Elder Ulisses Soares

Korum sa Napulog Duha ka mga Apostoles

Ang buhi nga mga propeta, lakip ni Presidente Russell M. Nelson, maoy usa ka timaan sa gugma sa Dios alang sa Iyang mga anak, mimatuod si Elder Ulisses Soares atol sa iyang unang pakigpulong sa kinatibuk-ang komperensya isip sakop sa Korum sa Napulog Duha ka mga Apostoles.

“Dili ba panalangin man ang pagkaadunay mga propeta, mga manalagna, ug mga tigpadayag dinhi sa yuta niining mga adlawa diin kita nagpuyo, kinsa nagtinguhang mahibalo sa kabubut-on sa Ginoo ug nagsunod niini? Makahupay ang pagkahibalo nga wala kita mag-inusara sa kalibutan, bisan sa mga hagit nga atong giatubang sa kinabuhi.”

Bisan og gibati niya ang kakulang alang sa iyang tawag isip usa ka Apostol, si Elder Soares miingon, ang kang Presidente Nelson nga “mga pulong ug ang iyang malumo nga pagtan-aw kanako dihang gihatag niya kini nga responsibilidad naghatag kanako og pagbati sa gakos sa Manluluwas.”

Uban sa pagpaluyo kaniya niadtong Marso 31, 2018, si Elder Soares nahimong pinakaunang Apostol sa Simbahan nga gikan sa Latin America. Sa wala pa ang iyang tawag, usa siya ka sakop sa Kapangulohan sa Seventy sukad niadtong Enero 6, 2013, ug nagserbisyo sa usa ka espesyal nga buluhaton alang sa Presiding Bishopric sa Siyudad sa Salt Lake.

Si Elder Soares gitawag isip General Authority Seventy niadtong Abril 2, 2005. Niana nga kapasidad, miserbisyo siya isip magtatambag sa Africa Southeast ug Brazil South nga mga Area ug isip Presidente sa Brazil Area.

Si Elder Soares nakaserbisyo sa daghan pa nga mga calling sa Simbahan. Nahimo siyang usa ka full-time nga misyonaryo sa Brazil Rio de Janeiro Mission, presidente sa elders quorum, magtatambag sa bishopric, high councilor, stake executive secretary, regional welfare agent, presidente sa stake, ug presidente sa Portugal Porto Mission gikan sa 2000 hangtud sa 2003.

Usa sa iyang labing importante nga mga calling miabut sa edad nga 15, sa dihang gihangyo siya sa iyang bishop nga temporaryong motudlo og klase sa Sunday School alang sa kabatan-onan. Agig pagpangandam alang sa usa ka leksyon mahitungod sa pag-angkon og pagpamatuod, ang batan-ong si Ulisses nakahukom nga mag-ampo alang sa kompirmasyon sa kamatuoran sa ebanghelyo.

“Sa dihang ako miluhod ug nangutana sa Ginoo kon ang ebanghelyo tinuod,” mihinumdom siya, “dihay miabut sa akong kasingkasing nga maanindot kaayo nga pagbati, usa ka gamay nga tingog nga mimatuod kanako nga kinahanglan ko nga mopadayon niini. Kusog kaayo kini nga ako dili gayud makasulti nga ako wala masayud.”

Niadtong 1985 nakadawat siya og bachelor of arts degree sa accounting ug economics gikan sa School of Economic Science sa São Paulo Pontifical Catholic University. Human makadawat og master of business administration degree, mitrabaho siya isip usa ka accountant ug auditor alang sa multinational nga mga korporasyon sa Brazil ug isip direktor sa temporal affairs sa area office sa Simbahan sa São Paulo.

Si Ulisses Soares natawo sa São Paulo, Brazil, niadtong Oktubre 2, 1958. Naminyo siya kang Rosana Fernandes niadtong Oktubre 1982. Sa iyang pakigpulong sa kinatibuk-ang komperensya, gipasidunggan ni Elder Soares ang iyang asawa tungod sa iyang gugma ug suporta.

“Ehemplo siya sa kamaayo, gugma, ug hingpit nga debosyon sa Ginoo ug ngari kanako ug sa akong pamilya,” lakip sa tulo ka mga anak sa magtiayon ug sa tulo ka mga apo, miingon siya sa iyang pakigpulong sa komperensya. “Gimahal nako siya sa matag tipik sa akong kasingkasing, ug mapasalamaton ako sa positibo niyang impluwensya kanamo.”