Haʻu, ʻo Muimui ʻIate Au: Tohi ʻa Molomoná
Ko e Hā e ʻUhinga ʻo e Toetuʻú Kiate Aú?
30 Māʻasi–12 ʻEpeleli Toetuʻú
ʻOku tau fakamanatu ʻi he Toetuʻú “ʻa e ʻaho mahuʻinga taha ʻi he hisitōliá”1—ʻa e Toetuʻu ʻa hotau Fakamoʻui ko Sīsū Kalaisí. ʻOku mahuʻinga ʻeni ki he palani ʻo e fiefia ʻa e Tamai Hēvaní.
ʻI he moʻui he maama fakalaumālié, naʻe fili ai ʻa Sīsū Kalaisi ke Ne hoko ko hotau Fakamoʻuí. Naʻá Ne palōmesi te Ne ʻomi ʻa e founga ʻe lava ke fakamolemoleʻi ai kitautolu mei heʻetau ngaahi angahalá pea ke tau foki hake ai ki hotau ʻapi fakalangí.
ʻI he ʻuluaki pongipongi ʻo e Toetuʻú, naʻe fakahoko ai ʻe Sīsū ʻEne palōmesí. Naʻá Ne ikunaʻi ʻa e maté. Ko hono olá, “Ko ia ʻa e maama mo e moʻui ʻo e māmaní; ʻio, ko ha maama ʻoku ʻikai hano ngataʻanga, ʻa ia ʻoku ʻikai lava ʻo tāmateʻi; ʻio, kae ʻumaʻā foki ha moʻui ʻa ia ʻoku ʻikai hano ngataʻanga, koeʻuhi ke ʻoua naʻa toe ʻi ai ha mate” (Mōsaia 16:9).
Ko e hā e ngaahi tāpuaki ʻoku ʻomi ʻe he Toetuʻú maʻaú?
Fakatomalá
ʻOku fehuʻi mai ʻe Sīsū Kalaisi kiate kitautolu kotoa, “ʻIkai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhi ke u fakamoʻui ʻa kimoutolu?” ʻOkú Ne talaʻofa mai, “Ko ia ia ʻe haʻú, te u maʻu ia” (3 Nīfai 9:13–14). Ko e hā e ongo ʻokú ke maʻu he taimi ʻokú ke fakatomala aí?
Toetuʻú
Kuo pau ke hoko ʻa e maté, ka ʻoku fakapapauʻi mai ʻe hono ikunaʻi ʻe he Fakamoʻuí ʻa e maté, te tau toetuʻu kotoa pē—ʻo toe fakatahaʻi ʻa e sinó mo e laumālié ʻi hono tuʻunga haohaoá (vakai, ʻAlamā 11:43). ʻOku ʻomi fēfē ʻe he ʻilo fekauʻaki mo e Toetuʻú ha ʻamanaki lelei kiate koé?
Moʻui Taʻengatá
ʻOku hanga ʻe he Fakalelei ʻa e Fakamoʻuí ʻo fakalava ʻa e moʻui taʻengatá mo e hakeʻakiʻí. Ke maʻu ʻa e tāpuaki ko ʻení, kuo pau ke tau talangofua ki he ngaahi fekaú. Kuo ui ʻe Palesiteni Lāsolo M. Nalesoni ʻa e hala ki he moʻui taʻengatá “ko e hala ʻo e fuakavá.”2 Ko e hā kuo pau ke tau fai ke muimui ai ʻi he hala ko ʻení ki he moʻui taʻengatá?