Magpadayon Tang Tanan
Ni Presidente Russell M. Nelson
Ang inyong tinguha nga magmasulundon molambo samtang kamo mohinumdom ug mamalandong kon unsa ang inyong gibati sa milabayng duha ka adlaw.
Minahal kong mga kaigsoonan, sa atong pagtapos niining makasaysayanong komperensya, moapil ako kaninyo sa pagpasalamat sa Ginoo sa Iyang paggiya ug makapadasig nga impluwensya. Ang musika maanindot ug makapabayaw. Ang mga mensahe dili lang makapalig-on, apan makapausab sa kinabuhi!
Sa maligdong nga katiguman atong gipaluyohan ang bag-o nga Unang Kapangulohan. Duha ka talagsaong kalalakin-an ang natawag sa Korum sa Napulog Duha ka mga Apostoles. Ug walo ka bag-ong mga General Authority Seventy ang natawag.
Karon usa ka paborito nga himno ang mo-summarize sa atong gibag-o nga tinguha, sa atong hagit, ug sa atong katungdanan sa pagpadayon sa unahan:
Magpadayon ta sa buluhaton sa Dios,
Nga kita gantihan sa kaulahian;
Diha’s katarung espada gamiton,
Espada’s kamatuoran.
Ayaw kahadlok sa kaaway;
Kay ang Dios kanato nagbantay.
Pulong sa dautan di paminawon,
Apan Dios lamang atong sundon.1
Awhagon ko kamo sa pagtuon kanunay sa mga mensahe niining komperensya —gani balik-balikon—sulod sa mosunod nga unom ka bulan. Magmakugihon sa pagpangita og mga paagi sa paglakip niining mga mensahe sa inyong mga family home evening, sa inyong pagtudlo sa ebanghelyo, sa inyong mga panag-istorya sa pamilya ug sa mga higala, ug gani sa inyong mga diskusyon niadtong lahi nato og tinuohan. Daghan ang maayong tawo nga mouyon sa mga kamatuoran nga gitudlo niining komperensya kon gidalit diha sa gugma. Ug ang inyong tinguha sa pagsunod mapalambo samtang kamo maghinumdom ug mamalandong kon unsa ang inyong gibati sa milabayng duha ka adlaw.
Kining kinatibuk-ang komperensya nagtimaan sa sinugdanan sa bang-ong kapanahunan sa pagpangalagad. Ang Ginoo naghimo og importanting kausaban sa paagi nga kita moatiman sa usag usa. Mga kaigsoonan—tigulang ug batan-on—moserbisyo sa usag usa sa bag-o, mas balaan nga paagi. Ang mga korum sa mga elder mapalig-on sa pagpanalangin sa mga kinabuhi sa kalalakin-an, kababayen-an ug kabataan sa tibuok kalibutan. Ang mga sister sa Relief Society mopadayon sa pagpangalagad sa ilang lahi ug mahigugmaon nga paagi, mopadangat og mga oportunidad ngadto sa mga sister sa pag-apil nila kon tukma nga gitahasan.
Ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, dawata ang mga panalangin sa balaan nga templo, pagbaton og molahutay nga kalipay, ug mahimong angayan sa kinabuhing dayon.2
Ang katapusang kahimayaan nagkinahanglan sa atong hingpit nga kamaunongon karon ngadto sa mga pakigsaad nga atong gihimo ug sa mga ordinansa nga atong nadawat sa balay sa Ginoo. Niining panahona, kita aduna nay 159 ka naggamit nga mga templo, ug mas daghan pa ang kasamtangang gitukod. Gusto namong dad-on ang mga templo paduol ngadto sa nagkadaghan nga mga miyembro sa Simbahan. Mao nga karon ikalipay namong ipahibalo ang mga plano sa pagtukod og pito pa ka mga templo. Kini nga mga templo tokuron sa mosunod nga mga dapit: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; ug sa usa ka dakong siyudad nga wala pa matino dinha sa Russia.
Pinalanggang mga kaigsoonan, ang pagtukod niining mga templo mahimong dili makausab sa inyong mga kinabuhi, apan ang inyong panahon sulod sa templo seguradong makahimo. Niana nga diwa, Ako mopanalangin kaninyo sa pagtino sa mga butang nga inyong ipadaplin aron kamo makagahin og dugang panahon sa templo. Ako mopanalangin kaninyo og mas dakong panag-uyon ug gugma sa inyong panimalay ug mas lawom nga tinguha sa pag-amuma sa inyong mahangturong mga relasyon sa pamilya. Ako mopanalangin kaninyo nga madugangan ang inyong hugot nga pagtuo diha sa Ginoo nga si Jesukristo ug mas dako nga abilidad sa pagsunod Kaniya isip Iyang tinuod nga mga disipulo.
Ako mopanalangin kaninyo sa pagpataas sa inyong tingog sa pagpamatuod, sama sa akong gibuhat karon, nga kita naapil diha sa buhat sa Makagagahum nga Dios! Si Jesus mao ang Kristo. Kini mao ang Iyang Simbahan, nga Siya nagmando pinaagi sa Iyang dinihugan nga mga sulugoon. Ako nagpamatuod, inubanan sa akong pagpadayag sa gugma alang sa matag usa kaninyo, diha sa sagradong ngalan ni Jesukristo, amen.