Mga Young Adult

Pagharap sa Walang-Katiyakang Kinabukasan nang May Pananampalataya

Mahilig akong magplano. Gusto kong malaman kung ano ang aasahan sa araw-araw, upang maging handa ako para doon. Pero paano ako maghahanda para sa hinaharap gayong ito ay napakalayo pa at walang-katiyakan?

Napakahaba ng buhay. Napakaraming naghihintay sa hinaharap! Napakaraming maaaring mangyari! Napakarami kong magagawa! Kung minsan nakakalula ang mga posibilidad.

Marami akong gusto: makapag-asawa, magkaroon ng magandang trabaho, mangibang-bansa, magmay-ari ng isang pusa, magsulat ng isang nobela, matuto ng wikang Ruso … Pero alam ko rin na nagbabago ang mga hangarin at mithiin. Nagbabago ang mga prayoridad.

Ang isang prayoridad na hindi dapat magbago ay ang ating katapatan sa Diyos at sa Kanyang plano. Sa tulong ng Kanyang plano, makakapaglakbay tayo sa isang hinaharap na puno ng mga tanong dahil tutulungan Niya tayong mahanap ang mga sagot, nang paisa-isang hakbang. Kailangan lang nating gawin ang pinakamainam na pagpiling magagawa natin sa bawat hakbang.

Sa bahaging ito, ibinahagi ng mga young adult ang kanilang mga personal na karanasan kung paano sila nagpaplano para sa kanilang hinaharap sa tulong ng Ama sa Langit at kung paano sila sumusulong nang may pananampalataya kapag nahaharap sa napakaraming kawalang-katiyakan.

Pagdating sa hinaharap, napakaraming tanong, ngunit ang ibig lang sabihin niyon ay napakaraming potensyal. May potensyal din tayo—banal na potensyal na maging katulad ng ating Ama sa Langit at ng Kanyang Anak na si Jesucristo.

At dahil doon ay maluwalhati ang ating hinaharap.

Meg Yost

Mga kabatiran …

Mula sa mga young adult

tungkol sa pagkakaroon ng pananampalataya sa hinaharap

“Tuwing umaga hinihiling ko sa Diyos na tulungan akong gawin kung ano ang nais Niyang ipagawa sa akin. Malaking tulong ito sa akin!”

—Ciara Galvin, Iowa, USA

“Magkaroon ng walang-hanggang pananaw—mayroon pang mga bagay na mangyayari sa hinaharap na mas maganda kaysa sa nangyayari ngayon. Napagtanto ko na maraming bagay na hindi ko kayang kontrolin. Pero maaari akong magtiwala sa Panginoon at sa Kanyang takdang panahon.”

—Claire Parsons, Western Australia, Australia

“Gawin ang lahat ng makakaya mo ngayon! Tutulungan ka ng Panginoon.”

—Anli Emano, Philippines

“Huwag kang mag-alala tungkol sa hinaharap; maglalaan ang Diyos. Patuloy ka lang magdasal at manalig sa Kanya. Alam Niya ang iyong mga pangangailangan.”

—Wamboi Jumah, Kenya

Mula sa mga lider ng Simbahan

“Ang ipinanumbalik na ebanghelyo ni Jesucristo ay naghihikayat sa atin na pag-isipan ang hinaharap. Ipinaliliwanag nito ang layunin ng mortal na buhay at ang katotohanan ng kabilang-buhay. Nagtuturo ito ng magagandang ideya tungkol sa hinaharap na gagabay sa mga ginagawa natin ngayon. …”

“Pag-isipan ang matagalang ibubunga ng pinili ninyo. Ano ang epekto sa ating hinaharap ng mga desisyong ginagawa natin sa kasalukuyan? Alalahanin ang kahalagahan ng pagtatapos sa pag-aaral, pag-aaral ng ebanghelyo, pagpapanibago ng ating mga tipan sa pamamagitan ng pagtanggap ng sakramento, at pagpunta sa templo.”

Pangulong Dallin H. Oaks, Unang Tagapayo sa Unang Panguluhan, “Saan Ito Hahantong?” Liahona, Mayo 2019, 60, 61.

Paano mo nakayanan ang malalaking pagbabago sa buhay, tulad ng pag-uwi mula sa misyon, paglipat ng tahanan, o pag-aasawa? Ipadala sa amin ang iyong sagot sa liahona.ChurchofJesusChrist.org bago sumapit ang Hulyo 31, 2020.

Ibahagi ang Iyong Kuwento

May karanasan ka bang maibabahagi? O may mga artikulo ka bang nais makita tungkol sa ilang paksa? Kung gayon, nais naming makarinig mula sa iyo! Maaari mong ipadala ang iyong mga artikulo o feedback sa liahona.ChurchofJesusChrist.org.

Hanapin ang mga artikulong ito at ang iba pa:

• Sa liahona.ChurchofJesusChrist.org

• Sa Lingguhang YA (sa ilalim ng bahaging Mga Young Adult sa Gospel Library)