Elder José A. Teixeira

Kapangulohan sa Seventy

Si Elder José A. Teixeira nahinumdom og usa ka leksyon nga iyang nakat-unan isip usa ka batang lalaki sa Portugal. Panahon sa usa ka reunion sa pamilya, misibat siya aron mamasol. Gibati niya nga kinahanglan siyang mosulti sa iyang mga ginikanan kon asa siya moadto, apan nakahukom siya nga dili na lang tungod kay busy sila sa pakig-istorya.

Paglabay sa mga oras, nakit-an siya sa iyang nabalaka nga mga ginikanan sa daplin sa suba. Gikan niana nga kasinatian, nakat-on siya sa pagsunod dili lamang sa iyang mga ginikanan apan sa mga paghunghong usab sa Espiritu Santo.

Sukad niadto, nahimo na nga gawi ni Elder Teixeira ang pagpaminaw sa ligdong, hinagawhaw nga tingog. Siya ug ang iyang pamilya gipaila sa ebanghelyo niadtong 1976, human ang Portugal gibuksan sa misyonaryo nga buhat. Nabunyagan siya sa edad nga 16 ug wala madugay miserbisyo isip misyonaryo sa Lisbon Portugal Mission.

“Ang atong mga pagpili adunay dili ikalimud nga gahum sa pag-usab sa atong kinabuhi,” miingon si Elder Teixeira, nga gipaluyohan isip sakop sa Kapangulohan sa Seventy niadtong Marso 31, 2018. “Kini nga gasa usa ka talagsaong timailhan sa pagsalig diha kanato ug dungan niini ang usa ka gihambin nga personal nga responsibilidad sa paggamit sa maalamong paagi,” mitudlo siya sa Abril 2009 nga kinatibuk-ang komperensya.

Si Elder Teixeira nakaangkon og mga degree sa accounting ug business management ug mitrabaho sa Simbahan isip usa ka internasyonal nga controller. Nakaserbisyo usab siya sa Portuguese Air Force isip kabahin sa usa ka unit sa NATO. Atol niana nga panahon, gitawag siya isip national public affairs director alang sa Simbahan. Wala madugay human niana, nahimamat niya ang iyang asawa, si Maria Filomena Lopes Teles Grilo. Gikasal sila niadtong 1984 sa Bern Switzerland Temple ug ginikanan sila sa tulo ka anak.

Si José Augusto Teixeira da Silva natawo sa Vila Real, Portugal, niadtong Pebrero 24, 1961. Nakaserbisyo siya isip magtatambag sa bishopric, presidente sa district, presidente sa stake, Area Seventy, ug presidente sa Brazil São Paulo South Mission. Gipaluyohan siya isip General Authority Seventy niadtong Abril 5, 2008. Kasamtangan siyang nagserbisyo isip Presidente sa South America South Area ug magsugod sa iyang pagserbisyo sa Kapangulohan sa Seventy pagka-Agosto 1, 2018.

Labaw sa tanan, si Elder Teixeira mitambag kanato sa kinatibuk-ang komperensya sa Abril 2015 sa “[pagpalawom sa] atong panabut kabahin sa Manluluwas. … Dili nato ilangay-langay para ugma ang unsay atong mahimo karon. Karon mao ang panahon nga kinahanglan kitang moduol kang Kristo.”