Elder Juan Pablo Villar

General Authority Seventy

Ang pasiunang kasayuran ni Elder Juan Pablo Villar mahitungod sa Simbahan nahitabo sa Santiago, Chile, dihang ang kamaguwangan niyang igsoon nga si Ivan, mipahibalo sa pamilya nga nabunyagan siya nga walay pag-aprubar sa iyang mga ginikanan ug sa wala madugay miingon nga nagplano siyang magmisyon. Dihang gipangutana kon ngano, gipaambit ni Ivan ang iyang pagpamatuod ug ang tinguhang moserbisyo.

“Wala ko makasabut sa tanang kahulugan niadto,” maoy nahinumduman ni Elder Villar, nga kaniadto 17 ang edad. “Apan niadtong higayuna, nagtisok siya og binhi sa akong kasingkasing.”

Kadto nga liso nahatagan og kahigayunan nga motubo dihang gi-refer siya sa iyang igsoon ngadto sa mga misyonaryo. Atol sa una niyang leksyon, nadawat ni Elder Villar ang kaugalingon niyang pagpamatuod sa katinuod sa Basahon ni Mormon.

“Alang sa akong kaugalingon, wala na kinahanglana ang pagluhod ug pag-ampo, kay dihang gipaambit nila ang ilang pagpamatuod, nasayud ako sa akong kasingkasing nga tinuod kini,” miingon siya. “Dihang kadto akong nahibaloan, pwes ang tanan pang uban tinuod.”

Si Ivan, nagserbisyo sa silingan nga misyon, nakadawat siya og permisyon nga mobunyag ni Elder Villar niadtong 1988. Sa wala madugay, ang ilang mama ug ang laing igsoon nga lalaki, si Claudio, mipasakop usab sa Simbahan.

Paglabay sa usa ka tuig human sa iyang bunyag, nagsugod si Elder Villar sa pagserbisyo sa Chile Viña del Mar Mission, sinugdanan sa kinabuhi nga pagserbisyo nga naglakip sa pagserbisyo isip stake president, bishop, counselor sa bishopric, counselor sa Chile Santiago East Mission, ug Area Seventy sa South America South Area. Gipaluyohan siya niadtong Marso 31, 2018, isip General Authoriy Seventy.

Si Elder Villar natawo niadtong Septyembre 11, 1969, sa Valparaiso, Chile, kang Sergio Villar Vera ug Genoveva Saaverdra. Naminyo siya ni Carola Cristina Barrios niadtong Marso 31, 1994, sa Santiago Chile Temple. Mga ginikanan sila sa tulo ka anak.

Human makaangkon og bachelors degree sa social communications ug public relations ug sa master’s degree sa marketing, mitrabaho siya sa industriya sa pharmaceutical ug medical devices. Niadtong 2007 nagdugang siya og master’s degree sa business administration gikan sa Brigham Young University. Dayon mibalik siya sa Chile aron sa pagtrabaho sa Orica, usa ka service company sa pagmina, pinakalabing bag-o isip usa ka senior manager.