Ngaahi Fehuʻi & Talí

Ko e hā haʻo tali ʻi he taimi ʻoku ʻikai tui ai ho ngaahi kaungāmeʻá ʻe lava ke hoko ʻa e ʻUluaki Mata Meʻa-Hā-Maí?

Confused Caucasian girl laying on blanket texting on cell phone - stock photo

Fakatupulaki ʻa e Tuí

ʻI he ngaahi fehuʻi fakalaumālié, ʻoku ʻikai ngata pē ʻi he fie maʻu ke tau ʻiló; ka ʻoku fie maʻu foki ke tau maʻu ha tui ke ʻiloʻi ʻe lava ke hoko ʻa e ʻUluaki Mata Meʻa-Hā-Maí. Te tau lava ʻo fakatupulaki e tui ko iá ʻaki ʻetau kole ki he Tamai Hēvaní mo fakafanongo ki he Laumālié.

Sūlia B., taʻu 17, Kalefōnia, USA

Ako e Tohi Tapú

Kole ki ho ngaahi kaungāmeʻá ke nau ako e Tohi Tapú. Kapau ʻoku nau tui ko e folofola ia ʻa e ʻOtuá, pea ʻoku totonu leva ke nau tui ʻoku folofola mai e ʻOtuá kiate kitautolu ʻi he ʻahó ni ʻi ha ngaahi vīsone ʻo hangē ko e ʻUluaki Mata Meʻa-Hā-Maí koeʻuhí naʻá Ne fakahoko e meʻa tatau kia ʻĀtama, Mōsese, ʻĪsaia, mo e kau palōfita kehe ʻi ha ngaahi founga kehekehe.

ʻEletā Muanitā, taʻu 22, Misiona Keniā Nailopi

Kole ki he ʻOtuá

Koeʻuhí naʻe feʻunga ʻa e hē mei he moʻoní mo ha ngaahi taʻu ʻe laungeau, ʻoku ʻikai ʻuhinga ia naʻe taʻofi ai ʻe he ʻOtuá ʻa ʻEne ngaahi mata meʻa-hā-maí. ʻOku fie maʻu ke tau maʻu ha loto-fakatōkilalo ke tau kole ki he ʻOtuá ʻi he loto-moʻoni mo fakamātoato, ʻo hangē ko ia ne fai ʻe Siosefa Sāmitá.

Selemī E., taʻu 19, Kinisasa, Lepāpulika Fakatemokalati ʻo Kongokoó

Tui ki he ʻOtuá

Te u fehuʻi ki hoku kaungāmeʻá, “ʻOkú ke tui ki he ʻOtuá? ʻOkú ke tui naʻá Ne fakatupu e ngaahi meʻa kotoa pē? ʻOkú ke tui naʻá Ne hā ki he kau palōfita ʻi he kuonga ki muʻá? Pea kapau ʻokú ke tui ki ai, ko e hā ʻoku ʻikai ke ke tui ai ʻe lava ke hoko ia ʻi he kuonga ko ʻení? ʻOku malava ia.”

Sala M., taʻu 16, ʻIutā, USA

Vahevahe Hoʻo Fakamoʻoní

ʻOku ou vahevahe ʻeku fakamoʻoní mo hoku ngaahi kaungāmeʻá ʻoku fakahā ʻe heʻetau Tamai Hēvaní e ngaahi meʻa kotoa pē ki Heʻene fānaú ʻi he taimi ʻoku nau kole ai ʻi ha loto-fakamātoato ke ʻiloʻi ʻa e moʻoní. Naʻe maʻu ʻe Siosefa Sāmita ʻa e loto-holi ke ʻiloʻi ʻa e moʻoní, pea naʻá ne ngāue ʻo fakatatau ki heʻene tuí. Te ke lava foki ʻo fiefia ʻi ha aʻusia maʻongoʻonga kapau te ke kole ki he Tamai Hēvaní ʻi he lotu ʻaki ho lotó kotoa.

Mala C., taʻu 20, Lima, Pelū

“ʻI he fakahā fakatāutahá, te ke lava ai ʻo maʻu hoʻo fakamoʻoni pē ʻaʻau ko e Tohi ʻa Molomoná ko e folofola ia ʻa e ʻOtuá, ko Siosefa Sāmita ko ha palōfita, pea ko e Siasi ʻeni ʻo e ʻEikí. Tatau ai pē pe ko e hā ʻe lea ʻaki pe fai ʻe he niʻihi kehé, he ʻikai lava ha taha ʻo toʻo ha fakamoʻoni kuo fakatō ki ho lotó mo e ʻatamaí ʻo fekauʻaki mo e meʻa ʻoku moʻoní.”

Palesiteni Lāsolo M. Nalesoni, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 95.

Ko e Hā Hoʻo Fakakaukaú?

“ʻOku faingataʻa kiate au ke u feohi lelei mo ʻeku ongomātuʻá. ʻE founga fēfē haʻaku fakatupulaki homau vā fetuʻutakí?”

ʻOmai hoʻo talí, pea kapau te ke loto ki ai, ʻomi mo ha laʻitā ʻata lelei kimuʻa he ʻaho 15 Māʻasi 2020, ʻi he liahona.ChurchofJesusChrist.org (lomiʻi ʻa e “Submit an Article or Feedback”). Pe ʻīmeili hoʻo talí ki he liahona.ChurchofJesusChrist.org.

ʻE lava ke ʻētitaʻi ʻa e ngaahi talí koeʻuhí ke lōloa feʻunga pe mahino. ʻOku fakataumuʻa e ngaahi tali ʻoku pulusí ke hoko ko ha tokoni mo ha fakakaukau, ka ʻoku ʻikai ko hano fakahaaʻi ʻo ha tokāteline ʻo e Siasí.

Laʻitaá mei he Getty Images

• Naʻe liliu fēfē ʻe Siosefa Sāmita ʻa e Tohi ʻa Molomoná?