E Aumai e le Sefuluai le Filemu

Ricardo Reyes Villalta, El Salvador

Sa ou faatuatua i le Alii ma Ana poloaiga i taimi uma lava. Ina ua faateleina le leaga o le tamaoaiga, peitai ane, na lē toe maua o’u itula ova ma pa’ū lo’u totogi. Na ou le toe totogiina le sefuluai ma ou faapea ifo ia te au o le a malamalama le Alii. Ae ui lea, na faateleina a’u aitalafu ma faaitiitia siaki o lo’u totogi.

I le vaaia ai o a’u tauiviga, e toatele ou auaiga na fai mai ia te au, e tatau ona ou totogia au sefuluai aua o le a fesoasoani ai ia te au e faatoilaloina ai ou faigata. Peitai, e iu ane lava ua totogi ai a’u pili. Na ou naunau e totogi au sefuluai pe a solo lelei tulaga tautupe, ae sa ou popole pe a faaletonu tulaga tautupe (tagai i le Mataio 14:28–31).

I le agai ai i le fale mai le galuega i se tasi o aoauli, i le mae’a ai o le totogi, na ou manatunatu i a’u aitalafu uma. Na ou moeiini ma tatalo, “Tamā, o le a le mea e tatau ona ou faia?” I lena lava taimi, na ou pupula a’e ma vaaia i luga o le faaalo o le pasi, ia Peteru o magoto ifo i se sami sousou faatasi ma le Faaola o aapa atu e laveai ia te ia. I le pito i lalo o le ata sa i ai upu ia “Faatuatua lē Maluelue.” Na ou iloa ai e manaomia le totogi o la’u sefuluai, pe afai ou te manao moni e totogi uma au aitalafu.

Ina ua ou taunuu i le fale, na ou mauaina se teutusi sefuluai ma tuu ai i totonu la’u sefuluai. A o ou faamauina le teutusi, na ou faalogoina upu ia “Ua lelei mea uma” ma lagonaina le olioli na aumaia le filemu i lo’u agaga.

Ou te iloa o le a aumaia e le Atua Ana faamanuiaga i lo’u olaga, pe a Ia silasila mai ua tatau ai. Seia o’o mai lena taimi, atonu o le a sousou pea le vasa, ae o le filemu ua ou lagonaina mo le usiusitai ua sili atu lena.