Elder Carlos A. Godoy

Kapangulohan sa Seventy

Sa ulahing bahin sa mga 1980, si Elder Carlos A. Godoy bag-o lang na-release isip bishop. Siya usab migradwar sa kolehiyo, nagtrabaho sa usa ka malampuson nga kompaniya, ug nagtuo nga dili na mahimong mas maayo pa ang kinabuhi—hangtud nga misibita ang usa ka higala.

Ang higala mipahalipay kaniya apan dayon dunay gipangutana nga nakahimo niyang dili komportable: “Kon padayon kang magpakabuhi sama sa imong pagpakabuhi karon, matuman kaha ang mga panalangin nga gisaad diha sa imong patriyarkal nga panalangin?”

Nakaamgo si Elder Godoy nga kinahanglan niyang mohimo og mga kausaban kon gusto niyang madawat ang tanan nga gisaad kaniya nga mga panalangin. Bisan pa sa iyang pagkakontento, nakahukom siya nga mokuha og master’s degree. Miundang siya sa iyang trabaho, gibaligya ang tanan niyang gipanag-iya, ug, uban sa iyang pamilya, mibiya sa kapamilyar sa Brazil aron moeskwela sa Estados unidos.

Si Elder Godoy, gitawag ngadto sa Kapangulohan sa Seventy niadtong Marso 31, 2018, misulti nga kini nga kasinatian mitudlo kaniya og daghan mahitungod sa pagsalig sa plano sa Ginoo ug sa kaandam sa pagbuhat sa mga butang nga dili komportable kaniya.

“Nasayud ako nga ang Ginoo adunay plano kanato niining kinabuhia,” mipamatuod siya niadtong Oktubre 2014 nga kinatibuk-ang komperensya. “Nakaila siya kanato. Nahibalo siya unsay pinakamaayo kanato. Tungod kay hapsay ra ang mga butang wala kana magpasabut nga dili na lang kita maghunahuna nga basin duna pay butang nga mas maayo.”

Si Elder Godoy gipaluyohan isip General Authority Seventy niadtong Abril 5, 2008. Kasamtangan siyang nagserbisyo isip Presidente sa South America Northwest Area ug mosugod sa iyang tawag diha sa Kapangulohan sa Seventy pagka-Agosto 1, 2018.

Sa wala pa ang iyang tawag ngadto sa Seventy, si Elder Godoy nagtrabaho isip human resources manager sa duha ka dagkong korporasyon sa wala pa sugdi ang iyang kaugalingong consulting company. Nakadawat siya og bachelor’s degree sa economics ug political science gikan sa São Paulo Pontifical Catholic University niadtong 1987 ug master’s degree sa organizational behavior gikan sa Brigham Young University niadtong 1994.

Si Elder Godoy nakaserbisyo isip full-time nga misyonaryo sa Brazil São Paulo South Mission, bishop, high councilor, regional welfare agent, Area Seventy, ug presidente sa Brazil Belém Mission.

Natawo siya sa Porto Alegre, Brazil, niadtong Pebrero 4, 1961. Naminyo siya kang Mônica Soares Brandao niadtong Marso 1984, ug aduna silay upat ka anak.