Ko ha Tekisī, ko ha Tamasiʻi Ako, pea mo e Tali ki ha Lotu
ʻOku nofo ʻa e tokotaha naʻá ne faʻú ʻi Liva Siteiti, Naisīlia.
Ne ma maʻu ha ueʻi te ma maʻu ia, ko e hā leva e ʻuhinga ne ʻikai hoko aí?
ʻI ha ʻaho ʻe taha, naʻe fakahoko mai kiate au mo hoku hoa faifekaú ha fetuʻutaki ke ma akoʻi ha tangata ne nofo ʻi ha kolo ne ui ko Tema, naʻe ofi ki he kolo fakaʻofoʻofa ʻo ʻAkalā, Kaná. Naʻe ʻikai tonu hono fakafikefika e ʻū fale ʻi he kolo ko iá, ko ia ne ʻomi ai kiate kimaua ha fakahinohino naʻe tohinima ke tokoni ki hono kumi ʻo e falé.
ʻI heʻema aʻu ki he koló, ne ma muimui ki he fakahinohinó ka ne ʻikai ke ma maʻu ʻa e tangatá koeʻuhí ne lahi ha ʻū fale ne faitatau pē mo e fakahinohino ne ma maʻú. ʻI heʻema ongoʻi puputuʻú, ne ma fakakaukau ai ke ma tukituki he matapā ʻo e ngaahi kaungāʻapí ke ʻeke, ka naʻe hangē ne ʻikai ʻilo ʻe ha taha ia e tangata ne ma fekumi ki aí. Naʻá ku maʻu ha ueʻi ke ma kole tokoni ki he Tamai Hēvaní.
Hili ʻema lotú, ne u maʻu ha ongo te ma maʻu ʻa e tangata ne ma fekumi ki aí, ko ia ne toe fakautuutu ange ʻema fekumí. Ka naʻe ʻikai pē ke ma maʻu ia. Ne faifai peá ma helaʻia peá ma pehē ke ma foki ki homa ʻēliá koeʻuhí ne ʻi ai mo haʻama ngaahi ʻapoinimeni kehe. ʻI heʻema aʻu ki he peisi tekisií, naʻe fakatokangaʻi ʻe he fakaʻuli tekisī naʻá ne ʻomi kimaua ki he koló ʻa ʻema fofonga mamahí peá ne ʻeke mai pe naʻá ma maʻu e tokotaha ne ma fekumi ki aí. Ne ma talaange, ʻikai.
Naʻá ne fokotuʻu mai ke ma ʻalu ki ha ʻapiako ne tuʻu ʻi he tulikí ʻo fakaʻekeʻeke ai. Naʻá ma talaange ʻoku ʻikai ko e fakahinohino ia ne ʻomi kiate kimauá, ka naʻá ne vivili mai pē. Ne ma hifo mei he tekisií peá ma lue atu ki he ʻapiakó—ʻo ʻikai koeʻuhí ne ma fakakaukau te ma maʻu ha taha ai, ka koeʻuhí ke fiemālie homa kaungāmeʻá.
ʻI he kamata ke ma lue atu ki he ʻōfisi ʻo e ʻapiakó, naʻe lele fakahangatonu mai ha kiʻi tamasiʻi kiate kimaua. Naʻá ne malimali mo talamai kiate kimaua ko ia pē mo hono tokouá ʻa e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻokú na nofo ʻi he ʻēlia ko ʻení pea ʻe lava ke ne tokoni mai kiate kimaua.
Ne ma fesiofaki mo hoku hoá ʻi heʻema ʻohovalé. Ko ha mana ia. Naʻe tokoni mai e kiʻi tamasiʻí ke ma fakasio e tangata ne ma fekumi ki ai, pea naʻe faifai peá ne tali e ongoongoleleí peá ne papitaiso.
Naʻe akoʻi au ʻe he aʻusia ko ʻení ʻoku tali ʻe he Tamai Hēvaní e ngaahi lotú ʻi he taimi mo e founga pē ʻAʻana. Ko e taimi ʻoku ʻikai ke tau maʻu ai e tali ki heʻetau ngaahi lotú he taimi pē ko iá, te tau lava ʻo fakamālohia ʻetau tui kiate Iá pea ako ke tau faʻa kātaki.
Tā fakatātaaʻi ʻe Corey Egbert