Eb’ li hu ut li tzolok
Chʼol 7: Li Santil Musiqʼej

Chʼol 7

Li Santil Musiqʼej

Li Santil Musiqʼej kikʼulun rikʼin laj Adan ut li xEva

  • Kʼaʼut naq aajel ru naq laj Adan ut li xEva teʼtenqʼaaq xbʼaan li Santil Musiqʼej?

Chirix naq laj Adan ut li xEva keʼel chaq saʼ li Awimq Eden, keʼok chixkʼanjelankil li chʼochʼ ut chixbʼaanunkil li jar paay chik chi kʼanjel re xsikʼbʼalebʼ ribʼ. Keʼwan kʼiila ralal xkʼajol, ut ebʼ li ralal xkʼajol keʼsumla ajwiʼ, ut keʼwan xkokʼal (chiʼilmanq Moises 5:1–3). Chi joʼkan, ebʼ li ralal xkʼajol saʼ musiqʼej li qaChoxahil Yuwaʼ keʼok chi elk chaq rikʼin Aʼan ut chi chalk saʼ li ruchichʼochʼ, joʼ chanru yeechiʼinbʼil chaq rehebʼ (chiʼilmanq Abrahan 3:24–25). Naq keʼchal saʼ li ruchichʼochʼ, kiʼisiik saʼ xchʼoolebʼ xnawbʼal chanru naq keʼwan chaq saʼ li rochochebʼ aran saʼ choxa. Aʼbʼanan li qaYuwaʼ inkʼaʼ kixkanabʼ xbʼeresinkilebʼ. Aʼan kixtaqla li Santil Musiqʼej re xkʼojobʼankilebʼ xchʼool, re xtenqʼankilebʼ, ut re xkʼambʼalebʼ xbʼe chixjunilebʼ lix musiqʼejil alal xkʼajol.

Laj Adan ut li xEva keʼxpatzʼ xkʼabʼaʼ lix Choxahil Yuwaʼ rikʼin tijok. Aʼan kiraatinahebʼ, ut kixkʼe li taqlahom rehebʼ, ut keʼxpaabʼ. Kichal jun lix anjel li Qaawaʼ, ut kixkʼut chiru laj Adan ut li xEva li kʼuubʼanbʼil naʼlebʼ re li kolbʼa-ibʼ. Li Qaawaʼ kixtaqla li Santil Musiqʼej re tixye xyaalal li Yuwaʼbʼej ut li Kʼajolbʼej, ut re tixkʼut li evangelio chiru laj Adan ut li xEva. (Chiʼilmanq Moises 5:4–9.)

Rikʼin lix wankil li Santil Musiqʼej, laj Adan “kiʼok chi aatinak joʼ profeet chirix chixjunilebʼ li junkabʼal re li ruchichʼochʼ, ut kixye: “Osobʼtesinbʼilaq taxaq xkʼabʼaʼ li Dios, xbʼaan naq xbʼaan li qʼetok aatin inbʼaan teebʼil xnaqʼ wu, ut saʼ li yuʼam aʼin taawanq xsahil inchʼool, ut saʼ li tzʼejwalej tinwil wiʼchik ru li Dios” (Moises 5:10). Saʼ xkʼabʼaʼ lix kʼutbʼesihom li Santil Musiqʼej re li xEva, aʼan kixye, “Wi ta inkʼaʼ xooqʼetok aatin maajun wa raj kiwan qiyajil, ut maajun wa raj kiqanaw ru li us ut li inkʼaʼ us, ut li sahil chʼoolejil re lix tojbʼal qix, ut li junelik yuʼam li naxkʼe li Dios re chixjunilebʼ li nekeʼabʼin chiru” (Moises 5:11).

  • Kʼaʼut naq aajel ru li bʼeresiik xbʼaan li Santil Musiqʼej choqʼ qe laaʼo, joʼ chanru naq aajel chaq ru choqʼ re laj Adan ut li xEva?

Chan ru li Santil Musiqʼej

  • Kʼaʼru jalan wiʼ li Santil Musiqʼej rikʼin li Yuwaʼbʼej ut li Kʼajolbʼej? Kʼaʼut naq aajel ru aʼin choqʼ qe?

Li Santil Musiqʼej Aʼan jun rehebʼ li oxibʼ saʼ li Roxichal li Dios (chiʼilmanq 1 Jwan 5:7; Tz. ut S. 20:28). Aʼan “musiqʼejil winq” (Tz. ut S. 130:22). Inkʼaʼ puktesinbʼil ribʼ yalaq bʼar; yal saʼ jun chi naʼajej wan, aʼut lix wankilal yalaq bʼar naru natawman.

Li qaChoxahil Yuwaʼ, li Jesukristo, ut li Santil Musiqʼej, aʼanebʼ li Roxichal li Dios nayeeman rehebʼ. Junajebʼ saʼ li rajomebʼ. Li junjunq rehebʼ wan jun xkʼanjel li aajel ru saʼ li kʼuubʼanbʼil naʼlebʼ re li kolbʼa-ibʼ. Li qaChoxahil Yuwaʼ aʼan li qaYuwaʼ ut li qataqlanel. Li Jesukristo aʼan li qaKolonel. Li Santil Musiqʼej aʼan aj kʼutbʼesinel ut aj chʼolobʼanel re chixjunil li yaal.

Li Santil Musiqʼej aʼan aj kʼamol esil re li qaChoxahil Yuwaʼ, ut aʼan ajwiʼ jun maatan kʼeebʼil qe laaʼo (chiʼilmanq li chʼol 21 saʼ li hu aʼin).

Lix kʼanjel li Santil Musiqʼej

  • Kʼaʼru junjunq li yaal li kʼutbʼesinbʼil chiqu xbʼaan Santil Musiqʼej?

Lix kʼanjel li Santil Musiqʼej aʼan xchʼolobʼankil xyaalal li Yuwaʼbʼej ut li Kʼajolbʼej, joʼ ajwiʼ li yaal chirix chixjunil li kʼaʼaq re ru.

Li Santil Musiqʼej tixchʼolobʼ xyaalal chiqu naq li Jesus aʼan li qaKolonel ut aj Tojol qix (chiʼilmanq 3 Nefi 28:11; Tz. ut S. 20:27). Aʼan tixkʼutbʼesi chiqu naq li qaChoxahil Yuwaʼ aʼan xYuwaʼ li qamusiqʼ. Toxtenqʼa chixtawbʼal ru naq taaruuq tataqsimanq li qaloqʼal joʼ chanru li qaChoxahil Yuwaʼ. (Chiʼilmanq Romanos 8:16–17). Ebʼ lix profeet li Qaawaʼ keʼxyeechiʼi, “Rikʼin lix wankil li Santil Musiqʼej naru teenaw li yaal chirix chixjunil li kʼaʼaq re ru” (Moroni 10:5).

Chi maakʼaʼ li Santil Musiqʼej, inkʼaʼ raj taaruuq taqanaw naq li Jesus aʼan tzʼaqal li Kristo. Li Apostol aj Pablo kixtzʼiibʼa, “Maajun…naru tixye: Li Jesus aʼan li Qaawa! wi inkʼaʼ musiqʼanbʼil xbʼaan li Santil Musiqʼej” (1 Korintios 12:3). Li Kolonel ajwiʼ kixye: “Aʼan aʼin li junelik yuʼam: naq teʼxnaw aawu laaʼat li junat chi tzʼaqal Dios ut li xataqla chaq, li Jesus aʼ li Kristo” (Jwan 17:3). Aʼan xbʼaan lix wankil li Santil Musiqʼej naq kʼambʼilo chixtawbʼal ru lix evangelio li Jesukristo, ut chixpaabʼankil saʼ li qayuʼam.

Kʼaʼjoʼ xwankil li Santil Musiqʼej chixkʼeebʼal chiqanaw, toj reetal naq maakʼaʼ chik xkabʼil qachʼool chirix lix yaalal li kʼaʼru naxkʼutbʼesi chiqu. Li Awaʼbʼej Joseph Fielding Smith kixye:

“Naq naxkʼul junaq winq lix kʼutbʼesihom li Santil Musiqʼej, naxkanabʼ jun li kawil eetalil chiru li raam, li inkʼaʼ nasach saʼ junpaat. Aʼan Musiqʼej li yoo chi aatinak rikʼin chik li musiqʼej, ut kaw xmetzʼew chi qʼunbʼesink chʼoolej. Wi ta tixkʼutbʼesi ribʼ junaq anjel, malaj ut li Ralal li Dios ajwiʼ, tixtochʼ raj lix naqʼ qu ut li qakʼaʼuxl, ut timil timil taasachq raj chiqu; aʼbʼanan lix kʼutbʼesihom li Santil Musiqʼej naʼok chi cham chik saʼ li aamej, ut chʼaʼaj wiʼchik xsachbʼal li ru aʼan” (Answers to Gospel Questions, kʼuubʼanbʼil xbʼaan laj Joseph Fielding Smith, alalbʼej, 5 xhuhil, 1957–66, 2:151).

Li Awaʼbʼej Smith kixye ajwiʼ: “Rikʼin li Santil Musiqʼej nakana li yaal chi kembʼil tzʼaqal saʼ lix tibʼel ut li richʼmul li junxaqalil, joʼkan naq inkʼaʼ naru nasachman saʼ chʼoolej” (Doctrina de Salvación, kʼuubʼanbʼil xbʼaan laj Bruce R. McConkie, 3 tasal li hu 1954–56, 1:45).

Joʼ komon saʼ Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan, tento naq taqakawresi qibʼ re naq kʼulubʼejaqo chixkʼulbʼal li chaabʼil aj kʼamol esil ut aj kʼutbʼesinel xyaalal aʼin re li qaChoxahil Yuwaʼ ut li Jesukristo.

  • Kʼoxla joʼqʼe xatxtenqʼa li Santil Musiqʼej re taanimanq lix nawom aachʼool chirix li yaal. Ye resil aʼin rehebʼ li komon saʼ li tzolebʼaal malaj laa junkabʼal wi nakaweekʼa naq us xbʼaanunkil.

Ebʼ li loqʼlaj hu

Isi reetalil