Mālō e lelei mei he Vao ʻAkau Tapú!
Malō e Lelei, ko Mako mo Paolo kimaua.
ʻI he māhina ní, ʻoku tau ʻaʻahi ki he feituʻu naʻe hoko ai ʻa e ʻUluaki Mata Meʻa-Hā-Maí ʻi he taʻu ʻe 200 kuo hilí ke fakamanatua hono Toe Fakafoki Mai ʻo e Ongoongoleleí!
ʻI he taimi ne taʻu 14 ai ʻa Siosefa Sāmitá, naʻá ne nofo ʻi ha fale papa ʻi Niu ʻIoke, USA. Naʻá ne maʻu ha ngaahi tokoua ʻe toko nima mo ha ngaahi tuofāfine ʻe toko tolu. Naʻá ne talangofua ki heʻene mātuʻá mo anga fakakaumeʻa ki he niʻihi kehé. Naʻá ne lau e Tohi Tapú mo hono fāmilí, ka naʻe ʻikai ke nau ō kotoa ki ha siasi pē ʻe taha.
Ko ha tokotaha ngāue mālohi ʻa Siosefa. Naʻá ne tokoni ki hono tutuʻu ʻo e ʻuluʻakaú kae lava ke tō ʻe hono fāmilí ha ngoue. Naʻá ne tokoni foki ki hono fāmilí ke tānaki e huhuʻa mei he ʻuluʻakau māpelé ke ngaohi ʻaki ha suka.
Naʻe fakaʻamu ʻa Siosefa ke ne maʻu ha siasi tatau mo e siasi he Tohi Tapú. ʻI ha ʻaho ʻe taha, naʻá ne ʻalu atu ai ki ha vaoʻakau peá ne lotu. Naʻe hā mai e Tamai Hēvaní mo Sīsu kiate ia. Ne Na folofola ange kuo fakamolemoleʻi ʻene ngaahi angahalá. Ne Na folofola ange foki ʻoku ʻikai totonu ke ne kau ki ha taha ʻo e ngaahi siasí. ʻE vavé ni pē hano fokotuʻu e Siasi ʻo Sīsuú!
Naʻe tokolahi ha kakai ne nau fakakata ʻaki ʻa Siosefa koeʻuhí ko e meʻa naʻá ne mamata ki aí. Ne nau pehē ko ʻene faʻufaʻu kotoa pē ʻaʻana. Ka naʻe kei tala pē ʻe Siosefa ʻa e moʻoní. Naʻá ne talaange, “Naʻá ku ʻiloʻi ia, peá u ʻiloʻi ʻoku ʻafioʻi ia ʻe he ʻOtuá, pea ʻe ʻikai te u lava ʻo fakaʻikaiʻi ia” (Siosefa Sāmita—Hisitōlia 1:25).
ʻI he ʻahó ni, ʻe lava keʻaʻahi ʻa e kakaí ki he feituʻu ne lotu ai ʻa Siosefá. ʻOku fakaʻofoʻofa ia mo nonga ʻaupito.
ʻOku nofo ʻa e fānau ko ʻení ʻi he feituʻu ne tupu hake ai ʻa Siosefa Sāmitá!
ʻOku ou ʻiloʻi ko ha feituʻu makehe ʻa e Vao ʻAkau Tapú he naʻe lotu ai ʻa Siosefa Sāmita mo mamata ki he Tamai Hēvaní mo Sīsū.
Pipa D., taʻu 5, Niu ʻIoke, USA
ʻOku ou houngaʻia ʻi heʻemau nofo ofi ki he ʻapi ʻo Siosefa Sāmitá. ʻOku ou saiʻia he ʻalu ki he Fale Kulenitiní ʻoku ʻi ai ʻa e mīsini pākí. ʻOku ou saiʻia he sio ki he feituʻu ne nau fakatahaʻi ai e ngaahi fuofua tatau ʻo e Tohi ʻa Molomoná.
Losekou B., taʻu 9, Niu ʻIoke, USA
Fakamālō atu hoʻomou ʻaʻahi mai ki he Vao ʻAkau Tapú mo kimauá. Tau toki sio!
Laʻitā ʻo e ongo kiʻi tamaikí ʻa Julie Poulson; tā fakatātaaʻi ʻe Katie McDee