gaoioiga na ia aoaoina ai le taoina o le falaoa sili ona lelei, lea na le maua latalata i lona aiga. Ua faaauauina lona naunautai a o faatasitasi soo uso e fai falaoa mo o latou aiga ma mo le faamanatuga i Aso Sa.

I Mexico, na aoaoina ai e uso e fiafia [i le otiina o lauulu] nisi o auala e faafuga ai lauao. Mo le toatele, o le aoaoina o lenei tomai e faasaoina ai tupe na fesoasoani i o latou aiga i tulaga tautupe.

I se tasi uarota o tagata nofofua, na talosaga ai e taitai o le Aualofa le korama a le au toeaina e aoao le Aualofa i auala e sui ai pa’u o taavale ma siaki suauu o a latou taavale. O lenei mea e le gata ina fesoasoani e faatupuina ai i uso le faalagolago o le tagata ia te ia lava, ae na maua ai foi le avanoa mo nei uso talavou nofofua e fegalegaleai ai le tasi ma le isi.

O faapefea la, ona taliaina e uso o le Aualofa nei taiala fou mo le faatamaoaigaina o aiga, auaiga, ma le tagata lava ia? O loo talisapaia [taiala fou] i le tele o eria ma le faatuatua, naunautai, ma le limalima. A o faagasolo pea le taimi, o le a faaauau pea ona tupu lenei polokalama musuia ma manuia ai olaga o uso o le Aualofa o vaitausaga uma e sili atu le toatele i le lalolagi atoa.