Pangkalahatang Kumperensya ng Oktubre 2019

Lahat ng numero ng pahina ay mula sa Nobyembre 2019 na isyu ng Liahona.

Payo mula kay Pangulong Nelson

Noong pangkalahatang kumperensya, nagbigay ng mahalagang payo si Pangulong Russell M. Nelson sa mga Banal sa mga Huling Araw.

Hinikayat niya ang mga kabataan na:

“Maging marapat para sa mga limited-use na temple recommend” (“Pangwakas na Mensahe,” 121).
Alalahanin ang kanyang paanyaya na “sumali sa kabataang batalyon” para tipunin ang Israel (“Mga Saksi, mga Korum ng Aaronic Priesthood, at Klase ng Young Women,” 39).

Pinayuhan niya ang kababaihan na:

“Hangaring maunawaan ang nais ng Panginoon na malaman at gawin ninyo” at “pag-aralan nang may panalangin ang bahagi 25 ng Doktrina at mga Tipan at tuklasin kung ano ang ituturo ng Espiritu Santo sa inyo.”
“[Alisin ang inyong] tuon sa mga panggagambala ng mundo,” at “[simulan at ipagpatuloy] habambuhay ang paglalaang ito ng inyong buhay sa Panginoon.”
Ituro ang doktrina ni Jesucristo, at magbigay ng “opinyon sa [mga] family, ward, at stake council.”
Maglingkod, manalangin, mag-ayuno, mag-aral ng mga banal na kasulatan, maglingkod sa templo, at gumawa ng gawain sa family history, na pawang “magbubukas sa inyo ng kalangitan.”
“Pag-aralan nang may panalangin ang lahat ng katotohanan na makikita ninyo tungkol sa kapangyarihan ng priesthood,” simula sa Doktrina at mga Tipan, bahagi 84 at 107. (Tingnan sa “Mga Espirituwal na Kayamanan,” 77, 79.)

Hinikayat niya ang lahat ng miyembro ng Simbahan na maghanda para sa pangkalahatang kumperensya sa Abril 2020 sa pamamagitan ng:

Pagbabasa ng salaysay ni Joseph Smith tungkol sa Unang Pangitain.
Pagninilay kung paano nakagawa ng kaibhan sa atin at sa ating mga mahal sa buhay ang Aklat ni Mormon at ang mga kaganapan simula noong Unang Pangitain.
Pagdaragdag ng mga bagong video ng Aklat ni Mormon sa ating indibiduwal na pag-aaral at pag-aaral ng pamilya.
Pagpili sa ating sariling mga tanong, pagdisenyo ng sarili nating mga plano, at pagtutuon ng ating sarili “sa maluwalhating liwanag ng Panunumbalik.” (Tingnan sa “Pangwakas na Mensahe,” 122)

Paano …

Ibahagi ang Ebanghelyo

Pagdating sa pagbabahagi ng ebanghelyo, itinanong ni Sister Cristina B. Franco ang sumusunod at pagkatapos ay sinabi sa mga miyembro ng Simbahan, “Ang sagot sa mga tanong na ito ay oo! Kaya nating gawin ito!”

“Kaya ba nating anyayahan ang isang kaibigan na hindi natin kapanalig na magsimbang kasama natin sa Linggo?”
“[Makakaya kaya nating] bigyan ng Aklat ni Mormon ang isang kamag-anak o kaibigan?”
“Kaya ba nating matulungan ang iba na mahanap ang kanilang mga ninuno sa FamilySearch o ibahagi sa iba ang natutuhan natin sa buong linggo ng pag-aaral natin ng Pumarito Ka, Sumunod Ka sa Akin?”
“Kaya ba nating maging mas katulad ng ating Tagapagligtas na si Jesucristo at ibahagi sa iba ang naghahatid ng kagalakan sa ating buhay?”

Sister Cristina B. Franco, Pangalawang Tagapayo sa Primary General Presidency, “Pagkakaroon ng Kagalakan sa Pagbabahagi ng Ebanghelyo,” 85

Mas Malalim na Pag-aaral

Pagtahak sa Landas ng Tipan

Para masunod ang dalawang dakilang kautusan, sinabi ni Pangulong Dallin H. Oaks, “kailangan nating mabalanse ang batas at pagmamahal—sumusunod sa mga kautusan at tumatahak sa landas ng tipan, habang minamahal ang ating kapwa. Kailangan sa pagtahak na ito sa tipan ang paghingi natin ng banal na inspirasyon” (“Dalawang Dakilang Utos,” 75). Panoorin o basahin ang kanyang mensahe at ang mga mensahe ng sumusunod na mga tagapagsalita para magkaroon ng lakas sa pagtahak sa landas ng tipan:

Si Elder Terence M. Vinson, na nagsabing, “Ang kailangan natin dito ay bawasan ang Wi-Fi at dagdagan ang Nephi!” (“Tunay na mga Disipulo ng Tagapagligtas,” 9).
Si Brother Stephen W. Owen, na hinikayat tayong hanapin ang “espirituwal na pangangalaga” sa pamamagitan ng pagkalas sa mundo at pagkonekta sa langit (“Manampalataya, Huwag Mawalan ng Pananampalataya,” 12).
Si Sister Michelle Craig, na nagsalita tungkol sa “apat na paraan na madaragdagan ang inyong espirituwal na kakayahan na tumanggap ng paghahayag” (“Espirituwal na Kakayahan,” 19).
Si Elder Gary E. Stevenson, na nagsabing, “Kailangan nating patuloy na maging matapat at mapagbantay, sapagkat ito lang ang paraan para makilala ang katotohanan at marinig ang tinig ng Panginoon sa pamamagitan ng Kanyang mga lingkod” (“Huwag Mo Akong Linlangin,” 96).
Si Pangulong M. Russell Ballard, na nagsabing, “Ang isa sa pinakamahahalagang bagay na matututuhan natin sa buhay na ito ay kung paano bigyang-diin ang ating walang-hanggang likas na espirituwal na pagkatao at kontrolin ang ating masasamang nasa” (“Pagpayag na Kontrolin ng Ating Espiritu ang Ating Katawan,” 109).
Si Elder Peter M. Johnson, na tinuruan tayo kung paano natin madaraig ang tatlong kasangkapan ng kaaway: panlilinlang, pang-aabala, at pagpapahina ng loob (“Kapangyarihang Madaig ang Kaaway,” 110–12).