Itulau o le lotoifale
Savali Faalilolilo o le Faamoemoe i le Malumalu
Sa na o ni nai aso ae ma te lei iloaina ua maliu o ia . . .
I ni nai aso na muamua atu, na lelei lava mea uma. Sa ma i ai ma lo’u toalua o Leroy i le malumalu; sa ma nonofo filemu i le potu selesitila ma uu lima ae faafuasei ona faatumuina i ma’ua uma i le agaga. Na ma taulai fiafia atu i le fanauina o le ma tama muamua. Sa ou fai atu ia Leroy e tatalo mo i ma’ua ona sa ou lagonaina le matua lofituina. E le mafai ona ou faailoa manino atu le malosi o le agaga i le taimi o lena tatalo matagofie.
I le faaiuga, na fusimau atu a’u e lo’u toalua ma fesili mai ia te a’u pe na ou lagonaina se mea. Ou te lei lagonaina se mea. Sa ou fesili atu po o le a le uiga o lana tala; na fai mai o ia na ia faalogo i se leo lemu o fai mai, “E alofa o ia ia te oe ma e na te misia oe.”
E ui na ma iloaina na ma faalogoina le agaga i lena taimi filemu, ae ma te lei iloa po o le a le uiga o le savali. I nai aso mulimuli ane sa ou lagonaina ai se tiga matautia. Sa matou faatopetope atu i le foma’i. Sa ma matuai fefefe lava. Na siaki e le foma’i le tata o le fatu o le ma pepe . . . ae sa leai se tata.
Na le mafai e upu ona faamatalaina le tiga matuitui na ma lagonaina. Na ma iloaina i nai aso na muamua atu ua maliu le ma pepe, e tusa o le taimi tonu lava lea na ma lagonaina ai le faatumulia i le agaga i totonu o le malumalu. Mulimuli ane, na ma malamalama i le tagata na i ai o “ia”. O le ma pepe teine faapelepele lea na faatofa mai.
O aafiaga o lenei mea na tupu na mamafa lava i lo’u loto. Na ou lagona le tuuatoatasi, lotovaivai, ma le atuatuvale. Na i ai ni aso sa ou le fia vaai ai pe talanoa i se tagata. Na ou vavaeeseina a’u. Na ou uunaiaese atu lo’u toalua ma lo’u aiga ma ua ou le toe alu e faigaluega. Sa ou ita ona o se tasi na pele ia te a’u ua aveeseina atu mai ia te a’u ma o le tele o taimi ou te tuufesili ai i le Tama Faalelagi pe aisea ua tupu ai lenei mea, pe Na te le alofa ea ia i ma’ua?
O le mea moni ou te lei fia iloa le mafuaaga ua ma oo ai i lenei tofotofoga. Na ou ita. Na aapa mai tagata uma na siomiaina a’u ina ia fesoasoani mai ia te a’u ae peitai, i lo’u faavauvau, sa ou faafaigataina mo i latou, ma mo a’u foi.
Sa avea ma se faagasologa umi ma faigata i le filemu. Peitai, i le aluga o taimi o le malamalama e faavavau aiga na aumaia ia te a’u le malosi na ou manaomia e laa ai i luma. Na avea Leroy ma o’u papa. Sa ia faamalosiau mai ia te a’u ina ia agai i luma, e oo lava i nai mea faigofie pei o le auai i le lotu ma le faataunuu o lo’u valaauga. Na ia taitai e ala i le faataitaiga ma sa ou maua le malosi sili i le mataituina o ia.
Sa ou faamaualaloina a’u lava i le aluga o taimi ma ou te lei toe fesili, “pe aisea?”
O se tofotofoga sili lea mo lo matou aiga, ae ua ou iloa nei o lo matou tofotofoga lea matou te vaai moni ai ma lagonaina le alofa o lo tatou Faaola, o Iesu Keriso.
E ala i le tatalo ma le anapogi, na liua ai lo ma faafitauli i se faamanuiaga o le faatuatua ma le molimau.
Na aoaoina a’u i le ata o le faaolataga ao laitiiti ma ou te talitonu i le moni. Ae o lenei tofotofoga ua ou maua ai se molimau malosi ma le lemafaagaeetia, ma se alofa loloto mo le Faaola ma Lana fuafuaga o le fiafia.
Sa ma i atunuu mamao i le taimi na maliu ai le ma pepe teine. O le loto nutimomoia i le tanuina o ia i se nofoaga e mamao tele mai le aiga sa avea ma se mea matautia. Ae peitai o feagaiga na ma osia ma Leroy i le malumalu, i le taimi na ma faamau ai, na sili atu ona suamalie ia te a’u nai lo se isi lava mea. Na ou lagona e ui ua mamaoese atu lona tino, o i matou o se aiga e faavavau. O le tausiaina o a tatou feagaiga o lona uiga e le mafai e le oti ona tuueseeseina i tatou e faavavau.
E ono masina talu ona maliu le ma pepe ae faamanuiaina i ma’ua i le iloaina ua ou toe maitaga. Ua tasi nei le tausaga o le ma pepe teine ma o ia o se puna faifaipea o le olioli i o ma’ua olaga.
Ou te talitonu afai matou te faaauau pea ona ola ai i le talalelei a Iesu Keriso ma tumau i le ala o le feagaiga, o le a matou toe faatasi ma le ma pepe teine, lea na faaigoaina ia Pearl Suvania Sina-Lewa Toleafoa.
E tele naua le olioli ma le filemu lea e oo mai i le iloaina e faavavau aiga.