Ang mga Gahum sa Priesthood
Ni Presidente Dallin H. Oaks
Unang Magtatambag sa Unang Kapangulohan
Ang pagpalambo sa balaang priesthood nga inyong gihuptan mahinungdanon sa buhat sa Ginoo diha sa inyong pamilya ug sa inyong mga calling sa Simbahan.
Minahal nga mga kaigsoonan, nakadungog kita og usa ka pinadayag nga pahibalo gikan ni Presidente Russell M. Nelson. Nakadungog kita og importante nga mga pagpasabut nila ni Elder Christofferson ug Elder Rasband ug ni Presidente Eyring. Unsa pa ang laing ipamulong karon, lakip sa idugang pa ni Presidente Nelson, mopasabut unsa ang buhaton ninyo, mga lider sa Ginoo ug mga naghupot sa priesthood, sa inyong mga responsibilidad. Aron sa pagtabang niana, akong ibalik ang pipila ka mga sukaranang mga baruganan nga nagdumala sa priesthood nga inyong gihuptan.
I. Ang Priesthood
Ang Melchizedek nga Priesthood mao ang balaan nga katungod nga gitugyan sa Ginoo aron sa pagpatuman sa Iyang buhat “sa pagpahinabo sa … kinabuhing dayon sa tawo”. (Moises 1:39). Niadtong 1829, gitugyan kini kang Joseph Smith ug Oliver Cowdery pinaagi sa mga Apostoles sa Manluluwas nga sila si Pedro, Santiago ug Juan. (tan-awa sa D&P 27:12). Kini sagrado ug gamhanan labaw pa sa atong gahum sa paghulagway.
Ang mga yawe sa priesthood mao ang mga gahum sa pagdumala sa paggamit sa katungod sa priesthood. Busa, kon ang mga Apostoles mitugyan sa Melchizedek Priesthood ngadto ni Joseph ug Oliver, ila usab silang gihatagan og mga yawe sa pagdumala sa paggamit niini. (Tan-awa sa D&P 27:12–13). Pero dili tanang mga yawe sa priesthood ang gitugyan niadtong higayuna. Ang tanang mga yawe ug kahibalo nga gikinahanglan alang niining “ kapaigoan sa kahingpitan sa panahon” (D&P 128:18) gihatag nga “pagtulun-an ngadto sa lain nga pagtulun-an” (bersikulo 21). Dugang mga yawe gihatag diha sa Templo sa Kirtland pito ka tuig ang milabay (tan-awa sa D&P 110:11–16). Kining mga yawe gihatag aron sa pagdumala sa katungod sa priesthood sa dugang nga mga buluhaton nga gihatag niadtong higayuna, sama sa bunyag alang sa mga patay.
Ang Melchizedek Priesthood dili kahimtang o titulo. Kini usa ka balaan nga gahum nga gitugyan aron magamit alang sa kaayuhan sa buhat sa Ginoo alang sa Iyang mga anak. Kinahanglan natong hinumduman kanunay nga ang mga lalaki kinsa naghupot sa priesthood dili “mao ang priesthood.” Dili tukma nga moingon nga “ang priesthood ug ang mga babaye.” Kinahanglan kitang mo-refer ngadto “sa mga naghupot sa priesthood ug sa mga babaye.”
II. Usa ka Pangalagad sa Pagserbisyo
Karon atong hunahunaon unsa ang gilauman ni Ginoong Jesukristo gikan niadtong naghupot sa Iyang priesthood—unsaon nato pagdala og mga kalag ngadto Kaniya.
Si Presidente Joseph F. Smith mitudlo: “Tinuod nga gisulti kini nga ang Simbahan hingpit nga naorganisar. Ang problema lamang mao nga ang mga organisasyon dili hingpit nga nagtagad sa mga obligasyon nga gisangon diha kanila. Kon mahimo na silang hingpit nga makamatngon sa mga gikinahanglan diha kanila, sila motuman na sa ilang mga katungdanan sa mas labaw pa ka matinud-anon, ug ang trabaho sa Ginoo mahimo nga labaw pa ka lig-on ug labaw pa ka gamhanan ug makaimpluwensya dinhi sa kalibutan.”1
Si Presidente Smith mipahimangno usab:
“Ang hinatag sa Dios nga titulo … nga giubanan sa pipila ka mga buhatan ug mga kapunongan sa Balaan nga Priesthood, dili pagagamiton ni isipon sama sa mga titulo nga nagagikan sa tawo; dili kini alang sa dayan-dayan ni kini pagpakita sa pagkahawod, kondili sa pagkatudlo ngadto sa mapainubsanon nga serbisyo sa trabaho sa usa ka Magtutudlo kang kinsa atong giangkon nga alagaran. …
“… Naghago kita alang sa kaluwasan sa mga kalag, ug kinahanglan nga mobati kita nga kini ang atong pinakamahinungdanon nga katungdanan nga gitugyan kanato. Busa, kinahanglan nga mobati kita nga andam sa pagsakripisyo sa tanang butang, kon gikinahanglan, tungod sa paghigugma sa Dios, sa kaluwasan sa mga tawo, ug sa kadaugan sa gingharian sa Dios dinhi sa yuta.”2
III. Ang mga Katungdanan sa Priesthood
Sa Simbahan sa Ginoo, ang mga katungdanan sa Melchizedek Priesthood adunay nagkalain-lain nga mga buluhaton. Ang Doktrina ug mga Pakigsaad nag-refer sa mga high priest isip “ dili mopanaw nga mga presidente o mga sulugoon diha sa nagkalain-lain nga mga istaka nga nagkatag sa lain nga dapit” (D&P 124:134). Kini nagpasabut sa mga elders isip “mga ministro diha sa simbahan [sa Ginoo]” (D&P 124:137). Ania ang ubang panudlo niining laing mga buluhaton.
Ang high priest magdumala ug mangalagad sa espirituhanon nga mga butang (tan-awa sa D&P 107:10, 12). Dugang pa, sama sa gipanudlo ni Presidente Joseph F. Smith, “Tungod kay siya gi-orden nga high priest, [siya] kinahanglan mobati nga siya obligado … nga mopakita og ehemplo nga angayang sundon atubangan sa batan-on ug tigulang, ug ipahimutang ang iyang kaugalingon sa posisyon nga mahimong magtutudlo sa pagkamatarong, dili lamang sa mga lagda apan ilabi na pinaagi sa ehemplo––paghatag sa mga kabatan-onan og kaayuhan sa kasinatian sa kapanahonan, ug sa ingon sa tinagsa mahimong gahum taliwala sa komunidad diin siya nagpuyo.”3
Sa ubang buluhaton sa usa ka elder, si Elder Bruce R. McConkie sa Korum sa Napulog Duha mitudlo: “Ang elder usa ka ministro ni Ginoong Jesukristo. … Siya gitahasan nga mobarug ug morepresentar sa iyang Agalon … Sa pagpangalagad ngadto sa iyang isig ka tawo. Siya ang sulugoon sa Ginoo.”4
Si Elder McConkie misaway sa ideya nga ang naghupot sa priesthood “usa lamang ka elder.” “Ang matag elder sa Simbahan naghupot og samang priesthood sa Presidente sa Simbahan … ,” siya miingon. “Unsa ang usa ka elder? Usa siya ka Magbalantay, ang Magbalantay nga nagserbisyo sa toril sa Maayong Magbalantay.”5
Niining importanting buluhaton sa pagpangalagad sa toril sa Maayong Magbalantay, walay kalainan tali sa mga katungdanan sa high priest ug sa elder diha sa Melchizedek Priesthood. Diha sa mahinungdanon nga seksyon 107sa Doktrina ug mga Pakigsaad, ang Ginoo mipahayag, “Ang Halangdon nga mga Pari sunod sa kapunongan sa Melchizedek nga Pagkapari adunay katungod sa pagdumala diha sa ilang kaugalingon nga kahimtang, ubos sa pagmando sa kapangulohan, diha sa pagpangalagad sa espirituhanon nga mga butang, ug usab sa buhatan sa usa ka anciano [o mga buhatan sa Aaronic Priesthood]” (D&P 107:10; tan-awa usab sa bersikulo 12).
Ang labing importante nga baruganan alang sa tanang naghupot sa priesthood mao ang baruganan nga gitudlo ni propeta Jacob sa Basahon ni Mormon. Human nga siya ug ang iyang igsoong lalaki nga si Joseph gitudlo nga mga pari ug magtutudlo sa katawhan, siya mipahayag, “Ug kami mipalambo sa among mga buluhaton ngadto sa Ginoo, nag-angkon ngari kanamo sa katungod, manubag sa mga sala sa mga katawhan dinhi sa among mga ulo kon dili kami motudlo kanila sa pulong sa Dios uban sa tanan nga kakugi” (Jacob 1:19).
Mga igsoon, seryuso nga butang ang atong mga responsibilidad isip mga nanaghupot sa priesthood. Ang ubang mga organisasyon mahimong matagbaw sa kalibutanon nga mga sumbanan sa binuhatan sa pagpaabut sa ilang mga mensahe ug pagbuhat sa ilang ubang mga buluhaton. Apan kita nga naghupot sa priesthood sa Dios adunay balaan nga gahum nga gani nagdumala sa pagsulod ngadto sa celestial nga gingharian sa Dios. Aduna kitay katuyoan ug responsibilidad nga gitin-aw sa Ginoo disa sa gipadayag nga pasiuna sa Doktrina ug mga Pakigsaad. Kinahanglan kita nga mosangyaw sa kalibutan:
“Nga ang matag tawo unta mamulong sa ngalan sa Dios ang Ginoo, gani ang Manluluwas sa kalibutan;
“Nga ang hugot nga pagtuo usab molambo sa yuta;
“Nga ang akong walay katapusan nga pakigsaad unta mapahimutang;
“Nga ang kahingpitan sa akong ebanghelyo mahimo tingali ikapahayag pinaagi sa mahuyang ug yano ngadto sa mga lumulupyo sa kalibutan” (D&P 1:20–23).
Sa pagpatuman niining balaan nga buluhaton, kinahanglan kitang magmatinud-anon sa “pagpalambo” sa atong priesthood nga mga calling ug responsibilidad. (Tan-awa sa D&P 84:33). Si Presidente Harold B. Lee, mipasabut kon unsa ang gipasabut sa pagpalambo sa priesthood: “Kon ang usa ka tawo mahimo nga tighupot sa priesthood, mahimo siya nga tinugyanan sa Ginoo. Kinahanglan siya maghunahuna sa iyang calling ingon og siya anaa sa pagkasinugo sa Ginoo. Kana mao unsa ang gipasabut sa pagpalambo sa priesthood.”6
Busa, mga kaigsoonan, kon ang Ginoo Mismo mohangyo kaninyo sa pagtabang og usa sa Iyang mga anak nga lalaki o babaye––nga Iyang gibuhat pinaagi sa Iyang mga sulugoon––buhaton mo ba kana? Ug kon ikaw mibuhat, molihok ka ba isip Iyang tinugyanan, nga “anaa sa buluhaton sa Ginoo,” naglaum sa Iyang gisaad nga tabang?
Si Presidente Lee adunay lain nga panudlo mahitungod sa pagpalambo sa priesthood: “Kon ikaw maggunit og magnifying glass ibabaw sa usa ka butang makahimo kana nianang butanga nga daw modako kay sa imong makita sa yano nga pagtan-aw; mao kana ang magnifying glass. Karon, … Kon bisan kinsa nag-magnify sa ilang priesthood––nga maoy, makahimo niana nga mas dako kay sa una nilang gihunahuna nga kini mao––kana ang pamaagi nga ikaw mag-magnify sa imong priesthood.”7
Aniay ehemplo sa usa ka naghupot sa priesthood nga nagpalambo sa iyang priesthood nga responsibilidad. Nadunggan nako gikan ni Elder Jeffrey D. Erekson, akong kauban sa usa ka komperensya sa stake sa Idaho. Isip batan-on nga minyo nga elder, kabus kaayo ug mibati nga dili makahuman sa iyang katapusang tuig sa kolehiyo, si Jeffrey mihukom nga moundang ug modawat sa madanihon nga gitanyag nga trabaho. Pipila ka adlaw ang milabay ang presidente sa iyang elders korum miadto sa iyang panimalay. “Nakasabut ka ba sa kaimportante sa mga yawe sa priesthood nga akong gihuptan?” ang presidente sa elders quorum nangutana. Sa dihang si Jeffrey miingon nga siya nakasabut, ang presidente misulti kaniya nga sukad siya nakadungog sa iyang tuyo nga moundang sa kolehiyo, gihasol siya sa Ginoo atol sa mga gabii nga dili siya makatulog aron sa paghatag ni Jeffrey niini nga mensahe: “Isip imong presidente sa elders korum, ako motambag kanimo sa dili pag-undang sa kolehiyo. Kana usa ka mensahe kanimo gikan sa Ginoo.” Si Jeffrey mipadayon sa pag-eskwela. Katuigan ang milabay ako siyang nahimamat sa dihang siya usa na ka malampuson nga negosyante ug nakadungog kaniya nga misulti sa nanambong nga mga tighupot sa priesthood, “Kato [nga tambag] nakahimo og dakong kalainan sa akong kinabuhi.”
Usa ka tighupot sa priesthood nga nag-magnify sa iyang priesthood ug calling, ug kana nakahimo og “dako nga kalainan” sa kinabuhi sa laing anak sa Dios.
IV. Priesthood diha sa Pamilya
Hangtud karon, nagsige ko og pamulong bahin sa mga buluhaton sa priesthood diha sa Simbahan. Karon ako mamulong sa priesthood diha sa pamilya. Nagsugod ko sa mga yawe. Ang baruganan nga ang katungod sa priesthood magamit lamang ubos sa pagdumala sa usa ka naghupot sa mga yawe alang niana nga buluhaton importante diha sa Simbahan apan wala maglakip sa paggamit sa katungod sa priesthood diha sa pamilya.8 Ang amahan kinsa naghupot sa priesthood mangulo sa iyang pamilya pinaagi sa katungod sa priesthood nga iyang gihuptan. Dili na niya kinahanglan ang paggiya o pagtugot sa mga yawe sa priesthood aron sa pagtambag sa mga sakop sa iyang pamilya, magpahigayon og mga miting sa pamilya, maghatag og mga panalangin sa priesthood sa iyang asawa ug mga anak, o paghatag og panalangin sa pag-ayo ngadto sa mga sakop sa pamilya o sa uban.
Kon ang mga amahan mo-magnify sa ilang priesthood sa ilang kaugalingon nga pamilya, makapauswag kini sa misyon sa Simabahan og sa bisan unsa pa nga ilang buhaton. Ang mga amahan nga naghupot sa Melchizedek Priesthood kinahanglan nagtuman sa mga sugo aron makabaton sila sa gahum sa priesthood sa paghatag og mga panalangin ngadto sa mga sakop sa ilang pamilya. Ang mga amahan kinahanglan usab mga mag-ugmad og mahigugmaong mga relasyon sa pamilya aron ang mga sakop sa pamilya madasig sa pagpangayo sa mga panalangin sa ilang mga amahan. Ug ang mga ginikanan kinahanglan modasig og dugang mga panalangin sa priesthood sulod sa pamilya.
Mga amahan, lihok isip “katimbang nga kauban” sa inyong mga asawa, sama sa gitudlo sa pamahayag sa pamilya.9 Ug, mga amahan, kon kamo nahatagan og kahigayunan sa paggamit sa gahum ug impluwensya sa inyong katungod sa priesthood, himua kana pinaagi “sa pagdani, sa pagka-mainantuson, sa kalumo ug kaaghup, ug sa tiunay nga paghigugma” (D&P 121:41). Kanang taas nga sumbanan alang sa paggamit sa katungod sa priesthood maoy labing importante diha sa pamilya. Si Presidente Harold B. Lee mihatag niini nga saad human siya mahimong Presidente sa Simbahan: “Wala pa sukad ang gahum sa priesthood, nga inyong gihuptan, labaw pa ka maanindot kay sa panahon sa usa ka krisis diha sa inyong panimalay, sa usa ka grabe nga sakit, o sa pipila ka dagkong desisyon nga kinahanglan nga pagahimoon. … Lakip sa gahum sa priesthood, nga mao ang gahum sa Langitnong Dios, mao ang gahum sa paghimo og mga milagro kon ang Ginoo magbuot niini, apan aron kita makagamit niana nga priesthood, kita kinahanglan nga takus sa paggamit niini. Ang pagkapakyas sa pagsabut niini nga baruganan mao ang pagkapakyas sa pagdawat sa mga panalangin sa paghupot nianang gamhanan nga priesthood.”10
Ang pagpalambo sa balaang priesthood nga inyong gihuptan mahinungdanon sa buhat sa Ginoo diha sa inyong pamilya ug sa inyong mga calling sa Simbahan.
Mopamatuod ako Kaniya kansang priesthood Iyaha. Pinaagi sa Iyang maulaong pag-antus ug sakripisyo ug pagkabanhaw, tanang lalaki ug babaye adunay kasigurohan sa imortalidad ug kahigayunan alang sa kinabuhing dayon. Matag usa kanato kinahanglang magmatinud-anon ug makugihon sa atong bahin niining talagsaong buhat sa Dios atong Amahan sa Kahangturan, sa pangalan ni Jesukristo, amen.