Bonnie H. Cordon

Kinatibuk-ang Presidente sa Young Women

Ang gipangga kaayo nga kasulatan ni Sister Bonnie H. Cordon makita sa Doktrina ug mga Pakigsaad 123:17: “Kita magmalipayon sa pagbuhat sa tanan nga mga butang nga ubos sa atong gahum; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag.”

Alang niya kini nga bersikulo naghulagway og mga leksyon nga iyang nakat-unan sa tibuok niyang kinabuhi. “Makahimo kita og lisud nga mga butang, apan mahimo usab nato kini diha sa kalipay,” miingon si Sister Cordon, kinsa gipaluyohan niadtong Marso 31, 2018, isip ang bag-ong Kinatibuk-ang Pangulo sa Young Women.

Kana nga kahibalo anam-anam niyang nakat-unan diha kaniya atol sa “maayo kaayo nga kahimtang sa bata pa” nagtrabaho sa gamay nga umahan didto sa habagatang-silangan sa Idaho ug dayon samtang siya nanglimbasug sa pagkat-on og bag-ong pinulongan isip misyonaryo didto sa Portugal. Usa usab kadto ka mensahe nga kanunay niyang gibalik-balik samtang nagserbisyo siya uban sa iyang bana samtang nagdumala siya sa Brazil Curitiba Mission. Ug mao kini ang iyang plano nga ipaambit karon sa mga young women sa tibuok kalilbutan.

Ang mga young women karon, miingon siya, gihangyo sa paglambo, ug palihokon ang buhat sa Ginoo nga magpadayon. “Ug nga makahimo kita niini,” dugang pa niya.

Si Bonnie Hillam Cordon natawo niadtong Marso 11, 1964, ngadto nilang Harold ug Carol Rasmussen Hillam sa Idaho Falls, Idaho, USA. Human sa iyang misyon nahuman niya ang kurso sa bachelor of education sa Brigham Young University, diin nakaila niya si Derek Lane Cordon. Naminyo sila niadtong Abril 25, 1986, sa Salt Lake Temple. Sila dunay upat ka anak ug siyam ka apo nga mga lalaki.

Ang iyang tibuok kinabuhi nga pagserbisyo sa Simbahan naglakip sa panahon isip usa ka lider sa nursery ug magtutudlo sa seminary. Sa wala pa ang iyang tawag duha ka tuig ang milabay sa pagserbisyo isip magtatambag diha sa Kinatibuk-ang Kapangulohan sa Primary, si Sister Cordon ganahan nga nagserbisyo isip usa ka presidente sa Young Women sa stake. Bisan og gi-release na gikan niana nga calling, “Wala gayud ko mihunong sa pag-ampo alang sa mga batan-ong mga babaye,” miingon siya.

Ang mensahe nga matinguhaon kaayo siyang mopaambit sa young women sa tibuok kalibutan mao nga siya nahigugma kanila ug, labaw sa tanan, nga ang Dios nahigugma kanila.