Elder Jack N. Gerard

General Authority Seventy

Sa bata pa, momata si Elder Jack N. Gerard kada adlaw og alas 5:00 sa buntag aron motabang sa pag-atiman sa gipanag-iya sa pamilya nga gatasan sa baka. Ang pagdako sa gamayng umahan sa komunidad duol sa Mud Lake, Idaho, USA, nagtudlo kaniya dili lang sa pagkugi og trabaho ug pagkahimong responsable apan sa pag-ila usab sa bili sa tanang indibidwal isip mga anak sa Dios.

“Ang tanan adunay buluhaton ug ang tanan ania dinhi sa usa ka katuyoan, bisan unsay kahimtang o kainila sa kinabuhi,” miingon si Gerard, kinsa gipaluyohan niadtong Marso 31, 2018, isip General Authority Seventy. Kana nga leksyon usa ka gasa sa tibuok niyang kinabuhi.

Ang iyang panarbaho, nga naglakip sa prominenting mga buluhaton sa pagpangulo alang sa daghang institusyon—sama sa National Mining Association, sa America Chemistry Council, ug sa bag-o lang, sa American Petroleum Institute—naghatag kaniya sa mga oportunidad nga ikauban ang mga tawo gikan sa tanang matang sa kinabuhi.

Si Elder Gerard natawo niadtong 1957 kang James ug Cecil Gasser Gerard. Human makaserbisyo sa Sydney Australia Mission, mieskwela si Elder Gerard sa University of Idaho, diin nadawat niya ang internship ug dayon full-time nga posisyon sa pagkakawani sa usa ka congressman sa Idaho.

Samtang nagtrabaho sa Washington, D.C., nakatagbo niya si Claudette Neff, nga nagtrabaho isip staff assistant sa usa ka senador sa Utah. “Misanag kaniya ang kahayag sa ebanghelyo,” miingon si Elder Gerard sa ilang panagtagbo. Naminyo silang duha niadtong Abril 4, 1984, sa Salt Lake Temple. Duna silay walo ka anak ug upat ka apo.

Nakadawat si Elder Gerard og bachelor of arts degree sa political science ug juris doctor degree gikan sa George Washington University.

Nakaserbisyo si Elder Gerard sa pagka-bishop, stake president, Area Seventy, magtutudlo sa Doktrina sa Ebanghelyo, ug presidente sa Sunday School.

Miingon si Elder Gerard nga siya ug ang iyang asawa parehas og tinguha nga mobuhat sa kabubut-on sa Ginoo. “Isip mga huyang nga mortal, mapasaligon kami sa bisan unsay ipabuhat kanamo sa Ginoo, ug nagdala kini kanamo sa pagpaubos ug sa dungog … nga among mapahinungod ang among panahon ug paningkamot sa buhat sa Ginoo.”