Ua E Saoloto
Mai se saunoaga i se faigalotu na tuuina atu i le Iunivesite o Polika Iaga i le aso 30 o Oketopa, 2007. Mo le tusiga atoa i le gagana Peretania, asiasi i le http://speeches.byu.edu.
O le mea e manaomia e le Atua, o le ituaiga tuutō lea na faaalia e Iesu.
O le talalelei, na saunoa ai Peresitene Gordon B. Hinckley (1910–2008), “o se fuafuaga o le saolotoga lea e tuuina mai le lotopulea i le manao, ma le taitaiga i le amio.”1 O lenei fuafuaga e taitaiina atu ai i tatou i le malamalama faateleina ma le gafatia, alofa tunoa ma le malamalama faateleina. O le saolotoga e avea ai oe faapei o le tulaga e mafai, pe tatau ona avea ai oe. Peitai, ina ia atoatoa lou saolotoga, e ao ona e naunau e tuu ese au agasala uma (tagai i le Alema 22:18), o ou tuinanauga, o mausa e te fiafia i ai ae le lelei, atonu foi e oo lava i nisi o mea lelei ia e faalavelavea ai mea e silafia e le Atua e tatau mo oe.
O Le Siufofoga o le Matai
O le uso o lo’u tina o Adena Nell Gourley na faamatalaina se aafiaga mai le tele o tausaga ua mavae faatasi ma lona tama—lo’u tamamatua, o Helge V. Swenson, lea ua maliu—lea e faapupula ai le uiga o la’u faamatalaga. Na ia faamatalaina faapea:
“Na ma asiasi atu ma la’u tama teine i le fale o o’u matua. Pe tusa o le goto ifo o le la, na fesili mai ai lo’u tina pe ma te mananao e o atu i le poletito i tua ma vaavaai ia Tama o valaau ana mamoe [e lima] e o mai i totonu o le falemanu mo le po. O Tamā, … o se peteriaka o le siteki, ma … o se tagata ua i ai uiga uma lava e lelei ma agamalu ma faamaoni, e pei ona tatau ona i ai i se tagata o le Atua.
“… Na savali atu Tamā i le faatausiusiuga o le fanua ma valaau, ‘O mai.’ I le taimi lava lena, e aunoa ma se toe faatali e lamuina meaai sa aia i lena taimi, na liliu uma mai lava ulu e lima agai i le mea o i ai o ia, ona amata lea ona tamomo’e mai mamoe seia latou taunuu mai i ona autafa, ma ia pai atu i ulu taitasi.
“Na faapea mai la’u tama teine laitiiti, ‘Auoi, Tinamatua, na faapefea ona mafai e Tamamatua ona aoao i latou e faia lea tulaga?’
“Na tali mai lo’u tina, ‘Ua iloa lelei e mamoe lona leo, ma, e alolofa i latou ia te ia.’ Ae e ao ona ou faatoese atu e lima mamoe na i ai i le fanua, ma e lima ulu na ea i luga ina ua ia valaau atu, ae na o le fa na tamomo’e atu ia Tamā. I se mamao, i le faatausiusiuga lava o le fanua, a o vaai sa’o atu ia Tama, na tutu ai se manufafine lapo’a. Na valaau atu Tamā ia te ia, ‘Sau ia.’ Sa na ona gaoioi pei o le a amata ona sau, ae e le’i sau. Ona amata lea ona savali atu Tamā i le fanua, ma valaau atu ia te ia, ‘Sau loa. E le o toe nonoaina oe’ Na laina uma atu i ona tua isi mamoe e fa ma mulimuli atu ia te ia.
“Ona faamatala mai lea e Tinā ia i maua faapea, i nai vaiaso ua mavae, na aumai ai e sa laua uo le [manufafine] lea ma tuu atu ia Tamā, faatasi ma le faamatalaga faapea ua ia le toe mana’o ai i le mamoe lea i lana lafu. Na fai mai le tamaloa lea, e segisegi ma ulavale, ma e na te taitaiina isi ana mamoe i taimi uma i fafo o le pa, ma tele ai ana faafitauli, o le mea lea ua ia manao ai e tia’i. Na taliaina ma le fiafia e Tamā le mamoe, ma, mo nai aso na sosoo ai, na ia nonoaina ai i totonu o le fanua, ina ia aua ne’i sola ese. Ona ia aoaoina lea ma le onosai le mamoe, ina ia alofa i ai faatasi ma isi mamoe. Ona sosoo lea, a o ia amata ona lagonaina le saogalemu i lona aiga fou, na tuu ai e Tamā se fasi maea puupuu i lona ua, ae ua lē toe nonoaina.
“A o faamatalaina e Tina lenei tala ia i maua, ua toeitiiti lava oo Tamā ma ana mamoe i le [mamoe faifaiaga] i le faatausiusiuga o le fanua, ma i le taaligoligoa na matou toe faalogo ai foi o ia valaau, ‘Sau loa. E le o toe nonoaina oe. Ua e saoloto.’
“Na ou lagonaina ua ou melotagi, a o ou vaai atu [i le mamoe] ua amata ona savali ma oo atu ai i autafa o Tamā. Ona sosoo lea, faatasi ma lona lima agaalofa i luga o lona ulu, na ia toe liliu mai ai faatasi ma lana tamai lafu, ma toe savavali mai i le mea na matou i ai.
“Na ou mafaufau i le auala e avea ai nisi o i tatou, o e ua avea uma ma mamoe a le Atua, ona noatia ma lē saoloto ona o a tatou agasala i le lalolagi. I lo’u tu ai iina i le poletito pito i tua, na ou faafetai lemu a’e i lo’u Tama Faalelagi, o loo i ai leoleo mamoe faamaoni ma faiaoga i lalo nei, o e e onosai ma agalelei ma naunau e aoao tatou e uiga i le alofa ma le usiusitai, ma ofoina mai ia i tatou le saogalemu ma le saolotoga i totonu o le lafu, ina ia mafai ai, e ui lava atonu tatou te mamao ese mai le nofoaga saogalemu, o le a tatou iloaina le siufofoga o le Matai pe a Ia valaau mai, ‘Sau ia. O lena ua e saoloto.’”2
E maeu le fiafia o le iloaina faapea e mafai ona tatou faalauteleina lo tatou saolotoga e ala i le faaatoatoaina o lo tatou usiusitai. I upu a Peresitene Boyd K. Packer, Peresitene o le Korama a Aposetolo e Toasefululua, “Tatou te le usiusitai ona faapea ua tatou tauaso, tatou te usiusitai ona e mafai ona tatou vaai.”3
O la tatou filifiliga i lenei olaga, e le o le faapea o le a tatou, pe, o le a tatou lē mulimuli atu i soo se mana. O la tatou filifiliga o le iloa lea po o le fea pule o le a tuu atu i ai lo tatou usiusitai: o le Atua, po o Satani. E pei ona ta’u mai e Liae, o se filifiliga i le va o le saoloto ma le saisaitia (tagai i le 2 Nifae 2:27). Afai e le o le tasi, o lona uiga e tatau lava o le isi.
O lo tatou tuu atu i le Atua ma Lana aia tatau e pule ma nofotupu ia i tatou, e aumai ai isi faamanuiaga. O nisi o nei faamanuiaga tupito o le faatuatua ma le lototalitonu lea e mafai ai e i tatou ona ola i le filemu. Na fetalai atu le Alii ia Iosua:
“E le tu mai se tagata e tetee ia te oe i aso uma o lou ola; e pei ona ou i ai ia Mose, e faapea ona ou i ai ia te oe; ou te le tuua lava oe: ou te le tuulafoai lava ia te oe. …
“Tau ina e faamalosi, ma ia matuā lototele lava; ia e anaana e fai e tusa ma le tulafono uma na fai atu ai Mose la’u auauna ia te oe; aua e te alu ese ai i le itu taumatau po o le itu tauagavale, ina ia manuia ai oe i mea uma e te alu i ai” (Iosua 1:5, 7).
“Ua Ou Manumalo i le Lalolagi”
Afai e faapea ona tatou faia, “fai e tusa ma le tulafono uma,” o le a faapea foi ona tatou maua le lototalitonu faapea ua faatasi le Atua ma i tatou faapei ona ia faatasi ma Mose. Faatasi ma le Fai-Salamo, o le a mafai ona tatou faapea atu, “Ua ou faatuatua i le Atua; ou te le fefe i se mea e faia e tagata ia te au” (Salamo 56:11). Pe le i folafola mai ea le Alii faapea, “E maua foi outou e le puapuaga i le lalolagi, a ia outou loto tetele, ua ou manumalo i le lalolagi” (Ioane 16:33)?
I tausaga ua mavae, na ou pulefaamalumalu ai i se fono aoai faale-Ekalesia. O le alii, e ana ia agasala lea sa avea ma autu o le fono aoai sa nofo i o matou luma, ma faamatala e uiga i lona talaaga. O ana agasala, e moni lava e matuā ogaoga. Peitai, sa faapea foi ona matuia agasala faasaga ia te ia. A o matou fefulisaia le mataupu, na fai si o’u popole, ma ou faanoi ai ou te tulai ese, ina ia mafaufau atili ma tatalo e uiga i le mataupu na o au lava, ae ou te lei toe faatasi atu ma le aufono.
Na ou tu i luma o se nofoa i totonu o lo’u ofisa, ma ole atu i le Alii e fesoasoani mai ia te au ia ou malamalama i le auala atonu na faatinoina ai lea ituaiga agasala. Ou te le’i vaaia, ae na ou lagonaina se lua tele faatasi ma se ufiufi i ona luga. O se tasi o tulimanu o le ufiufi, sa sisiina laititi mo na o sina vaega, ma ou vaaia ai i totonu o le lua le loloto ma le tele o le agasala o loo i ai i lenei lalolagi. Sa sili atu nai lo mea ua mafai ona ou malamalama ai. Na lofituina a’u. Na ou faapa’ū ifo i le nofoa na i o’u tua. O lea aafiaga na foliga na tau ave ai la’u manava. Na ou tagi le leoa, “E mafai ea faapefea ona matou faamoemoe e faatoilaloina nei ituaiga agasala? E mafai faapefea ona faasaoina mai matou mai se mea sili ona pogisa ma lofituina faapea?”
I lena taimi, na oo mai i lo’u mafaufau lenei fuaitau: A ia outou lototetele, ua ou manumalo i le lalolagi” (Ioane 16:33). Ou te le’i lagonaina lava muamua sea ituaiga o filemu pe a faatusa i le tulaga moni o le agasala. Na ou faalogoina se agaga faafetai loloto atu mo le matuitui o mafatiaga o le Faaola, ma i ai se agaga faafetai sili atu, e oo lava i le lagona fefe, mo le loloto o mea na tatau ona Ia faatoilaloina. Na ou lagonaina le filemu mo le alii, o lē sa i o matou luma ina ia faamasinoina, i le iloaina ai o loo i ai sona Togiola, o lona alofa tunoa ua lava e faamamaina ai o ia, ma toe faaleleia ai foi faamasinoga le tonu na ia mafatia ai. Na sili atu lo’u iloa i lea taimi, faapea o le a manumalo le lelei ona o Iesu Keriso, ae a aunoa ma Ia, o le a leai so tatou avanoa. Na ou lagonaina le filemu, ma sa matua suamalie lava.
E moni mea ua aoao mai e le Perofeta o Iosefa Samita: “O lea, uso pele e, sei tatou faia ma le fiafia mea uma o loo i ai i lo tatou malosi; ona mafai ai lea i tatou ona tumau lava ma le mautinoa mausali, e vaavaai atu i le faaolataga a le Atua, ma le faaalia o lona aao” (MFF123:17). O le folafolaga ia i latou o e tuuina atu o latou loto i le Atua e faapea, o Lona aao ma Lona mana, o le a faaalia i o latou olaga. Na fetalai le Faaola:
“Aua le matatau, le fanau laiti e, ona o outou o a a’u, ma ua Ou manumalo i le lalolagi, ma o outou o ni o i latou o e ua tuuina mai e lo’u Tama ia te a’u;
“Ma e leai so i latou o e ua tuuina mai e lo’u Tama ia te a’u e leiloa” (MF&F 50:41–42).
O le ola ai ma lenei faamautinoaga, o se faamanuiaga, atonu e sili atu nai lo mea e mafai ona tatou faafetaia. O i tatou uma—o le a le pine, i se taimi o faalavelave o faaolioli mai, po o fenumiaiga faavaivai tagata, i le filifilia ai o le Atua e avea ma o tatou taiala—o le a mafai ona pesepese ma le loto atoa faapea, “E suamalie le filemu e aumaia e le Talalelei”4
E le tatau ona tatou faamoemoe mo le filemu, po o le saolotoga, po o le faatuatua, po o soo se isi lava mea e pei o se meaalofa mai lo tatou Atua, pe afai o lo tatou taliaina o Lana taitaiga e maalili po o le faia ma le tomumu. Afai o se amiotonu faafoliga ae le o se amiotonu moni, e le tatau ona faamoemoeina se taui. O se lagolagosua le fesootai, vavamamao, ia te Ia lava, e le o se lagolagosua lelei. O lo tatou tuuto e ao ona atoatoa, faia ma le lotoatoa, ma tuuina atu ma le lotomalie. O le mea e manaomia e le Atua, o le tuuto lea na faaalia e Iesu, o le na talosagaina e inumia le ipu sili ona oona, lea na matautuia ai Ia lava, le Foafoa sili (tagai i le Mareko 14:33–36; MF&F 19:17–18). Ae peitai, na Ia faia lava, “o le loto o le Atalii ua tofatumoanaina i le finagalo o le Tamā” (Mosaea 15:7).
Ou te tuuina atu ia te outou la’u molimau faapea, e ala ia Iesu Keriso, le Alo o le Atua, e mafai ona avea tatou ia tasi ma le Atua, e pei lava ona tatalo Iesu ina ia faapea i tatou (tagai i le Ioane 17:20–23). Tau ina ia avea la outou lagolagosua mo i Laua, o le taiala susulu o outou olaga mo le faavavau.
Ata na tusia e Dilleen Marsh