Kuo Toe Fakafoki Mai e Siasi ʻo Sīsū Kalaisí!

Kimuʻa pea tau omi ki he māmaní, ne tau nofo mo ʻetau Ongomātuʻa Fakalangí. Ne Na ʻofa ʻiate kitautolu! Naʻe ʻi ai ha palani maʻongoʻonga ʻa e Tamai Hēvaní maʻatautolu. Te tau omi ki he māmaní ke tau maʻu ai ha sino pea mo ako mo tupulaki. Pea te tau toe foki hake leva ke nofo ʻi hotau ʻapi fakalangí. Ka ne ʻikai ke tau lava ʻo fakahoko ia ʻiate kitautolu pē. Ne tau fie maʻu ha tokoni.

Naʻe fili ʻe he Tamai Hēvaní hotau tuongaʻane/tokoua lahi taha ko Sīsū Kalaisí ke Ne hāʻele mai ki he māmaní ke tokoniʻi kitautolu. Naʻe fakahaaʻi mai ʻe Sīsū e founga ke tau ʻofa ai ki he niʻihi kehé mo muimui ki he ngaahi fekau ʻa e Tamai Hēvaní. Naʻá Ne fili ha kau ʻAposetolo ke tataki Hono Siasí.

Naʻe mamahi leva ʻa Sīsū maʻatautolu ʻi he Ngoue ko Ketisemaní. Naʻá Ne ongoʻi hotau mamahí mo e faingataʻaʻiá kotoa. Naʻá Ne pekia maʻatautolu ʻi he kolosí. Koeʻuhí ko e meʻá ni, te tau lava ʻo tafoki kiate Ia ʻi he taimi ʻoku tau kafo pe mamahi pe fie maʻu tokoni aí. Te tau lava ʻo fakatomala ʻi he taimi ʻoku tau fehālaaki aí.

ʻI he ʻaho hono tolu hili e pekia ʻa Sīsuú, naʻá Ne toetuʻu. Ne toe moʻui ʻa Sīsū! Koeʻuhí ko e meʻá ni, te tau toetuʻu foki mo kitautolu. Te tau lava ʻo nofo ʻi hēvani hili ʻetau maté.

Hili e Toetuʻu ʻa Sīsuú, naʻá Ne ʻaʻahi ki Heʻene kau ākonga ʻi Selusalema pea mo e Ongo ʻAmeliká. Naʻá Ne kole ki Heʻene kau ʻAposetoló ke hokohoko atu ʻenau akoʻi e kakaí fekauʻaki mo ʻEne ongoongoleleí. Naʻe papitaiso ʻa e kakai tokolahi ne fanongo ki he kau ʻAposetoló pea naʻa nau kau ki he Siasí.

Hili e mālōlō ʻa e kau ʻAposetoló, naʻe kamata ke ngalo ʻi he kakaí ha niʻihi ʻo e ngaahi konga mahuʻinga ʻo e ongoongolelei ʻa Sīsuú. Ne ʻikai ke nau toe tui ʻe ueʻi fakalaumālie maʻu pē ʻe he Tamai Hēvaní ʻEne fānaú ʻi he māmaní. Naʻe ngalo ʻiate kinautolu ʻe maʻu ʻe he tokotaha kotoa pē ʻi he māmaní ha faingamālie ke papitaiso. Ne ʻikai ke nau toe tui ʻe tataki maʻu pē ʻe he kau palōfitá mo e kau ʻaposetoló e Siasí.

Naʻe ʻosi mei ai ha ngaahi taʻu lahi. Naʻe faifai pea aʻu ki he taimi ke fakafoki mai ai e ngaahi konga ne mole mei he ongoongolelei ʻo Sīsuú. Naʻe taimi ke toe fakafoki mai ʻa Hono Siasí! Naʻe fie maʻu ʻe he Tamai Hēvaní ha tokotaha ke hoko ko ha palōfita pea tokoni ke fakafoki mai ia ki he māmaní. Naʻá Ne fili ha kiʻi tamasiʻi ko hono hingoá ko Siosefa Sāmita.

ʻI ha ʻaho ʻe taha, naʻe lau ai ʻe Siosefa e Tohi Tapú. ʻI he Sēmisi 1:5, naʻe pehē ai ʻe tali ʻe he Tamai Hēvaní ʻetau ngaahi fehuʻí ʻi he taimi te tau kole ai ʻi he tuí. Naʻe ʻi ai ha fehuʻi ʻa Siosefa! Naʻá ne ʻiloʻi ne lahi ha ngaahi siasi ne nau akonaki fekauʻaki mo Sīsū. Ka naʻá ne loto ke ʻiloʻi pe ʻoku ʻi ai nai ha siasi hangē ko e Siasi ʻo Sīsū ʻi he Fuakava Foʻoú.

ʻI ha ʻaho fakaʻofoʻofa ʻe taha fakafuofua ki he taimi Toetuʻú, naʻe ʻalu ʻa Siosefa ki he vao ʻakau ne ofi ki hono ʻapí. Naʻá ne tūʻulutui pea kamata ke ne lotu. Pea naʻe ongoʻi ʻe Siosefa ha ngaahi ongo fakapoʻuli. Naʻe feinga ʻa Sētane ke fakalotosiʻi ia. Ka naʻe kei lotu pē ʻa Siosefa ʻaki hono iví kotoa.

Pea naʻe maliu hifo leva ha maama fakaʻofoʻofa. Naʻe mamata ʻa Siosefa ki he Tamai Hēvaní mo Sīsū Kalaisi. ʻOku ui ʻeni ko e ʻUluaki Mata Meʻa-Hā-Maí. Ne Na pehē ʻoku ʻikai ke ʻi he māmaní e Siasi ʻo Sīsuú. Ka ʻe vavé ni mai pē. Naʻe kamata hono Toe Fakafoki Mai ʻo e Ongoongoleleí!

Naʻe fekauʻi hifo ʻe he Tamai Hēvaní ha kau ʻāngelo ke fakafoki mai e ngaahi konga mahuʻinga ʻo e ongoongoleleí. Naʻe ʻoange ʻe he ʻāngelo ko Molonaí kia Siosefa ʻa e ʻū lauʻi peleti koulá koeʻuhí ke tau maʻu e Tohi ʻa Molomoná ke tokoni ke tau ako fekauʻaki mo Sīsū Kalaisi.

Naʻe fakafoki mai ʻe Sione Papitaiso e Lakanga Taulaʻeiki Faka-ʻĒloné koeʻuhí ke tau lava ʻo papitaiso. Naʻe ʻomi ʻe Pita, Sēmisi, mo Sione e Lakanga Taulaʻeiki Faka-Melekisētekí koeʻuhí ke tau lava ʻo maʻu e Laumālie Māʻoniʻoní mo maʻu ha ngaahi tāpuaki ʻi he taimi ʻoku tau puke aí.

Naʻe haʻu ʻa ʻIlaisiā koeʻuhí ke lava ʻo silaʻi kitautolu ki hotau ngaahi fāmilí ʻi he temipalé.

Naʻe fokotuʻu e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko hono ʻuhingá, kuo toe ʻi he māmaní e Siasi ʻo Sīsuú! ʻOku kau kotoa e ngaahi meʻá ni ʻi hono Toe Fakafoki Mai ʻo e Ongoongoleleí.

ʻOku kei hokohoko atu pē he ʻahó ni hono Toe Fakafoki Mai ʻo e ongoongoleleí. ʻOku vahevahe ʻe he kau palōfitá, kau ʻaposetoló, kau faifekaú mo e kāingalotú e ngaahi ongoongo lelei ʻo Sīsū Kalaisí ʻi he funga ʻo e māmaní. ʻOku langa e ngaahi temipalé ʻi ha ngaahi fonua lahi koeʻuhí ke lava ʻo silaʻi ai e kakaí ki honau ngaahi fāmilí ʻo taʻengata. Pea ʻoku tokoni e Siasí ki he kakai ʻi he ngaahi feituʻu ʻoku ʻi ai ʻa e fiekaiá pe fakatamakí.

ʻE lava ʻe he tokotaha kotoa pē ke ne fakahoko ha meʻa ke tokoni ki hono Toe Fakafoki Mai ʻo e Ongoongoleleí. Te ke lava ʻo tokoni ʻaki haʻo ako fekauʻaki mo hoʻo hisitōlia fakafāmilí mo hono fakahoko e papitaiso ʻi he temipalé. Te ke lava ʻo foaki ha vahehongofulu ke langa ha ngaahi falelotu mo ha ngaahi temipale. Te ke lava ʻo fai ha foaki ʻaukai ke tokoni ki he kakai faingataʻaʻiá. Te ke lava ʻo malanga ki he kakaí fekauʻaki mo Sīsū Kalaisi.

Naʻe ʻomi ʻe Sīsū Hono Siasí ke tokoniʻi kitautolu ke tau toe foki hake ki hotau ʻapi Fakalangí. Te tau lava ʻo maʻu ʻa e sākalamēnití mo manatuʻi maʻu pē ʻa e meʻa naʻá Ne fai maʻatautolú. Te tau lava ʻo fakahaaʻi ʻetau ʻofa ki he niʻihi kehé, ʻo hangē ko ia naʻá Ne faí. Te tau lava ʻo tokoni ki he tokotaha kotoa pē ke nau ako fekauʻaki mo ʻEne ongoongoleleí! ●

Tā fakatātaaʻi ʻe Apryl Stott