Haʻu, ʻo Muimui ʻIate Au: Tohi ʻa Molomoná
ʻOku ʻUhinga ki he Hā ke Tohi e Huafa ʻo Kalaisí ʻi Hotau Lotó?
20–26 ʻEpeleli Mōsaia 4–6
ʻI he Tohi ʻa Molomoná, ʻoku ui ʻaki e kakaí ha ngaahi hingoa lahi—ko e kau Nīfaí, kau Leimaná, mo e kau ʻAnitai-Nīfai-Līhaí ko ha konga pē ia. Ka naʻe mokoi e Tuʻi ko Penisimaní ke ui ʻaki hono kakaí ha hingoa maʻongoʻonga mo māʻoniʻoni ange—ko e huafa ʻo Sīsū Kalaisí.
Ko e founga ʻeni ʻe lava ke tau tauhi ai ʻa e huafa ʻo e Fakamoʻuí ke “tohi maʻu ai pē ʻi [hotau] lotó” (Mōsaia 5:12):
Fuakava ʻi he Papitaisó
ʻI he papitaisó, ʻoku tau fuakava ai mo e ʻOtuá ke toʻo kiate kitautolu e huafa ʻo Kalaisí. ʻOkú ke pehē ʻoku ʻuhinga ia ki he hā? (Vakai, Mōsaia 18:8–9.)
Maʻu ʻa e Sākalamēnití
ʻOku fekauʻi kitautolu ke tau maʻu ʻa e sākalamēnití ʻi he taau ʻi he uike kotoa pē. Lolotonga ʻa e sākalamēnití, ʻoku tau toe tukupā ai ki heʻetau fuakava ke toʻo kiate kitautolu ʻa e huafa ʻo Sīsū Kalaisí (vakai, Molonai 4:3).
Ngāue ko ha Ākonga ʻo Kalaisi
ʻOku fie maʻu ʻi heʻetau ngaahi fuakavá ke tau tauhi e ngaahi fekaú. ʻOku totonu ke hoʻata mei heʻetau ngaahi angafaí ʻa ʻetau holi ke muimui kia Kalaisí pea hoko ʻo hangē ko Iá. ʻI heʻetau fai iá, ʻe lava ai ke hokohoko atu hono ui kitautolu ʻaki Hono huafá. Ko e founga ʻeni ke tau tauhi maʻu ai ʻa e huafa ʻo Kalaisí ke tohi ʻi hotau lotó (vakai, Mōsaia 5:12).