Ko e Fāmili Taʻengata ʻo ʻAlonisoó
“He ko e fale ia ʻo e ʻOtuá toka ai ʻa e ʻofá” (Tohi Hiva ʻa e Fānaú, 99).
“Te u lava nai ʻo toe fakataha mo Mama mo Papa?
“Ko e Toetuʻú ko ha taimi lelei ia ke te fakakaukau ai fekauʻaki mo Sīsū pea mo manatuʻi ʻEne Toetuʻú,” ko Sisitā Losa ange ia. Naʻá ne pukepuke hake ha fakatātā ʻo Sīsū. “Koeʻuhí ko Ia, ʻe lava ke toe moʻui ʻa e kakai kuo ʻosi maté.”
Naʻe sio hake ʻa ʻAlonisō ʻi hono lea ʻaki ʻeni ʻe he faiako Palaimelí. ʻOku ʻuhinga nai ia te u lava ʻo toe sio ki heʻeku ongomātuʻá? Ko e fifili ia ʻa ʻAlonisoó.
Naʻe mate e fineʻeikí ʻi ha ngaahi taʻu lahi kimuʻa. Ne ʻikai ke manatuʻi lelei ia ʻe ʻAlonisō, ka naʻá ne manako he siofi hono ʻū taá. Pea naʻe mate foki mo e tangataʻeikí.
ʻOku nofo ʻeni ʻa ʻAlonisō mo Abuela, ko ʻene kuifefiné. Kuó ne akoʻi ia fekauʻaki mo hono siasí, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe teuteu ke papitaiso mo hilifakinima ia ʻi he taʻu hono hokó, ʻi heʻene matuʻotuʻa feʻungá.
Naʻe puke hake leva ʻe Sisitā Losa ha fakatātā ʻo ha fale hinehina. “Ko ha meʻaʻofa maʻongoʻonga ʻe taha meia Sīsū ko e ngaahi temipalé. Ko e taha ʻeni ʻo e ngaahi temipale ʻi Sileí.”
Naʻe sio ʻa ʻAlonisō ki he maka ʻīmisi koula ʻi ʻolunga he falé. Naʻe fakaʻofoʻofa! Naʻá ne fifili pe ko e hā ʻoku fakahoko ʻi lotó.
Naʻe talaange ʻe Sisitā Losa, “Ko e temipalé ʻa e feituʻu ʻoku silaʻi fakataha ai e ngaahi fāmilí ke taʻengatá. Ko e temipale Sanitiako ko ʻení naʻe silaʻi ai au ki heʻeku mātuʻá hili ʻemau kau ki he Siasí. Koeʻuhí ne silaʻi kimautolu, te u lava ʻo fakataha mo kinaua ʻo aʻu ki he hili ʻa e moʻuí ni.”
Naʻe ongoʻi fiefia ʻa ʻAlonisō ʻi heʻene fanongo ki aí. Naʻá ne fehuʻi ange, “ʻE lava nai ke silaʻi au ki heʻeku mātuʻá? Neongo kuó na ʻosi mate?”
Naʻe kamo ange ʻa Sisitā Losa. “ʻIo! Ko e taha ia ʻo e ngaahi ʻuhinga ʻoku mātuʻaki mahuʻinga ai e ngaahi temipalé. ʻOkú ne tāpuekina e kau mēmipa kotoa hotau fāmilí, ʻo kau ai ʻa kinautolu kuo maté.”
ʻI he toenga ʻo e ʻahó, naʻe fakakaukau pē ʻa ʻAlonisō ki he ngaahi temipalé. Naʻá ne kole ange kia Abuela ke akoʻi ia ke ne ʻilo lahi ange. Naʻe talanoa [ʻa Abuela] fekauʻaki mo e vala hinehina ʻoku tui ʻe he kakaí ʻi lotó mo e ʻū tā valivali fakaʻofoʻofa ʻi he holisí.
Naʻe talaange ʻe Abuela, “Kae mahuʻinga tahá, ko e feituʻu ia ʻe lava ke silaʻi ai koe ki hoʻo mātuʻá. Te tau kole ha toko ua mei he uōtí ke na fakafofongaʻi kinaua lolotonga e silá.”
“ʻE lava ke tau ʻalu ʻapongipongi?” Ko e kole ange ia ʻa ʻAlonisoó. “ʻOku ou fie fakataha au mo Mama mo Papa ki he taʻengatá!”
Naʻe mamali pē ʻa Abuela. Naʻá ne pehē ange, “ʻOku ou fiefia hoʻo fie ʻalú. Ka ʻoku tuʻu e temipale ofi tahá ʻi Konisepisioni. ʻOku ʻikai ke ta maʻu ha paʻanga feʻunga ki ha tikite pasi.”
“Te u tokoni he tātānaki ki he fononga ko iá!” Ko ʻAlonisō ange ia.
Talu mei ai, ko e taimi kotoa pē ne maʻu ai ʻe ʻAlonisō ha koini ʻi he halá pe maʻu ha faingamālie ke ngāueʻi ai ha paʻanga, naʻá ne totongi ʻene vahehongofulú pea tānaki leva e toengá ki heʻena paʻanga temipalé.
Hili ha ngaahi māhina ʻena tātānakí, naʻe faifai pea maʻu ʻe ʻAlonisō mo Abuela ha paʻanga feʻunga ke na fononga ki he temipalé. Ne na kole ʻa Misa mo Sisitā Siliva ke nau ō. ʻI he ʻaho ke nau ō aí, ne nau heka pasi lōloa ki he kolo ko Konisepisioní. Naʻe meimei tō e laʻá ʻi he taimi ne fakatokangaʻi atu ai ʻe ʻAlonisō ha meʻa lanu koula mei he mamaʻó.
“ʻOku ou lava ʻo sio ki he ʻāngelo ko Molonaí!” Ko ʻAlonisō ia mo tuhu pē ki he maka ʻīmisi ʻi ʻolunga he ʻato fuopotopoto lanu pulū ʻo e temipalé.
Ne nau mohe he pō ko iá ʻi ha fale nofo totongi he tafaʻaki ʻo e temipalé. ʻI he pongipongí, ko e fuofua taimi ia ke hū ai ʻa ʻAlonisō ki he temipalé. Naʻá ne sio ai ki ha fakatātā lahi ʻo Sīsū ʻi loto. Ne na tui mo Abuela ha vala hinehina. Naʻá ne ongoʻi fiefia mo nonga.
ʻI he hokosia e taimi ki he silá, naʻe hū atu ʻa ʻAlonisō ki ha loki fakaʻofoʻofa mo ha ngaahi sioʻata ʻi he holisí. Naʻe fakahinohino ange ʻe ha tokotaha ngāue temipale kia ʻAlonisō, Abuela mo e ongomātuʻa Silivá ʻa e founga ke nau tūʻulutui takatakai ai ʻi ha tēpile makehe naʻe ui ko e ʻōlitá. Naʻe kofu ʻaki ia ha tupenu molū.
Naʻe ʻi ai ʻa Misa mo Sisitā Silivá ke fakafofongaʻi e ongomātuʻa ʻa ʻAlonisoó. Naʻe ʻi ai ʻa Abuela ke fakafofongaʻi e tuofefine ʻo ʻAlonisō ne mate kimuʻa pea fanauʻi ʻa ʻAlonisoó.
ʻI he kuikui ʻa ʻAlonisoó, naʻá ne fakakaukauloto ki he kakato hono fāmilí.
Ne fakakaukau ʻa ʻAlonisō ʻo pehē, ʻOku ʻikai ke u faʻa tatali ke toe sio kiate kinautolu. ʻOku ou houngaʻia moʻoni ʻi he malava ke fakataha ʻa e ngaahi fāmilí ʻo taʻengatá! ●
Tā fakatātā ʻa Mark Jarman