Gihatagan og gibug-aton nga mga pagtulun-an gikan sa Ika-188 nga Tinuig nga Kinatibuk-ang Komperensya

Kini nga kinatibuk-ang komperensya makasaysayanon tungod sa daghang mga rason, lakip sa pag-usab sa mga korum sa Melchizedek Priesthood ug sa sinugdanan sa bag-ong panahon sa pagpangalagad. Apan tingali ang labing gipaabut mao ang atong indibidwal nga oportunidad sa pagpaluyo ni Presidente Russell M. Nelson isip ika-17 nga Presidente sa Ang Simbahan ni Jesukristo sa mga Santos sa Ulahing mga Adlaw.

Usa ka Maligdong nga Katiguman

Sa dihang mibarug kita ug mipaluyo sa bag-o nga propeta ug Presidente, ang atong gipataas nga mga kamot wala maihap ni bisan kinsa nga tawhanong tighupot og rekord; kini gitiman-an sa langit isip usa ka pakigsaad uban sa Dios.

Sa tibuok komperensya, makita nato ang ebidensya nga kini mao ang Simbahan sa Manluluwas, gigiyahan Niya pinaagi sa Iyang mga sulugoon. Nakasaksi kita sa gidawat nga katungdanan sa usa ka buhi nga propeta kalabut sa matag usa kanato—wala magbarug taliwala nato ug sa Manluluwas apan nagbarug tupad nato ug nagtudlo sa agianan padulong sa Manluluwas. Nasinati nato ang oportunidad sa pagdawat “og personal nga pagsaksi nga ang tawag ni Presidente Nelson gikan sa Dios” ug ang pag-angkla sa “atong kalag ngadto kang Ginoong Jesukristo [nga] maminaw niadtong Iyang gipadala.” (tan-awa sa Elder Neil L. Andersen sa pahina 26).

• Makakat-on kamo og dugang mahitungod ni Presidente Nelson sa 16-ka pahina nga espesyal nga gidugang nga anaa sa Mayo 2018 Ensign ug Liahona.

Pagpaluyo sa Bag-ong mga Lider

Agig dugang sa pagpaluyo ni Presidente Nelson, gipaluyuhan nato ang sobra sa 70 ka bag-ong mga lider.

• Pangitaa ang lista niadtong gipaluyuhan, lakip sa bag-ong mga Area Seventy, sa mga pahina 6–8, 28–29.

• Basaha ang mubo nga mga biography sa bag-ong mga lider sa pahina 121.

Mga Kausaban sa mga Korum ug Pagpangalagad

Bisan og nakita sa mga propeta, ang mga kausaban nga gipahibalo atol sa komperensya mao ang “mga ehemplo sa pagpadayag [gikan sa Dios] nga naggiya niining Simbahan sukad sa sinugdanan,” miingon si Elder Jeffrey R. Holland (tan-awa sa pahina 101).

• Basaha ang mga instruksyon sa pag-usab sa mga korum gikan ni Presidente Nelson, Elder D. Todd Christofferson, ug Elder Ronald A. Rasband, sugod sa pahina 54.

• Basaha ang mga instruksyon sa pagpangalagad gikan ni Presidente Nelson, Elder Holland, ug Sister Jean B. Bingham, sugod sa pahina 100.

• Tan-awa ang dugang nga impormasyon mahitungod niini nga mga kausaban ug mga kapanguhaan sa intruksyon sa seksyon sa mga balita sa mga pahina 132–33.

Dugang nga mga Templo

Sa pamunto “ang among mensahe ngadto sa kalibutan” nga “gidapit namo ang tanang anak sa Dios sa duha ka habig sa tabil sa pagduol ngadto sa ilang Manluluwas, dawata ang mga panalangin sa balaan nga templo, pagbaton og molahutay nga kalipay, ug mahimong angayan sa kinabuhing dayon,” gipahibalo ni Presidente Nelson ang pito ka bag-ong mga templo.

• Susiha asa mahimutang ang pito ka bag-ong mga templo, sa pahina 133.