Ko Ha Tāpuaki Pē Ne u Lava ʻo Foakí

Jonathan Mafra Sena de Santana

Sanitā Katalina, Palāsila

Ne u fakaʻosi ako mei he akoʻanga laó ʻi he vahaʻataimi ne hokosia ai e taʻu taha hoku ʻofefiné. Ne u hanganaki atu mo hoku uaifí ke fakafiefiaʻi ʻeku fakaʻosi akó, ko e ʻaho fāʻeleʻi homa ʻofefiné, pea mo e ngaahi faingamālie foʻou te mau maʻú, ka naʻe ʻikai hoko e meʻa ne ma palani ki aí.

Ne ʻikai maʻu haʻaku ngāue hili ha taimi nounou mei heʻeku fakaʻosi hoku mataʻitohí pea naʻe faingataʻa ke maʻu ha ngāue. ʻIkai fuoloa mei ai, kuo mau faingataʻaʻia fakapaʻanga. Naʻa mo ha kiʻi faiʻaho siʻisiʻi peé ne kei faingataʻa pē ia.

Hili haʻama toutou talanoa mo hoku uaifí, ne ma tali lelei homau tūkungá. Naʻe ʻikai faingofua kiate au ʻi heʻeku hoko ko ha tamaí ke u taʻemalava ʻo kumi ha kiʻi meʻaʻofa siʻisiʻi pē maʻa hoku ʻofefiné pea mo ʻeku sio ki he ongoʻi loto-mamahi hoku uaifi ʻofeiná.

Naʻe ʻikai mahino kiate au e meʻa naʻe hokó. Naʻá ku lotu ʻo kole ki he Tamai Hēvaní ke Ne tokoni ʻo fakamahinoʻi mai Hono finangalo maʻakú. Fakafokifā pē, hangē ha leʻo ne ongo mai ki heʻeku fakakaukaú, ne u fanongo ki he ngaahi lea ko ʻení: “ʻOkú ke maʻu ha meʻa ʻoku mahuʻinga ange ia ʻi ha toe koloa fakamatelie ʻi he māmani ko ʻení. ʻOkú ke maʻu ʻa e lakanga fakataulaʻeikí. Ko e hā mo ha toe meʻaʻofa lelei ange te ke foaki maʻa ho ʻofefiné ka ko ha tāpuaki lakanga fakataulaʻeiki?”

Naʻe mokulu hoku loʻimatá ʻi heʻeku fakakaukau ki he ʻuhinga ʻo e lakanga fakataulaʻeikí kiate aú. Naʻe fonu hoku lotó ʻi he houngaʻia ʻi he taimi naʻá ku fakakaukau ai ko e lakanga fakataulaʻeikí ʻa e mālohi te ne lava ʻo fakatahaʻi hoku fāmilí ki he kotoa ʻo ʻitānití.

Ne u vahevahe ʻeku ngaahi ongó mo hoku uaifí. Ne u talaange kiate ia ko e meʻa pē te u lava ʻo foaki ki homa ʻofefiné ko ha tāpuaki lakanga fakataulaʻeiki. Ne ma fakatou fakakaukau te ne maʻu ai ha fiefia mo ha nonga, pea ʻe feʻunga pē ia.

ʻI he ʻaho ne hoko ai e ʻaho fāʻeleʻi homa ʻofefiné, naʻe omi homa ngaahi kaungāmeʻá, kāingá, mo e ngaahi kaungāʻapí mo ha foʻi keke pea mo ha ʻu meʻa teuteu. Ne ma houngaʻia ke fakafiefiaʻi ʻa e ʻaho makehe ko ʻení mo e niʻihi ʻokú ma ʻofa aí. ʻI he pō ko iá, ne u hilifaki hoku ongo nimá ki he ʻulu hoku ʻofefiné peá u foaki maʻana ha tāpuaki. Ne u tāpuekina ʻaki ia e meʻa kotoa pē naʻe ueʻi au ʻe he Laumālie ʻo e ʻEikí ke u lea ʻakí.

ʻOku mau kei foua pē ha taimi ʻo e liliú mo e ngaahi faingataʻa ʻo e ʻikai maʻu ha ngāué mo e ngaahi meʻa fakapaʻangá. Ka ʻi he uhouhonga ʻo e ngaahi mamahí mo e loto-foʻí, ʻoku mau maʻu ʻa e nongá mo e fiemālié ʻo fakafou ʻi hotau Fakamoʻui ko Sīsū Kalaisí. ʻOku ʻikai haʻaku toe veiveiua ko e hoko ko ia ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo ʻete maʻu e mālohi ʻo e lakanga fakataulaʻeikí ko ha tāpuaki ia. Ko e meʻa pē ia ne u lava ʻo foaki ʻi he ʻaho fāʻeleʻi hoku ʻofefiné, pea naʻe feʻunga ʻānoa pē ia.