Naʻe liliu fēfē ʻe Siosefa Sāmita ʻa e Tohi ʻa Molomoná?
Kimuʻa pea fūfuuʻi ʻe Molonai, ko e palōfita fakamuimui taha ʻo e Tohi ʻa Molomoná, ʻa e ʻū lauʻi peleti koulá naʻá ne tohi ʻi he peesi talamuʻaki ʻo e tohí ʻe liliu ʻa e tohí “ʻi he foaki mo e māfimafi ʻo e ʻOtuá.” ʻOku kei hoko pē ʻeni ko e fakamatala lelei taha ʻo hono liliu ʻo e Tohi ʻa Molomoná.
Naʻe tala-kae-tohi ʻe Sīosefa Sāmita e ngaahi lea ʻo e liliú ki ha kau tangata tohi, ko e lahi tahá ko ʻŌliva Kautele. Koeʻuhí naʻe liliu ʻe Siosefa ha lea fakafonua ne mātuʻaki foʻou ʻaupito, naʻe fie maʻu ke ne falala ki he ʻEikí. Ko e founga ʻe taha ne tokoni ai ʻa e ʻEikí ko hano ʻomi ha ʻū meʻangāue fakatuʻasino ke tokoni kia Siosefa ʻi he liliú. Naʻe pehē ʻe he kau fakamoʻoní ne sio ʻa Siosefa ki he ʻū meʻangāué pea naʻe ʻasi mai ʻa e ngaahi leá kiate ia ʻi he lea faka-Pilitāniá. Naʻe kau ʻi he ʻū meʻangāue liliu leá ʻa e “ongo maka liliu léa” pe “ʻŪlimí mo e Tūmemí”—ko ha foʻi maka ʻe ua ne fakapipiki ki ha ukamea fuopotopoto koeʻuhí ke lava ʻa Siosefa ʻo sio ʻiate kinaua. Naʻe ʻoange e ongo meʻá ni kia Siosefa fakataha mo e ʻū lauʻi peletí. Ko e meʻangāue ʻe taha naʻe fakaʻaongaʻi ʻe Siosefá ko ha “maka kikite” ʻa ia naʻá ne sio ki ai, ʻo faʻa faʻo ia ʻi ha loto tatā. Naʻe maʻu ʻe Siosefa e foʻi maka ko ʻení kimuʻa pea naʻá ne fakaʻaongaʻi ia ke kumi ʻaki e ngaahi meʻa ne fufū pe molé. Naʻá ne fakaʻaongaʻi e ongo maka liliu leá mo e maka kikité ʻi heʻene liliu leá, ʻo fakafalala maʻu pē ki he ueʻi fakalaumālie mei he langí.
Naʻe mātuʻaki fakaofo ʻaupito hono liliu ʻo e Tohi ʻa Molomoná pea naʻe fakahoko ia ʻi he “foaki mo e māfimafi ʻo e ʻOtuá.”