Sa Pulpito

Nagkakaisa sa Paggawa ng Kabutihan

Ni Emma Hale Smith

Ang seryeng ito ay nagtatampok sa buhay ng matatapat na kababaihan at sa kanilang mensahe, na sinipi mula sa aklat na At the Pulpit: 185 Years of Discourses by Latter-day Saint Women (2017). Ang mga piling kabanata ay makukuha sa churchhistorianspress.org/at-the-pulpit.

Tungkol kay Sister Smith

Nakilala ni Emma Hale Smith (1804–79) ang kanyang asawang si Joseph nang manirahan siya sa sakahan ng kanyang mga magulang sa Harmony, Pennsylvania, USA. Ikinasal sila noong Enero 18, 1827. Pinuri ng ina ni Joseph na si Lucy Mack Smith si Emma: “Hindi pa ako nakakita ng isang babae sa buhay ko na titiisin ang lahat ng uri ng pagod at hirap … taglay ang matatag na tapang, sigasig, at pagtitiis.”¹ Nagtrabaho sandali si Emma bilang eskriba sa pagsasalin ng Aklat ni Mormon. Naging bukas ang kanyang tahanan para sa mga maysakit, naulila, at iba pang mga bisita.

Noong Hulyo 1830, idinikta ni Joseph Smith ang isang paghahayag para kay Emma, na kilala ngayon bilang Doktrina at mga Tipan 25. Nahalal siyang pangulo ng Female Relief Society of Nauvoo noong Marso 17, 1842. Bagama’t labindalawang beses lang pinulong ni Emma ang samahan noong 1842 at apat na beses noong Marso 1844, naging mahalaga ang kanyang pamumuno sa paghubog sa organisasyon.

Ang Nauvoo Relief Society ay pinatakbo sa isang discussion format sa halip na sa mga pormal na aralin. Ang mga sinabi ni Emma, na nakasipi rito, ay nagpapakita ng kanyang pamumuno.² Nanatili sa isipan ni Emma ang kanyang espirituwal na awtoridad, at pinayuhan ang mga babae na magsisi habang pinalalakas nila ang isa’t isa at minamahal ang kanilang kapwa. Naghikayat siya ng pagkakaisa at tinuruan niya ang kababaihan na mahabag at pangalagaan ang mga maralita.

Hangaring Gumawa ng Kabutihan

[Marso 17, 1842]

“Sabi ni Pangulong³ Emma Smith may gagawin kaming hindi pangkaraniwan. Kapag nasadlak ang isang bangka sa mababaw at mabatong bahagi ng ilog na sakay ang napakaraming Mormon, ituturing nating paghingi iyan ng saklolo. Umaasa tayong magkakaroon ng mga pambihirang pagkakataon at mahihirap na gawain. …

“Nagsalita [siya] tungkol sa layunin ng samahan, sa mga tungkulin nito sa iba, gayundin sa mga kaukulang tungkulin nito sa bawat isa, gaya ng, hanapin at bigyang-ginhawa ang mga nagdurusa, na bawat miyembro ay dapat magkaroon ng ambisyong gumawa ng kabutihan, … [at] tapat na makitungo sa isa’t isa.”

Noong Hulyo at Agosto ng 1839, naging epidemya sa bayan ng Commerce (kalaunan ay ang Nauvoo), Illinois, ang malaria. Sa painting na ito, si Emma ay napalilibutan ng mga biktima ng malaria, at nagbibigay ng tulong at ginhawa.

Emma Smith, the Elect Lady, ni Theodore S. Gorka; kuwadro mula sa Getty Images

Magkaisa

[Marso 24, 1842]

“Tumayo si President E. Smith … at sinabi na ang mga planong magkaroon ng pagkakaisa sa samahang ito ay kailangang gawin nang buong ingat. Na dapat ay nasa ganap na pakikipagkapatiran ang bawat miyembro. Bilang isang samahan, umasa [siya] na aalisin nila sa kanilang sarili ang lahat ng inggit at masamang damdamin sa isa’t isa, kung mayroon man. …

“… Hindi kailangang mag-atubiling magtanong ang sinuman tungkol sa samahang ito. Walang pribado rito. Ang mga layunin nito ay puro kabaitan … , ang mga layunin nito ay mapagkawanggawa: walang maaaring tumutol sa pagsasabi ng mabuti, at pagpigil sa masama. Umasa siya na madarama ng lahat na obligasyon nilang sundin ang patakarang ito. … Tungkulin ng bawat tao na alamin ang kundisyon ng mga maralita at ipakita ang kanilang tunay na kalagayan.”

Magsimula sa Tahanan

[Abril 14, 1842]

“Hangad ni Pangulong E. Smith na gumawa ng kabutihan. Ninais na lahat ng miyembro ng samahang ito ay tumulong sa kanya. Sinabi na kailangang magsimula sa tahanan, na pawiin ang lahat ng kasamaan sa ating puso. … Ipinatupad ang pangangailangang mamuhay sa paraang tanggap ng Diyos.”

Magsisi at Talikuran

[Mayo 19, 1842]

“Nagpatuloy si Mrs. President sa pagpapayo sa lahat ng nagkasala na magsisi at talikuran ang kanilang mga kasalanan. Sinabi na ang mga puwersa ni Satanas ay laban sa Simbahang ito.”

Mamuhay nang Tama sa Harap ng Diyos

[Hunyo 23, 1842]

“Sabi ni Mrs. President na nagalak daw siyang makita ang tumitinding pagkakaisa ng samahan. Umasa na mamuhay tayo nang matwid sa harap ng Diyos, sa ating sarili, at sa harap ng mundo. … Sinabi na wala tayong gagawin kundi matakot sa Diyos at sundin ang mga kautusan, at sa paggawa nito ay uunlad tayo.”

Palakasin ang Isa’t Isa

[Marso 16, 1844]

“Nagsalita si Mrs. President … sa pulong tungkol sa pangangailangang magkaisa tayo at palakasin ang isa’t isa para marami tayong magawang kabutihan sa mga maralita. … Kailangan nating mahalin ang ating kapwa para maprotektahan ang mga magsisisi at hindi na magkasala. … Pinayuhan niya ang lahat na mamuhay alinsunod sa mga turo sa Aklat ni Mormon at sa Doktrina at mga Tipan.”

Mga Tala

1. “Lucy Mack Smith, History, 1845,” 190, josephsmithpapers.org.

2. Sinipi mula sa Nauvoo Relief Society Minute Book, Mar. 17, 1842–Mar. 16, 1844, 8–[126]; pinagpare-pareho ang pagpapalaki ng mga letra at pagbabantas.

3. Ang mga babaeng lider noong ikalabingsiyam na siglo ay madalas maghawak ng iba’t ibang titulo. Sa Nauvoo Minutes, para matukoy siya sa kanyang asawa, si Emma ay tinawag na Presidentess, President Emma Smith, Mrs. President, at President Smith.