Savali a Taitai o le Eria
O Perofeta ma Faamanuiaga o le Mulimuli ia Latou Fautuaga
O se perofeta o se alii ua valaauina e le Atua ma e na te saunoa mai e fai ma sui o le Atua. O lana matafaioi o le faaali mai o le finagalo ma le natura moni o le Atua i fanau uma a tagata. Ae o lana matafaioi paia o le molimau mai ia Keriso. Talu mai le amataga o taimi, ua molimau mai pea lava pea perofeta uma e uiga ia Keriso. E faaalia mai e le Alii Ana mea lilo i Ana perofeta. O le mea lea, Na fausia ai Lana Ekalesia i luga o le faavae o aposetolo ma perofeta.
Ou te fiafia lava e mafaufau e uiga i le tala o le fafine ua oti lana tane i Sarefata. Ina ua talosaga atu le perofeta o Elia ia te ia mo se vai e inu ai, sa ia toe fai atu foi ia te ia e aumai se fasi areto sei ona ‘ai ai. Sa faailoa atu e le fafine ua oti lana tane ia Elia ua na o le luutaga o falaoa ma sina suauu itiiti o totoe, na pau lea o le mea sa ia te ia. Na lava lea mo se meaai mulimuli mo ia ma lana tama ona la oti ai lea.
Na fai atu Elia e na te faia se potoi areto i ana mea na totoe e pei ona ia fuafuaina ae sa ia fai atu ia te ia e fafaga muamua o ia ona ia kuka ai lea mo ia ma lana tama.
Sa faaali atu e Elia ia te ia le mana o le Atua; sa ia tuuina atu se vavega ma se faamanuiaga ina ua ia faapea atu, “Aua ua faapea ona fetalai mai o Ieova le Atua o Isaraelu, E le uma le kate falaoa, e le faaitiitia le suauu i le fagu, seia oo i le aso e foaiina mai ai e Ieova le ua i le laueleele.” (1 Tupu 17:14).
“Sa le uma le falaoa i le kate, sa le faaitiitia foi le suauu i le fagu, e tusa ma le afioga a Ieova na fai atu ai Elia” (1 Tupu 17:16).
Na tupu uma nei mea ona o le faatuatua ma le usitai o le fafine ua oti lana tane ina ua ia mulimuli i afioga a Ieova e ala atu ia Elia. Na poloai mai le Alii: “pe i lo’u lava leo po o i le leo o a’u auauna, ua tutusa lava” (Mataupu Faavae ma Feagaiga 1:38).
O se tasi o faamanuiaga o le toefuataiga i lenei tisipenisione mulimuli ma i le atoaga o taimi, o le valaauina lea e le Alii o Iosefa Samita o se perofeta silisili i lenei tisipenisione mulimuli. Talu mai lena taimi, ua faaauau pea ona faaaoga e perofeta ki o le perisitua e taitai ai Le Ekalesia a Iesu Keriso o le Au Paia o Aso e Gata Ai.
O Spencer W. Kimball o se perofeta muamua lea sa ou feiloai patino lava i ai ina ua ia asiasi atu i Toga i le 1976, ao ou auauna atu o se faifeautalai faamisiona. O lena manatuaga na foliga mai ia te a’u e pei o ananafi lea na tupu ai. Na pupula sa’o mai lava Peresitene Kimball i o’u mata ma fesili lemu mai ia te a’u i lona leo fa, “E te alofa i lau soa?” Sa vave le tata o lo’u fatu ma sa ou le mautonu, ina ua ou tali atu na ou fai atu, “Ioe.”
Na faamalosia la’u molimau ona ua ou iloa o Peresitene Kimball sa avea ma se perofeta a le Alii.
Tatou te faafetai mo lo tatou perofeta pele soifua, o Peresitene Russell M. Nelson. Na ia tuuina mai ni valaaulia se fa i tamaitai o le Ekalesia i le Konafesi Aoao ia Oketopa 2018. O le tali o le faitau lea o le Tusi a Mamona ma ia faamaeaina ao lei faaiuina le tausaga (2018). E pei ona fetalai atu Ieova i le fafine ua oti lana tane o Sarefata e ala atu ia Elia, ua toe fetalai mai le Alii e ala mai ia Peresitene Nelson ma faapea mai, “Ao outou suesue ma le agaga tatalo, ou te folafola atu o le a matala le lagi mo outou. O le a faamanuiaina outou e le Alii i ni musumusuga ma faaaliga faateleina. Ma o le a amata ona tutupu suiga, e oo lava i vavega.”
Ou te molimau atu ao tatou mulimuli i le perofeta soifua, o le a faamanuiaina i tatou e le Alii. O Iesu Keriso o lo tatou Faaola ma lo tatou Togiola.