Fakaʻilekitulōnika Pē: Kakai Lalahi Kei Talavoú
Ko Hono Langa e Puleʻangá ʻi Niu Kaletōniá
ʻOku tali ʻe he kakai lalahi kei talavou ʻi Niu Kaletōniá mo e māmaní ʻa e ui ke ngāue tokoní pea hoko ko e kau taki ʻi he Siasí.
“Ko e taha e ngaahi tāpuaki maʻongoʻonga ʻo e mēmipa he Siasí ko e faingamālie ko ia ke ngāue tokoní.”1 ʻI hoʻo hoko ko ha tokotaha lahi kei talavou ʻoku ngāue tokoni ʻi he Siasí, ʻe lava ke hoko ia ko ha faingamālie fakafiefia ki he tupulakí, tuʻunga fakatakimuʻá, mo hono fakamālohia ho ngaahi uoua fakalaumālié. Ka ʻi he kotoa ʻo e ngaahi fatongia kehe ʻoku ʻomi ʻe he tuʻunga ʻo e kakai lalahi kei talavoú, ʻe lava ke faingataʻa e ngāue tokoní ʻi he taimi ʻe niʻihi—tautautefito ʻi he ngaahi feituʻu ʻoku fuʻu siʻisiʻi ai ʻa e Siasí. Hangē ko ʻení, ko e hā e meʻa ʻokú ke fai ʻi he taimi ʻoku ui ai koe ke ke hoko ko e palesiteni ʻo e Kau Finemui ʻi he siteikí, ʻokú ke feinga ke teuteu ke ngāue fakafaifekau, lolotonga iá ʻokú ke ʻi he kolisí foki mo tokoni ke tokangaʻi e ʻinisititiutí, pea, ʻokú ke taʻu 21 pē?
ʻOku ʻikai ko ha meʻa foʻou ʻeni ia ʻi he ngaahi feituʻu lahi ʻi he Siasí. ʻI Niu Kaletōniá, ko ha kiʻi vahefonua siʻisiʻi ʻo Falanisē ʻoku ʻi ai ha kāingalotu ʻo e Siasí ʻe meimei toko 2,400, ʻoku faʻa ʻoange ki he kāingalotu lalahi kei talavoú ha ngaahi fatongia lalahi ʻi hono langa hake ʻo e puleʻanga ʻo e ʻEikí. Naʻe pehē ʻe Palesiteni Lāsolo M. Nalesoni ki he kakai lalahi kei talavoú,: “Ko e kau taki kimoutolu ʻo e Siasi ʻo e ʻEikí ʻi he kahaʻu! ʻOkú ke mateuteu nai ke tali ʻa e fatongia ʻo e tuʻunga fakatakimuʻá?”2 ʻOku mateuteu ʻa e kakai lalahi kei talavou he funga ʻo e māmaní ke ngāue mo taki ʻi he Siasí koeʻuhí ʻoku mahuʻinga pea koeʻuhí ko ʻenau ʻofa ki he Fakamoʻuí.
ʻI Heʻene Ngāue Tokoni ʻi he Kotoa ʻo ʻEne Moʻuí
Naʻe tokoni ʻa e ngāue fakafaifekau ʻa e kakai lalahi kei talavou tokolahi ʻo Niu Kaletōniá, ke teuteuʻi kinautolu ke ngāue tokoni ʻi he Siasí ʻi he kotoa ʻo ʻenau moʻuí. Naʻe maʻu ʻe Ulivaka Siolani (Siō) ha uiuiʻi ke ne hoko ko e tokoni ua ʻo e kau pīsopelikí ʻi ha uike pē ʻe taha hili hono tukuange ia mei heʻene ngāue fakafaifekau taimi kakató. ʻOku pehē ʻe Siō, “Naʻe toki ʻosi pē ʻeku ngāue fakafaifekaú. Naʻá ku ongosia, peá u pehē loto pē, te u mālōlō he taimí ni.” Ka naʻá ne kei tali pē ʻa e uiuiʻí. “Ne u ʻiloʻi te u ʻalu ki ha feituʻu pē ʻe finangalo ʻa e ʻEikí ke u ʻalu ki aí.” ʻOku ou ʻi Heʻene ngāué—ʻo ʻikai ko e taʻu pē ʻe ua, ka ʻi he kotoa ʻo e moʻuí.”
Talu e ngāue ʻa Siō ʻi he kau pīsopelikí, kuó ne ʻosi mali he taimí ni, ʻi ai ʻene fānau, pea kuo hiki ki ha uooti kehe. Ka naʻe hoko atu pē ʻene ngāué mo fakahoko hono ngaahi uiuiʻi ʻi he Siasí.
Naʻe fakahā ʻe ʻEletā ʻEli C. Tengei, ko e Fitungofulu Taki Māʻolunga mālōlō ki he kakai lalahi kei talavoú: “Ko e uiuiʻi ʻi he Siasí ko ha taha ia ʻo e ngaahi tāpuaki fakaofo taha te ke lava ʻo fiefia ai ʻi hoʻo moʻuí. ʻOku lahi ha ngaahi meʻa te ke lava ʻo tokoni ai ki he uōtí pe kolo ʻokú ke nofo aí. ʻOku fie maʻu ho ngaahi talēnití mo e taukeí ʻi ha Siasi ʻoku tupulaki.”3 ʻOku ʻikai ko Siō pē ʻa e tokotaha lahi kei talavou ʻi he motú naʻá ne maʻu ʻa e taukei ke fakaʻaongaʻi ke tokoni ke fakatupulaki ʻa e Siasí—ʻoku ngāue ʻa e kakai lalahi kei talavoú ʻi he meimei tafaʻaki kotoa ʻi he uōtí mo e siteikí. ʻOku pehē ʻe Siō, “ʻOku mau feinga ke fakafoki mai ʻa e ngaahi meʻa kuo mau ako ʻi heʻemau ngāue fakafaifekaú ke fakamālohia homau siteikí mo e ngaahi uōtí.” ʻOku fakahoko ʻe he kakai lalahi kei talavou ko ʻení ha ngaahi feilaulau ke fakamālohia ʻa e puleʻangá ʻi honau fonua tupuʻangá, kae hangē ko e fakamatala ʻa Sioó, “ko e meʻa ʻoku mau feilaulauʻi lahi tahá ko homau taimí.”
ʻOku maʻu ʻe he kakai lalahi kei talavou ʻe niʻihi ha uiuiʻi ʻe ua pe tolu. ʻOku pehē ʻe Siō, “ʻE lava ke hoko ia ko ha tāpuaki kiate kinautolu, ka ʻe lava pē ke hoko foki ko ha kavenga mafasia, ʻi he feinga ʻa e tokolahi ke potupotutatau e ngaahi fiemaʻu ʻa e kakai lalahi kei talavoú mo honau ngaahi fatongia ʻi he Siasí. “ʻOku faingataʻa ke fai e meʻa kotoa pē ʻi he taimi tatau.” Ka naʻe ʻilo ʻe Siō ko e taimi ʻokú ne fakamuʻomuʻa ai ʻa e ʻEikí, naʻe faingofua ke fakahoko ʻa e toengá. ʻOkú ne pehē, “Kuo tokoni ʻa e ʻEikí ʻi he meʻa kotoa pē—akó, kumi ha uaifí—naʻe ʻi he toʻukupu kotoa ia ʻo e ʻEikí.”
Ko e Kahaʻu ʻo e Siasí
ʻOku ʻi ai ha ngaahi fakakaukau mālohi ʻa e kau palōfitá mo e kau ʻaposetoló fekauʻaki mo e tuʻunga malava mo e ngāue tokoni ʻe lava ke fakahoko ʻe he kakai lalahi kei talavoú ʻi he Siasí: “ʻOku mau fie maʻu hoʻomou tukupā kakató. ʻOku mau fie maʻu ha kakai lalahi kei talavou longomoʻui, faʻa fakakaukau, mo ʻofa ʻoku nau ʻilo ʻa e founga ke fakafanongo mo tali ki he ngaahi ueʻi ʻa e Laumālie Māʻoniʻoní.”4
ʻOku tali ʻe he kakai lalahi kei talavou ʻi Niu Kaletōniá mo e tapa kehekehe ʻo e māmaní ʻa e ui fakaeʻaposetolo ko ʻení. ʻOku nau fakatokangaʻi ko e kahaʻu kinautolu ʻo e Siasí, pea ʻoku nau fili ke ngāue tokoni ʻi ha faʻahinga founga pē te nau lavá. ʻOku nau fepoupouaki ʻi honau ngaahi uiuiʻí. ʻOku nau ngāue mo e kau faifekaú. ʻOku nau vahevahe ʻa e ongoongoleleí pea fakaafeʻi honau ngaahi kaungāmeʻá ki he lotú. ʻOku nau faleʻi ʻa e toʻu tupu ʻi honau ngaahi uōtí mo fakaʻaiʻai kinautolu ke nau ngāue fakafaifekau. ʻOku nau fononga mamaʻo ki he temipalé. ʻOku nau akoʻi ʻa kinautolu ʻi honau fāmilí ʻoku teʻeki kau ki he Siasí. Pea ko e ngaahi ngāue kotoa ko ʻení ko hono langa ia ʻo e puleʻangá.
ʻOku fakatokangaʻi ʻe Siō ko e taimi ʻoku tau ngāue ai maʻá e ʻEikí, “ʻOku tau hoko ko ʻEne meʻangāue.” ʻI he ngaahi kuonga ko ʻeni ʻo e tupulaki ʻa e Siasí, ʻe ui ʻe he ʻEikí ʻa e Kāingalotu ʻi he taʻu motuʻa kotoa pē, mei he feituʻu kotoa pē, ke tali ʻa e ngaahi fatongia ke langaki mo fakamālohia Hono puleʻangá. ʻOku tau mateuteu nai ke tali e ui ko iá?