Jeraam̧m̧an Ilōn̄in Ettōņak ko Aō

Ita Futialo Galu

Ke ikar juon ajri ilo āne ko ilo Samoa, ro m̧ōtta rekar ba n̄an eō ke ro uwaan Kabun̄ eo an Jisōs Kraist im Armej ro Rekwojarjar ilo Raa Ko Āliktata—ņa etad ‘Mormon ro’—raar kabun̄jar n̄an Josep Smith. Ikar tōmake er.

Juon iaan rūkaki in jikuuļ ro aō, Viena Tanuvasa, kar juon membōr in kabun̄ eo an Josep Smith. Jet iien ij pād juon ak ruo raan ippān baam̧le eo an Sister Tanuvasa. Ijo in ikar ron̄ jinointata al in jar jān kabun̄ eo aer: “If the day be full of trial, weary not.”

Ej al in jar eo em̧m̧antata ippa.

Sister Tanuvasa ekkā an karuwaineneik eō n̄an etal im jar ippān, ak iaar jab kōņaan kaburom̧ōj ak jab kautiej baam̧le eo aō make, ro raar membōr ro rekajoor ilo bar juon kabun̄ ilo jikin am̧.

Tokālik, iaar jokwe ippān ro nuku ilo Auckland, New Zealand. Kapijuknen eo am ilo jikin eo edik ilo Otara ekar bwe an ettoļo̧k n̄e jej ettōrļo̧k jān im̧ōn jar eo am, kōn menin ekar jab emakijkij aō etal im jar.

Juon raan, iaar etal ippān juon m̧ōttaļo̧k n̄an joļo̧k juon pākij ippān juon mijinede. Iaar lo ke ekar juon mijinede jān ejja kabun̄ eo wōt an Sister Tanuvasa. Mijinede in m̧ōttan ekar diwōjtok jān wa eo. Eaar kwaļo̧k kadkadin make im letok n̄an eō juon kape in Bok in Mormon. Eaar ba bwe ij aikuj riiti kōnke enaaj jipan̄ eō jeļā eļapļo̧k kōn Jisōs Kraist. Eaar bar ba ij aikuj jar im kajjitōk ippān Jemedwōj Ilan̄ eļan̄n̄e bok in ej m̧ool.

Iaar jab riiti.

Ruo wiik ko tokālik, ijoke, mijinede in eaar kaļļaļļaļ ilo kōjem eo aō im iaar kōdeļo̧n̄e. Iaar jeļā bwe baam̧le eo aō reban kar kōdeļon̄tok mijinede ro n̄an m̧weeo m̧ōm̧, ak iaar kajjitōk n̄e imaron̄ kar ioon er ilo juon iaan m̧ōnjar ko aer. Raar errā im tokālik, kōn jipan̄ eo an jet sister ilo doulul eo an kōrā ro jān ward eo aer, raar katakin eō kōn gospel eo an Jisōs Kraist.

Ekar lukkuun itoklimou, ikar kōņaan jeļā elōn̄ļo̧k. Ikar loļo̧k ward eo aer im kar karuwaineneik eō n̄an Nokon in Jota an baam̧le eo aer, im iaar en̄jake em̧m̧an kōn aolep men ko ikar ekkatak kaki . . . ijelo̧kin wōt juon men.

Ikar ļōmņak kōn tōre ko aō m̧oktaļo̧k ilo Samoa, etke jet iien ij kakūtōtōik Mormon ro m̧ōtta. Iaar jeļā bwe m̧okta jān aō bar ekkatak wōt ippān mijinede ro, iaar aikuj in jeļā m̧ool eo kōn Josep Smith.

Iaar lo ta eo iaar aikuji ilo jinoin kōn Bok in Mormon. Ke iaar riiti bwebwenato in Visōn eo Jinoin an Josep Smith—kōn jar eo an ilo bukwin wōjke ko im kōn loļo̧k eo ekwbwilōn̄lōn̄ jān Jemedwōj Ilan̄ im Jisōs Kraist—iaar jeļā ilo būruwō bwe aolep men kar je ijin raar m̧ool. Im̧ōn jar eo an ekar jab kabun̄ jar n̄ane, ak ekar m̧ool in juon rikanaan an Anij.

Innām iaar kōm̧m̧an aō kāālet ilo iien eo bwe ikar kōņaan peptaij.

Naan in kam̧ool eo aō kōn Josep Smith ekar wōnm̧aanļo̧k im kōkajoor eō ilo iiō ko.

Ikar po juon iien bwe in diwōjļo̧k jān ward eo aō bwe ikar en̄jake an jejjo sister ilo Doulul eo an Kōrā ro jab karuwaineneik eō. Keememej bwe iien otemjej Josep Smith eaar bōkļo̧k apan̄ ko an n̄an Irooj, iaar ļoor waanjon̄ak eo an im lukkuun jar n̄an Jemedwōj Ilan̄ kōn kajjitōk ko aō ilo kabun̄ in. Iaar jeraam̧m̧an kōn juon lōke im jeļā bwe jemdo̧o̧n eo aō ippān Anij enaaj jipan̄ ļōn̄aj lōn̄ļo̧k eō jān jabdewōt kabweerer ko.

Jeļā bwe Josep Smith ekar bōk eļap eddo ke eaar dik wōt kar jipan̄ eō bōk kūr ko ilo ward eo aō, men̄e ikar jab pojak kaki. N̄e Jemedwōj Ilan̄ eaar kōkajoor Josep eo edik, enaaj bar kōkajoor eō.

Ikar jino lukkuun nan̄inmej im ikar kajjitōk kōn juon priesthood kōjeraam̧m̧an. Ālkin kōjeraam̧m̧an eo, kōm kar lo bwe ikar jab aikuj in m̧wijm̧wij. En̄jake in ekar kakeememej eō bwe aolep iien Josep Smith ekar jeļā bwe Jemedwōj Ilan̄ enaaj kōjparok e.

Ij lukkuun m̧ōņōņō bwe iaar kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata im kōn rikanaan Josep Smith. Kōn tōmak eo an im wūjlepļo̧k ko an rellōn̄ kōn gospel in an Jisōs Kraist me em̧ōj an jepļaaktok, ej kōjeraam̧m̧an baam̧le eo aō im n̄a ilōn̄in jabdewōt ta eo ij etōņake ļo̧k me emaron̄ bōk jikin.