Si Kristo ang Ginoo Nabanhaw Karon

Ni Elder Gerrit W. Gong

Sa Korum sa Napulog Duha ka mga Apostoles

Kini ang Dominggo sa Pasko sa Pagkabanhaw. Matinahuron akong mosaksi ug ligdong nga mopamatuod sa buhi nga Kristo—Siya kinsa “namatay, gilubong, ug mibangon sa ikatulong adlaw, ug mikayab ngadto sa langit.”

Minahal nga mga kaigsoonan, sa bata pa kaayo ang among mga anak, suginlan nako sila og mga istorya mahitungod sa mga itoy nga beagle ug kantahan og mga awit tingkatulog, lakip ang “Si Kristo ang Ginoo Nabanhaw Karon.”¹ Usahay kalingawan nako sa pag-usab ang mga pulong: Oras na karon para matulog—hallelujah. Kasagaran makatulog dayon ang among mga anak; o kaha nasayud sila nga kon nagtuo ko nga nakatulog na sila, mohunong ko sa pagkanta.

Ang mga pulong—labing minos akong mga pulong—dili makapahayag sa naghingapin nga mga pagbati sukad nga mahigugmaong gigunitan ni Presidente Russell M. Nelson ang akong mga kamot, nga anaa sa akong tupad ang minahal ko nga si Susan, ug mihatag niining sagradong tawag gikan sa Ginoo nga nakasurprisa kaayo kanako ug kadaghan nga nakapahilak nako niining milabay nga pipila ka adlaw.

Ning Pasko sa Pagkabanhaw nga Igpapahulay, malipayon akong moawit, “Alleluia.” Ang kanta sa matubsanong gugma sa atong nabanhaw nga Manluluwas² nagsaulog sa panag-uyon sa mga pakigsaad (nga nagkonektar nato ngadto sa Dios ug sa usag usa) ug sa Pag-ula ni Jesukristo (nga nagtabang nato sa pagsalikway sa kinaiyanhong tawo ug motugyan ngadto sa mga pagdani sa Balaang Espiritu³).

Magkauban, ang atong mga pakigsaad ug ang Pag-ula sa atong Manluluwas makapaarang ug makapaligdong kanato. Magkauban, nagtabang kini kanato nga magmatinud-anon ug mosalikway sa sala. Magkauban, kini mopatam-is, mopreserbar, mobalaan, motubos.

Miingon si Propeta Joseph Smith: “Kini maingon ngadto sa uban og usa ka dili kasagaran nga doktrina nga kita naghisgot—ang gahum nga nagsulat o nagbugkos dinhi sa yuta ug nagbugkos didto sa langit. Bisan pa niana, sa tanan nga panahon sa kalibutan, sa matag higayon ang Ginoo mihatag og kapaigoan sa pagkapari ngadto ni bisan kinsa nga tawo pinaagi sa tinuod nga pagpadayag, o ni bisan kinsa nga pundok sa mga tawo, kini nga gahum kanunay nga gihatag.”⁴

Ug mao usab kini karon. Ang sagradong mga pakigsaad ug mga ordinansa, nga wala sa ubang dapit, dawaton diha sa 159 ka balaan nga mga balay sa Ginoo sa 43 ka mga nasud. Ang gisaad nga mga panalangin moabut pinaagi sa gipahiuli nga mga yawe sa priesthood, doktrina, ug awtoridad, nagpakita sa atong pagtuo, pagkamasulundon, ug ang mga saad sa Iyang Balaang Espiritu ngari kanato sa atong mga henerasyon, karon ug sa kahangturan.

Minahal nga kaigsoonan sa tanang nasud, kaliwatan, ug pinulongan, tadlas sa atong tibuok kalibutan nga Simbahan, salamat sa inyong buhing pagtuo, paglaum, ug gugmang putli sa tanan ninyong gibuhat. Salamat sa pagkahimong pundok nga puno sa pagpamatuod ug kasinatian sa gipahiuli nga ebanghelyo.

Minahal nga kaigsoonan, nahisakop kita sa usag usa. Mahimo kitang “mabugkos diha sa panaghiusa ug sa gugma”⁵ sa tanang butang ug sa tanang dapit.⁶ Samtang nagdapit si Ginoong Jesukristo sa matag usa kanato, bisan asa kita, bisan unsay atong mga kahimtang, palihug “Umari kamo ug makita ninyo.”⁷

Karong adlawa mapainubsanon nakong isaad ang tanang mga umoy ug galamhan sa akong kalag,⁸ bisan unsa man kini karon o mamahimo, sa akong Manluluwas, sa akong minahal nga si Susan ug sa among pamilya, sa akong Kaigsoonan, ug sa matag usa kaninyo, akong minahal nga kaigsoonan.

Ang tanang maayo ug mahangturon nakasentro sa buhi nga reyalidad sa Dios nga atong mahigumaong Amahan sa Kahangturan, ug sa Iyang Anak, si Jesukristo, ug sa Iyang Pag-ula, nga gisaksihan sa Espiritu Santo.⁹ Kini ang Dominggo sa Pasko sa Pagkabanhaw. Matinahuron akong mosaksi ug ligdong nga mopamatuod sa buhi nga Kristo—Siya kinsa “namatay, gilubong, ug mibangon sa ikatulong adlaw, ug mikayab ngadto sa langit.”¹⁰ Siya mao ang Alpha ug Omega¹¹—uban kanato sa sinugdanan, Siya magauban kanato hangtud sa katapusan.

Magpamatuod ko sa mga propeta sa ulahing mga adlaw, gikan ni Propeta Joseph Smith ngadto ni Presidente Russell M. Nelson, kinsa malipayon natong gipaluyohan. Sama sa pagkanta sa atong Primary nga mga bata, “Sunda’ng propeta; nasayud siya.”¹² Mosaksi ko nga, sama sa gipanagna sa balaang mga kasulatan, lakip sa Basahon ni Mormon: Lain nga Tugon ni Jesukristo, “ang gingharian sa Ginoo sa makausa pa gitukod na usab dinhi sa yuta, pagpangandam sa Ikaduhang Pag-anhi sa Mesiyas.”¹³ Sa balaan ug sagradong pangalan ni Jesukristo, amen.