Ua Toe Faapaiaina e Peresitene Monson le Malumalu o Boise
I le masina o Novema 2012, na toefaapaiaina ai e Peresitene Thomas S. Monson le Malumalu o Boise Idaho—o se maota na uluai faapaiaina i le 1984 ma sa tapunia mo le 15 masina mo se faafouga tele.
I le afiafi a o lumanai le toefaapaiaga, sa potopoto ai se vaega e 9,200 o tupulaga talavou mo faafiafiaga faaleaganuu a le autalavou. Sa matua toatele naua le autalavou sa auai ma sa latou faatumulia le Malae o Taco Bell i le lotoa o le Iunivesite o le Setete o Boise, ma sa faapotopoto o latou aiga ma isi i ni nofoaga taumamao e matamata mai ai i le polokalama lea sa faasalalau i nofoaga autu o siteki i le itulagi atoa e tautuaina e le malumalu.
E lei tele ni siva i le polokalama ae sa tele lava i le saunia mo le malumalu, o le tala lea a Gary Walker, o le taitaifono o le soakomiti o le faafiafiaga faaleaganuu.
I le faafiafiaga, sa saunoa atu ai Peresitene Monson i le autalavou o le malumalu e “susulu e pei o se faailoilo o le amiotonu i tagata uma o le a mulimuli i lona malamalama. … Tatou te faapelepele i lena malamalama, ma e tatou te faafetai i lo tatou Tama Faalelagi mo faamanuiaga ua aumaia e lenei malumalu ma malumalu uma i o tatou olaga.”
Na auai foi Elder Bednar i sauniga o le faapaiaga i le Aso Sa, lea na ia aoao mai ai, “E i ai se mafanafana, sulu, malamalama, ma le susulu e sau mai se malumalu i soo se mea i le lalolagi.”
E tautuaina e le Malumalu o Boise Idaho pe tusa ma le 100,000 Au Paia o Aso e Gata Ai mai siteki e 31 i le eria.
Na faaalia e Peresitene Thomas S. Monson lona alofa ma le talisapaia o tagata o le Ekalesia i le taimi o le faafiafiaga faaleaganuu i le po a o loma lona toefaapaiaina o le Malumalu o Boise Idaho.
© Puletaofia e le IRI