Eb’ li hu ut li tzolok
Chʼol 1: Li qaYuwaʼ saʼ choxa

Chʼol 1

Li qaChoxahil Yuwaʼ

Hubble image of the galaxy

Wan jun li Dios

  • Kʼaʼru wan li naxkʼut xyaalal aawe naq wan jun li Dios?

Laj Alma, jun profeet saʼ lix Hu laj Mormon, kixtzʼiibʼa: “chixjunil li kʼaʼaʼq re ru naxkʼut naq wan jun li Dios; relik chi yaal, joʼkan ajwiʼ li ruchichʼochʼ, ut chixjunil li kʼaʼaq re ru wan chiru lix bʼeen, relik chi yaal, ut lix xikik, relik chi yaal, ut joʼkan ajwiʼ chixjunilebʼ li kokʼ tʼortʼookil chahim li nekeʼbʼeek chiru tzʼaqal xbʼehebʼ, nekeʼxkʼut xyaalal naq wan jun aj Yoʼobʼtesinel li nataqlan re chixjunil” (Alma 30:44). Naq nokoʼilok taqeʼq chi qʼeq ut naqil li choxa, naru naqakʼe reetal kʼaʼru yoo chixyeebʼal laj Alma. Wankebʼ numtajenaq xkʼihal li chahim ut li tʼortʼookil chʼochʼ, chixjunilebʼ tzʼaqal saʼ xtusamebʼ. Inkʼaʼ yal keʼnaq aran. Naru naqil lix kʼanjel li Dios saʼ choxa joʼ ajwiʼ saʼ li ruchichʼochʼ. Li kʼiila cheʼ ut li pim kʼaʼjoʼ xchaqʼal ru, li kʼiila paay chi xul, ebʼ li tzuul, li nimaʼ, ebʼ li choql li nekeʼkʼamok chaq li habʼ—chixjunil aʼin naxkʼut xyaalal chiqu naq wan jun li Dios.

Ebʼ li profeet keʼxkʼut chiqu naq li Dios wan choqʼ Nimajwal aj Taqlanel re chixjunil li kʼaʼru wan. Li Dios nawan chaq saʼ choxa (chiʼilmanq Tz. ut S. 20:17). Rikʼin li Jesukristo, aʼan li Ralal, Aʼan kixyoʼobʼtesi li choxa joʼ ajwiʼ li ruchichʼochʼ, ut chixjunil li kʼaʼaq re ru wan chi saʼ (chiʼilmanq 3 Nefi 9:15; Moises 2:1). Kixyiibʼ li po, ebʼ li chahim, ut li saqʼe. Kixkʼuubʼ li ruchichʼochʼ aʼin, ut kixkʼe chi kʼutunk, chi eekʼank, ut chi wank yuʼam chiru. Kixnujobʼresi li choxa ut li haʼ rikʼin li kʼaʼru yoʼyo. Kixkʼe li jar paay chi xul chiruhebʼ li tzuul ut li taqʼa. Kixkʼe chaq qe li kutan ut li qʼojyin, li saqʼehil ut li habʼalqʼe, xkutankil li awk joʼ ajwiʼ li qʼolok. Kixyiibʼ li winq joʼ tzʼaqal xjalam-uuch, re taawanq choqʼ aj taqlanel saʼ xbʼeen li jar paay chik lix yoʼobʼtesihom (chiʼilmanq Genesis 1:26–27).

Li Dios aʼan li qʼaxal taqenaq xwankil ut li numtajenaq xtzʼaqalil re ru, li paabʼanbʼil ut loqʼoninbʼil qabʼaan. Aʼan “li Xnimal ru xyuwaʼil li choxa chʼochʼ,” ut “naʼilok saʼ xbʼeen chixjunil lix junkabʼalebʼ li winq rikʼin rilom jun li yuwaʼbʼej aj rahonel” (Enseñanzas de los Presidentes de la Iglesia: José Smith 2007, perel 41).

Chan ru li Dios

  • Chan ru li Dios?

Rikʼin naq yiibʼanbʼilo joʼ xjalam-uuch li Dios (chiʼilmanq Moises 2:26; 6:9), naqanaw naq li qajunxaqalil chanchan lix xaqalil Aʼan. Lix musiqʼ Aʼan junelik taawanq, wan rochoch saʼ jun xaqalil li tibʼ ut bʼaq okenaq (chiʼilmanq Tz. ut S. 130:22). Aʼbʼanan lix junxaqalil li Dios tzʼaqobʼresinbʼil re ru ut nimanbʼil xloqʼal, chi inkʼaʼ naru xyeebʼal chanru xnimal xloqʼalil.

Li Dios tzʼaqal re ru. Aʼan jun Dios re tiikilal, rikʼin li naʼlebʼ joʼ li rahok, li uxtaan, li yaal, li wankilal, li paabʼaal, li nawom, ut li raqbʼa-aatin. Aʼan wan chixjunil lix wankilal. Chixjunil naxnaw. Nujenaq chi chaabʼilal.

Chixjunil li kʼaʼru chaabʼil rikʼin li Dios nachal chaq. Joʼ kʼihal li naxbʼaanu, aʼan re xtenqʼankilebʼ li ralal xkʼajol re teʼwulaq joʼ chanru Aʼan. Aʼan kixye: “Kʼe reetal, aʼin lin kʼanjel ut lin loqʼal—xkʼeebʼal chi uxmank lix kolbʼal chiru li kamk ut lix yuʼam chi junelik li winq” (Moises 1:39).

  • Kʼaʼut naq aajel ru choqʼ qe xtawbʼal ru chan ru li Dios?

Li ok chixnawbʼal ru li Dios

  • Chan ru naru taqanaw ru li Dios?

Kʼaʼjoʼ naq na-ajman xnawbʼal ru li Dios, joʼkan naq li Kolonel kixye: “Aʼan aʼin li junelik yuʼam: naq teʼxnaw aawu laaʼat li junat chi tzʼaqal Dios ut li xataqla chaq, li Jesus aʼ li Kristo” (Jwan 17:3).

Li xbʼeen ut xnimal ru chaqʼrabʼ aʼan “Taara li Qaawaʼ laa Dios chi anchal laa chʼool” (Mateo 22:37).

Aʼ yaal joʼ nokoʼok chixnawbʼal ru li Dios, noko-ok ajwiʼ chixraabʼal ut chixpaabʼankilebʼ lix taqlahom (chiʼilmanq 1 Jwan 2:3–5). Rikʼin ut xpaabʼankil lix taqlahom, naru nokowulak joʼ chanru Aʼan.

Naru taqanaw ru li Dios wi taqabʼaanu aʼin:

  1. Taqapaabʼ naq Aʼan yoʼyo, ut naq nokoxra (chiʼilmanq Mosiah 4:9).

  2. Taqatzolebʼ li loqʼlaj hu (chiʼilmanq 2 Timoteo 3:14–17).

  3. Tootijoq chiru Aʼan (chiʼilmanq Santiago 1:5).

  4. Taqakʼe qachʼool chixpaabʼankil chixjunilebʼ lix taqlahom (chiʼilmanq Jwan 14:21–23).

Naq naqabʼaanu li kʼaʼaq re ru aʼin, toʼok chixnawbʼal ru li Dios, ut saʼ junaq kutan taqakʼul li qayuʼam chi junelik.

  • Kʼoxla saʼ aachʼool kʼaʼru naru taabʼaanu re tatnachʼoq rikʼin li Dios.

Ebʼ li loqʼlaj hu