Digital Lamang: Mga Young Adult
Pagkaplag og Emosyonal nga Kalig-on diha ni Kristo atol sa Akong Pabalik-balik nga mga Hagit sa Kahimsog
Ang tagsulat nagpuyo sa Chile.
Sa dihang nahiling ko og usa ka dili matambalan nga sakit, midangop ko ngadto kang Kristo alang sa kalinaw.
Nabunyagan ko sa dihang usa pa ako ka tin-edyer, ug gimahal nako ang ebanghelyo ni Jesukristo. Apan, paglabay sa panahon, mibati ko nga dili na kaayo madasigon sa pagsunod sa ebanghelyo tungod kay walay bisan usa nga miyembro sa akong pamilya ug lisod ang pagpadayon sa akong espirituhanon nga mga naandan nga ako rang usa.
Kanunay kong nasayod nga ang Simbahan tinuod, apan dili nako gustong ihatag ang akong tibuok nga paningkamot niini, tungod kay dako kini nga pasalig. Ang akong pagtambong sa simbahan nahimong dili kanunay. Dayon nagsugod ko sa paghatag og prayoridad sa akong sosyal nga kinabuhi kaysa pagsunod sa ebanghelyo, ug sa kadugayan mihunong ko sa pagsunod sa kasugoan. Nangatarongan ko sa akong mga binuhatan pinaagi sa pagsulti nga mahimo ra nga buhaton ang bisan unsa nga akong gusto, basta lang naningkamot ko nga mahimong usa ka maayo nga tawo.
Apan kana nga desisyon adunay negatibo nga mga sangpotanan kanako.
Human nga wala magsunod sa mga sugo sa Simbahan sa taas nga panahon, nagpositibo ko sa human immunodeficiency virus (HIV). Kini nga kondisyon balik-balik, magkagrabe, ug walay tambal. Nasagmuyo ako.
Nangutana ko sa sama nga mga pangutana nga segurado ako nga daghan kanato ang nangutana kon mag-atubang og makapabaldado nga mga sakit o ubang balik-balik nga mga hagit: Unsaon na man lang nako pagtagamtam pag-usab ang kinabuhi? Unsaon man nako pagbaton og paglaom alang sa bisan unsang butang?
Ang tubag?
Si Jesukristo.
Pagbutang sa Akong Tibuok Kasingkasing sa Ebanghelyo
Nianang lisod kaayo nga higayon, sa dihang nadawat nako ang akong dayagnosis ug nangamuyo alang sa kahupayan, nabati nako nga ingon og ang Langitnong Amahan ug si Jesukristo hingpit nga nasayod kon unsa ang akong gibati. Ang Espiritu mihatag kanako og katin-awan nga nakatabang kanako sa pagpamalandong sa akong mga desisyon.
Akong naamgohan nga gikinahanglan nako nga dapiton pag-usab ang Manluluwas diha sa akong kinabuhi aron makakita ko og malungtaron nga kalinaw. Mao nga, nakig-appointment ko sa akong bishop ug presidente sa stake aron sugdan ang proseso sa paghinulsol.
Samtang nakigtambayayong ko uban niining maayo nga mga lider, nabati nako ang ilang gugma ug suporta, ug ang makaabag nga gahom ni Jesukristo misulod pag-usab sa akong kinabuhi. Ang akong mga lider mitabang kanako sa pagtakda og mga tumong. Nagsugod ko sa pag-uswag sa dalan sa pakigsaad. Gibutang nako ang akong tibuok kasingkasing sa ebanghelyo alang sa unang higayon sa akong kinabuhi, ug nakita nako ang kalainan sa akong kaugalingon sa dihang giuna nako ang akong relasyon sa Langitnong Amahan ug sa Manluluwas.
Si Sister Amy A. Wright, Unang Magtatambag sa Kinatibuk-ang Kapangulohan sa Primary, bag-ohay lang mitudlo mahitungod kon sa unsang paagi ang Manluluwas makatabang kanato sa pagpangita og paglaom ug hingpit nga kalipay bisan pa man sa atong lisod nga mga kahimtang:
“Si Jesukristo mao ang ‘paglaom alang sa imong kaugmaon.’ Walay gibuhat nato o wala mabuhat nga lapas sa makab-ot sa Iyang walay kataposan ug mahangtorong sakripisyo. Siya ang hinungdan ngano nga dili pa gayod kini ang kataposan sa atong istorya. …
“Ang mahangtorong kinabuhi mao ang mahangtorong kamaya. Ang hingpit nga kamaya niini nga kinabuhi, karon dayon—dili bisan pa man sa mga hagit sa atong panahon apan tungod sa tabang sa Ginoo nga makat-onan ug sa kataposan mabuntog kini—ug dili masukod nga kamaya sa umaabot nga kinabuhi.”
Kini nga kamatuoran sa kalipay mipakita sa akong kinabuhi samtang mipadayon ko sa pagtutok Kaniya ug, sa makausa pa, hugot nga paggunit sa gunitanan nga puthaw—ang pulong sa Dios—sa matag adlaw (tan-awa sa 1 Nephi 15:23–24).
Pagkaplag og Emosyonal nga Kalig-on atol sa Lisod nga mga Panahon
Samtang mipadayon ko sa pagpangita og kahupayan ug sa pagsagubang sa akong sakit, ang akong bishop midirekta kanako ngadto sa kurso sa pagbarog pinaagi sa kaugalingong paningkamot sa Simbahan nga “Pagkaplag og Kalig-on diha sa Ginoo: Emosyonal nga Kalig-on.”
Nagtuo ko nga kini nga kurso hinatag sa Dios, dinasig, ug milagroso. Nakat-onan nako kon unsaon paghimo niini nga sakit, nga naghimo sa akong kinabuhi nga ingon og walay paglaom, ngadto sa usa ka kasinatian sa pagkat-on. Kini nga kurso mitudlo kanako kon unsaon sa pagpalambo og lawom nga hugot nga pagtuo sa Manluluwas, makat-on og maayo nga mga sundanan sa paghunahuna, modumala sa kaugtas ug kabalaka, ug sa kataposan mopadayon sa akong kinabuhi nga adunay paglaom.
Bisan sa mga materyal nga sama niini, ang ubang mga adlaw lisod ug makakapoy. Ang kabalaka ug ang kaguol nga usahay nag-uban niadto nga mga higayon makapawala og kusog. Apan ang pagsunod sa tambag sa propeta mitabang kanako sa pagkaplag sa akong dalan atol niining lisod nga mga panahon.
Si Presidente Russell M. Nelson mipasabot sa importansiya sa “paghunahuna og celestial” kon nag-atubang og lisod nga mga hagit, nagsulti: “Hunahunaa ang tubag sa Ginoo ngadto ni Joseph Smith sa dihang nangayo siya og kahupayan didto sa bilanggoan sa Liberty. Ang Ginoo mitudlo sa Propeta nga ang walay kaluoy nga pagtagad kaniya mohatag kaniya og kasinatian ug alang sa iyang kaayohan [tan-awa sa Doktrina ug Pakigsaad 122:7]. ‘Kon ikaw molahutay pag-ayo,’ ang Ginoo misaad, ‘ang Dios mobayaw kanimo sa kahitas-an’ [Doktrina ug mga Pakigsaad 121:8]. Ang Ginoo nagtudlo ni Joseph sa paghunahuna og celestial ug sa pag-aninaw og usa ka mahangtorong ganti kay sa motutok sa hilabihan nga mga kalisod sa panahon.”
Mao nga, nagsunod sa tambag ni Presidente Nelson, mao kini ang unsay akong gibuhat aron matabangan ang akong kahimsog sa pangisip—ako motutok sa maayo. Gibuhat nako ang akong labing maayo sa pag-atiman sa akong kahimsog sa pangisip pinaagi sa espirituhanon ug temporal nga mga kapanguhaan. Gitan-aw nako ang mas lapad nga panglantaw—ang mahangtoron nga panglantaw. Gihinumdoman nako ug gituman ang akong mga pakigsaad.
Labaw sa tanan, midangop ako sa akong Manluluwas, si Jesukristo, alang sa paglaom ug kalig-on.
Kon nanglimbasog kamo sa usa ka pabalik-balik nga hagit, bisan kon kini naggikan sa milabayng mga desisyon, mga desisyon sa uban, o sa yanong kamatuoran nga kita nagpuyo sa usa ka dili perpekto nga kalibotan, hinumdomi ang mga saad sa kalinaw, pahulay, ug hingpit nga kalipay nga gitanyag sa atong Langitnong Amahan ug ni Jesukristo kanato samtang kita modangop Kanila.
Nagpasalamat ko sa Langitnong Amahan kada adlaw alang sa pagtabang kanako nga mahimong mas lig-on sa akong pabalik-balik nga mga panglimbasog sa kahimsog. Wala gayod ako nagtuo nga magpasalamat ako alang sa usa ka hagit nga sama niini, apan mapasalamaton ko nga kini nga panlimbasog nakatabang kanako nga makaamgo kon unsa kadako ang akong panginahanglan sa Manluluwas sa akong kinabuhi. Nabati nako nga ang akong kasingkasing nahimong mas nahiuyon ngadto sa Iyahang kasingkasing kada adlaw.