Elder Gerrit W. Gong

Korum sa Napulog Duha ka mga Apostoles

“Niining Dominggo sa Pasko sa Pagkabanhaw, malipayon akong moawit, ‘Alleluia,’” misulti si Elder Gerrit W. Gong sa iyang unang pakigpulong sa kinatibuk-ang komperensya isip sakop sa Korum sa Napulog Duha ka mga Apostoles. “Ang kanta sa matubsanong gugma sa atong nabanhaw nga Manluluwas nagsaulog sa panag-uyon sa mga pakigsaad … ug sa Pag-ula ni Jesukristo.”

Si Elder Gong migahin og tibuok kinabuhi nga pagmaya niana nga panag-uyon. Nasayud siya nga ang gahum sa atong mga pakigsaad, inubanan sa Pag-ula sa Manluluwas, “makapaarang ug makapaligdong” kanato. “Magkauban, kini mopatam-is, mopreserbar, mobalaan, [ug] motubos,” miingon siya.

Sa usa ka kasal sa templo usa niaana ka adlaw, ang gahum sa mga pakigsaad, inubanan sa Pag-ula, nakita diha sa mga salamin sa templo. Gihunahuna niya ang mga henerasyon sa iyang pamilya nga magpadayon sa kahangturan, gikan sa pinakakaraan niyang paryente nga nahibaloan, si First Dragon Gong, nga natawo sa AD 837, tadlas sa 36 ka henerasyon ngadto sa iyang kaugalingong mga apo ug magpadayon sa duha ka direksyon.

“Nagsugod ako sa pagsabut sa akong asawa ug ako isip mga anak sa among mga ginikanan ug mga ginikanan sa among mga anak, isip mga apo sa among mga apohan ug mga apohan sa among mga apo,” miingon siya. “Ang mahinungdanong leksyon sa mortalidad hinay-hinay nga mituhop sa among mga kalag samtang kami nagkat-on ug nagtudlo sa mahangturong mga tahas, lakip na isip anak ug ginikanan, ginikanan ug anak.”

Si Elder Gong miserbisyo isip usa ka General Authority Seventy sukad sa Abril 2010 ug isip sakop sa Kapangulohan sa Seventy sukad sa Oktubre 2015. Gipaluyohan siya isip sakop sa Korum sa Napulog Duha ka mga Apostoles niadtong Marso 31, 2018, nga iyang gihulagway isip usa ka “sagradong tawag gikan sa Ginoo nga nakasurprisa kaayo kanako.”

Gikan sa 2011 hangtud sa 2015, si Elder Gong miserbisyo isip sakop sa Asia Area Presidency, nga mitapos niana nga pagserbisyo isip Presidente sa Area. Miserbisyo siya isip full-time nga misyonaryo sa Taiwan Taipei Mission, high councilor, high priests group leader, presidente sa Sunday School sa stake, seminary teacher, bishop, mission president sa stake, presidente sa stake, ug Area Seventy.

Nakaangkon si Elder Gong og bachelor of arts degree sa Asian Studies ug University Studies gikan sa Brigham Young University niadtong 1977. Niadtong 1979 nakadawat siya og master of philosophy degree ug niadtong 1981 usa ka doctorate sa international relations gikan sa Oxford University, diin siya usa ka Rhodes Scholar. Niadtong 1985 miserbisyo siya isip special assistant sa undersecretary of state sa U.S. State Department, ug pagka-1987 isip special assistant sa US ambassador sa Beijing, China. Sugod niadtong 1989, miserbisyo siya sa pipila ka mga posisyon sa Center for Strategic and International Studies sa Washington, D.C. Siya ang assistant sa presidente alang sa pagplano ug pag-assess diha sa Brigham Young University hangtud sa Abril 2010.

Ang mga apohan ni Elder Gong namalhin sa Estados Unidos gikan sa China. Si Elder Gong natawo sa Siyudad sa Redwood, California, USA, niadtong 1953. Naminyo siya kang Susan Lindsay niadtong Enero 1980, ug mga ginikanan sila sa upat ka anak ug adunay tulo ka apo.

“Ang tanang maayo ug mahangturon nakasentro sa buhi nga reyalidad sa Dios nga atong mahigugmaong Amahan sa Kahangturan, ug sa Iyang Anak, si Jesukristo, ug sa Iyang Pag-ula, nga gisaksihan sa Espiritu Santo,” miingon si Elder Gong niini nga komperensya. “Matinahuron akong mosaksi ug ligdong nga mopamatuod sa buhi nga Kristo—Siya … uban kanato sa sinugdanan, Siya magauban kanato hangtud sa katapusan.”