Kallim̧ur in Kanaan ko

Jān Elder Daniel G Hamilton

Eria Jiljilimjuonn̄oul eo

Jān kar Eprōļ 2020 Kweilo̧k eo Eļap ekabwilōn̄lōn̄, iaar ļōmņak kōn naan in, Kallim̧ur in Kanaan ko.

Kwar ke ron̄ kaki? Kwoj ke mour kaki?

Jān eoon ko ruo ilo Katak im Bujen Ko jej bōk kōļmenļo̧kjeņ ko kōn Kallim̧ur in Kanaan ko.

Moktata, jekjōn 1:38 ej katakin bwe n̄e ro rikarejeran Irooj, rikanaan ro An, rej kōnono, ej āinwōt n̄e Irooj make ej kōnono; “. . . mekarta jān Ainikiō make ak jān ainikien ro rikarejera, ej āinwōt juon.”

Kein karuo, jekjōn 82:10 kobaiktok naan in ekajoor; “N̄a, Irooj, Inaaj kōm̧m̧ane kallim̧ur ko aō n̄e kom̧ij kōm̧m̧ane ta eo Ij ba; ak n̄e kom̧ij jab kōm̧m̧ane ta eo Ij ba, kom̧ ejjeļo̧k ami kallim̧ur.”

Men̄e eoon kein ruo kar bōki im kar je revelesōn ko reoktak jān doon, eļan̄n̄e rej riit ippān doon ennaan eo aer ej bōktok juon meļeļe kāāl, meļeļein im kajoorin.

Kobaik pedped in katak ko ippān doon ilo eoon kein ruo, rej kam̧ool n̄an kōj, bwe āinwōt Rikanaan ro, Rilolo ro, Ribōk Revelesōn ro remour rej ba, “Ij kallim̧ur” bwe Irooj ej pen kōn kallim̧ur in, eļan̄n̄e jej mour kake ta ko remenin aikuj bwe jen kōm̧m̧ani m̧okta pedped wōt ioer n̄an bōk kōjeraam̧m̧an ko kar kallim̧ur kaki.¹

Ewōr jilu bun̄tōn ne ko n̄an mour kaki, Kallim̧ur in Kanaan ko.

Eaorōktata pukoti.
Kile ta eo emenin aikuj n̄an kōkarbōbi n̄ani.
Mour ekkar n̄an mour kaki.

Ratimjuon Kallim̧ur in Kanaan ko kar kwalo̧ki ilo Eprōļ 2020 Kweilo̧k eo Eļap.

Būreejtōn Russell M. Nelson; “Moktaļo̧k, iaar kallim̧ur bwe eļan̄n̄e jej kōm̧m̧ane ijo koņaad em̧m̧antata n̄an kōjepļaaktok jim̧we in etan Kabun̄ in an Irooj, E enaaj lutōkleplep laļtak An kajoor im kōjeraam̧m̧an ko ioon bōran Armej ro Rekwojarjar ilo Raan Ko Āliktata, āinwōt ko jejjan̄in kar loi. Iaar kōkāāl kallim̧ur in rainin.”²

“Ij kallim̧ur bwe ilo am̧ joļo̧k eļap am̧ iien ilo tampeļ im jerbal in menmenbwij an baam̧le, enaaj ļapļo̧k im em̧m̧anļo̧k am̧ maron̄ ron̄jake E.”³

Ilo ejja kōnono eo rikanaan eo an Irooj ekar kakobaba, “Ta en enaaj waļo̧k n̄e kwonaaj ron̄, im lale ta eo Irooj eaar ba im ta eo Ej ba kiiō kōn rikanaan ro An? Ij kallim̧ur bwe kwonaaj jeraam̧m̧an kōn eļapļo̧k kajoor n̄an jum̧ae kapo, apan̄ ko, im m̧ōjņo̧ ko. Ij kallim̧ur kōn kabwilōn̄lōn̄ ko ilo m̧are eo am̧, jemdo̧o̧n ko an baam̧le, im jerbal ko kajjojo raan. Im Ij kallim̧ur bwe am̧ maron̄ n̄an en̄jake m̧ōņōņō enaaj ļaplo̧k men̄e lōkabokbok ko renaaj ļapļo̧k ilo mour eo am̧.”⁴

Ilo kiil kweilo̧k eo Būreejtōn Nelson ekar door ippād kallim̧ur in; “Kōmij jar bwe kwonaaj jino juon ijjino ekāāl em̧ool n̄an ron̄jake, im ron̄jake naan ko an Rilo̧mo̧o̧r. Ij kallim̧ur bwe mijak enaaj dikļo̧k im tōmak enaaj ļapļo̧k.”⁵

Elder Neil L Andersen; “Ij kallim̧uri eok bwe ilo am̧ m̧ōņōņō in kile im kea im kaorōk men ko an jetōb ilomour eo am̧, enaaj ļōn̄ļo̧k men rej itok n̄an eok.”⁶

Elder Ulisses Soares ej kōnono kōn Bok in Mormon eaar ba; “Ij kalllim̧uri kom̧ bwe ilo jar im lukkuun ekkatak naan ko ie, kwomaron̄ bōk m̧ōttan kallim̧ur ko im kōjeraam̧m̧an ko ejej uwaer ilo mour eo am̧. Ij kapen bar juon alen kallim̧ur eo me ej waļo̧k ilo aolepān peij ko an: “kajjitōk ippān Anij, Jemān Indeeo, ilo etan Kraist, eļan̄n̄e men kein rejjab m̧ool; im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist,” An tūriam̧o “jān kajoor eo an Jetōb Kwojarjar kom̧ maron̄ jeļā m̧ool eo an men ko otemjeļo̧k.”⁷

Elder Ronald A Rasband; “Ij kallim̧ur bwe eļan̄n̄e kwoj ļoor kapilōk eo eim̧we an rikanaan eo ad, Būreejtōn Russell M. Nelson, rikakpilōklōk ro an, Rijilōk ro, im ritōl ro jet an Kabun̄ in, im ilo am̧ eo̧ron̄ rikanaan ro etto ro me rekar kanaan kōn raan kein ad, kwonaaj obrak, ilo tum̧ūlaļ in buruwōm̧ im am̧, kōn jetōb im jerbal in Jepļaaktok in. Ij kallim̧ur bwe kwonaaj lo pein Anij ilo mour eo am̧, ron̄jake unoojdikdik ko An, im en̄jake iakwe eo An.”⁸

Ij kwaļo̧k aō kam̧m̧oolol em̧wilaļ kōn tōl eo an Rikanaan ro remour, Rilolo ro, im Ribōk Revelesōn ro. Ewi jon̄an an em̧m̧an n̄an bōk tōl eo aer eim̧we im waanjon̄ak in wūjlepļo̧k n̄an Irooj Jisōs Kraist.

Ij kwaļo̧k aō kam̧ool bwe Jemedwōj Ilan̄ ej ron̄jake im uwaake jar ko ad. N̄e Rikanaan ro, Rilolo ro im Ribōk Revelesōn ro rej kōm̧m̧ani kallim̧ur ko n̄an kōj, kallim̧ur ko naaj kautieji eļan̄n̄e jej mour ilo jejet n̄an mour kaki. Āindein aō kam̧ool bwe Jisōs ej RiKraist eo, meļeļein, kar Messaia eo etto im Rilo̧mo̧or eo an laļ. Ej mour!