Mahuʻinga Ange ʻi ha Vesa Siliva

Silivia Houmeau

Kiupeki, Kānata

Tā fakatātaaʻi ʻe Emily Lui

ʻI he taimi ne kole mai ai ke u tataki ha fealēleaʻaki ʻi he Fineʻofá fekauʻaki mo e fakaafe ʻa e Fakamoʻuí ke fafanga ʻEne fanga sipí, ne u pehē ai kapau ʻoku ou loto ke fakaʻaiʻai e kau fefiné, ʻoku totonu ke u fai ha meʻa maʻa ha taha ʻo ʻEne fanga sipí.

Ne u feinga leva ke u loto-toʻa peá u fakaafeʻi ha fefine māmālohi ke ma ō ki ha ʻekitivitī ʻa e Fineʻofá. Naʻá ne tali ʻeku fakaafé pea ne ma maʻu ha taimi fiefia. Ne u ongoʻi ko ha sīpinga lelei ʻeni, pea ne u vēkeveke ke vahevahe ʻeku aʻusiá. Ka ne ʻi ai mo ha ngaahi meʻa kehe naʻe finangalo e ʻEikí ke akoʻi mai kiate au.

ʻI ha pongipongi ʻe taha lolotonga ʻeku teuteú, ne u fakatokangaʻi hake ne pulia hoku vesa silivá. Naʻe foaki mai e vesa ko ʻení kiate au ko ha meʻaʻofa ʻi hoku ʻaho fāʻeleʻí lolotonga ʻeku ʻeveʻeva ki Falaniseé, ko ia naʻe mahuʻinga makehe ia kiate au. Naʻe kamata ke u fakasio ia ʻi he ngaahi feituʻu ne u pehē ʻe ala maʻu aí, ka ne ʻikai ke u maʻu ia. Ne u pehē loto leva kapau pē te u lotu, ʻe vave ange ai haʻaku maʻu hoku vesá.

Hili ʻeku lotú, ne u fakasio he feituʻu kotoa pē. Ne u lotu mo fekumi fakamātoato ʻi ha ʻaho ʻe ua. Ne u kole ki he Tamai Hēvaní ke Ne tokoni mai ke u maʻu ia, ka ne ʻikai pē ke u maʻu ia. Ne u loto-mamahi ʻaupito he naʻe mahuʻinga ʻaupito e vesa ko ʻení kiate au.

ʻI ha efiafi ʻe taha, ne u lotu ai mo hoku fohá ʻi hoku veʻe mohengá. Hili ʻema lotú, naʻá ne toʻo hake ha meʻa ʻo mono mai kiate au. Ko hoku vesá ia! Naʻá ne maʻu ia ʻi he lalo mohengá. Mahalo ne ʻikai ke u fakatokangaʻi ia ʻi heʻeku kumí. Ne u tangi ʻi heʻeku fiefia ʻi hono toe maʻu mai iá.

Fakafokifā, kuo haʻu ha fakakaukau kiate au: “ʻOku pehē nai hoʻo lotu fakamātoato maʻa ho ngaahi tokoua ʻi he Siasí? ʻOku nau mahuʻinga nai kiate koe ʻo tatau mo ho foʻi vesá? Fēfē ho ngaahi tokoua ʻi tuʻa he Siasí? ʻOkú ke lotua nai mo kinautolu?”

ʻI he taimi ne u vahevahe ai ʻeku aʻusia ki heʻeku foʻi vesá ʻi he Fineʻofá, ne mau fealēleaʻaki mālie. Ne u talaange ki he kau fineʻofá kuó u ako ko e taimi ʻoku kole mai ai ʻe he Fakamoʻuí ke tau fafanga ʻEne fanga sipí, kuo pau ke tau manatuʻi “‘oku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10). ʻOkú Ne finangalo ke tau manatuʻi ʻa kinautolu ʻoku tau feohí pea ofa, tokanga, mo lotua kinautolu ʻaki hotau iví kotoa. ʻI heʻetau fai iá, te tau ʻilo ai ʻoku mahuʻinga fau ange ʻa e tokotaha kotoa pē ʻi ha foʻi vesa siliva.