Itulau o le lotoifale
O se suiga tele o le loto
I le na o le 10 aso o le mulimuli ai i le aufono musuia a le perofeta e mafai ona i ai ni aafiaga umi o le olaga.
I le gasologa o le Konafesi Aoao ia Oketopa 2018, na valaaulia ai e Peresitene Russell M. Nelson tamaitai o le Ekalesia ia auai i se anapogi e 10 aso mai ala faasalalau faaagafesootai. Ua uma ona ou faamaeaina le anapogi e 7-aso mai ala faasalalau faaagefesootai faatasi ma le autalavou peitai na ou iloa na ou faaaluina le taimi e tulimatai atu ai ma le naunautai i le faaiuga nai lo le aoaoina mai ai o se mea. O le valaauliaina e toe auai, o le taimi lea i le avea ai ma se uso o le aualofa, o le avanoa lona lua lea na ou manaomia ai se tali i se tatalo.
“Ou te valaaulia oe ia auai i se anapogi 10 aso mai ala faasalalau faaagafesootai ma mai soo se isi lava ala faasalalau na te aumaia ni mafaufauga lē lelei ma lē mama i lou mafaufau. Tatalo ia iloa po o a faatosinaga e aveese i le taimi o lau anapogi. O le aafiaga o lau anapogi 10 aso e mafai ona faateia ai oe. O le a se mea e te matauina i le mavae ai o se malologa mai vaaiga o le lalolagi ia na faamanualia ai lou agaga? O i ai ea se suiga i le mea ua e manao nei e faaalu ai lou taimi ma le malosi? Ua suia ea se tasi o au faamuamua—e tusa lava pe na o sina mea? Ou te uunaia oe e faamaumau ma mulimuli i uunaiga taitasi” (Peresitene Russell M. Nelson, Konafesi Aoao ia Oketopa 2018, sauniga Aoao a tamaitai; “Auai o Tuafafine i le Faapotopotoina o Isaraelu”, O Le Liahona, Novema 2018, 69).
Ou te iloa o lenei apoapoaiga na musuia mo tamaitai uma i le ekalesia ae a’o o’u faalogo atu i le siufofoga o le perofeta, na ou lagona le pai mai o se feau faapitoa ma patino i lo’u loto mai le Agaga Paia. “Linda, tatalo ia iloa po o a aafiaga le lelei o loo taofia mai oe mai le auauna atu i isi.”
“O le aafiaga o lau anapogi 10-aso e ono faateia ai oe.”
Na ou maofa moni lava ao tatala e le agaga o’u mata i le tele o mea ou te lei mafaufau muamua i ai e aofia ai na faatosinaga ia na aafia ai lo’u gafatia e auauna atu. Na ou iloaina lo’u faamasinoina o tagata e tusa ai ma a latou ala faasalalau faaagafesootai. Ou te talitonu o le iloaina o lo latou tulaga o le iloaina lelei lea o i latou ma sa faigofie ona ou taliaina o’u manatu sese e uiga ia i latou. Na ou iloaina lo’u sailiili masei e uiga i isi po o ni mea e talanoa ai e uiga ia i latou. E ui na latou i ai i la’u lisi o ‘uo’ ae sa i ai taimi sa ou vaai ai ia i latou ua na o se toefaafouga o se tulaga po o se faaupuga.
Na ou lagona se manao ia suia le tuputupu ae i lo’u loto. Sa ou matuai manao lava ia malamalama i le uiga moni o le auauna atu. Na ou manao ia avea le auauna atu o se mea masani e oo mai ia te a’u.
Na faaaogaina e ala faasalalau faaagafesootai le tele o lo’u olaga. E faaaoga e tagata ala faasalalau faaagafesootai mo le tele o mafuaaga ma ou te le faamasino peitai mo a’u lava ia, i le tele o aso, o le matamata i la’u ala faasalalau faaagafesootai sa avea ma se mea muamua ma le mea mulimuli sa ou faia. Sa ou tauamiotonuina lenei sona faaaogaina i lo’u fai ifo ia te a’u e na o lo’u taumafai lava e fesootai i aiga ma uo o i nuu mamao ma ou te le’i manao e misi a latou savali. Na ou taumafai foi e tauina ia te a’u lava ia faapea o savali na musuiaina a’u ma sa ou aoaoina le tele o mea mai saunoaga musuia i luga o le initoneti. Sa ou tauamiotonuina musika sa ou faalogologo i ai e ui sa le’i lelei ia savali i taimi uma. O le auai i le anapogi na mafai ai e le agaga ona ofi mai i totonu o a’u fetuunaiga ma faaali mai ia te a’u le mea moni.
“O le a se mea e te matauina pe a mavae le faia o se malologa mai vaaiga o le lalolagi lea na faamanuaina lou agaga?”
Na ou matauina ua ou nofo pologa i a’u ala faasalalau faaagafesootai ma e le tatau ona ou faapea. E le tatau ona ou popole i manatu o isi. E leai se mea o le a ou auai ai fua i faamatalaga e le ogatusa ma o’u talitonuga. E leai se mea o le a ou gauai atu ai i mea uma o loo tutupu i luga o le initoneti; e mafai ona ou filifili e tape. Na ou matauina le faamamaina o lo’u mafaufau e le anapogi mai mea oona na faia e na faamasinoga e uiga i isi ma ou lagonaina ai le suia o lo’u loto.
“O i ai ea se suiga i le mea ua e manao nei e faaalu ai lou taimi ma le malosi? Ua suia ea se tasi o au faamuamua—e tusa lava pe na o sina mea?”
O le taimi o se meaalofa lea ua aumaia e le anapogi ia te a’u. Ua i ai nei so’u taimi e faitau ai anomea o le Konafesi Aoao ma suesue i le Tusi a Mamona. Ua i ai nei so’u taimi e tatalo ai i manaoga ma popolega o i latou e ia te a’u le avanoa paia o le aoao atu ao ou sauniaina a’u lesona. Ua i ai so’u taimi e mafaufau loloto ai i manaoga o i latou ou te auauna atu i ai ma saili ni auala fatufatuai e auauna atu ai ia i latou. Ua oo mai le anoanoai o faamanuiaga faaleagaga ma mea na maua i le na o le 10-aso o le mulimuli i le apoapoaiga a le perofeta.