Xtikibʼankil

Jun xtenqʼankil li ani taatzoloq, ut xhuhil laj kʼutunel

Kitzʼiibʼaman li hu Ebʼ li Xbʼeenilebʼ Naʼlebʼ re li Evangelio re xtenqʼankil li ani taatzoloq ut choqʼ xhuhil laj kʼutunel. Naq tattzoloq chi saʼ, rikʼin xsikʼbʼal lix Musiqʼ li Qaawaʼ, taanimanq aanaʼlebʼ ut lix nawom aachʼool chirix li Dios Yuwaʼbʼej, li Jesukristo ut li xtojbʼal rix li maak kixbʼaanu, ut lix kʼojobʼankil wiʼchik li evangelio. Naru taataw xsumenkil li jar patzʼom chirix li yuʼam aʼin, taakʼojobʼaaq aachʼool chirix kʼaʼut naq wankat ut chanru laa loqʼal, ut taanumsi rikʼin paabʼaal li chʼaʼajkilal taanumsi laaʼat ut laa junkabʼal.

Chan ru kʼutuk saʼ li Iglees ut saʼ li junkabʼal

Li kʼanjel re wank choqʼ aj kʼutunel, aʼan jun kʼanjel qʼaxal nim, ut kʼiila paay ru li nokoru wiʼ chixkʼeebʼalebʼ xmetzʼew li qakomon re naq “teʼchʼolaniiq xbʼaan lix chaabʼil aatin li Dios” (Moroni 6:4). Tatkʼutuq chi chaabʼil wi taabʼaanu joʼ chanruhebʼ li naʼlebʼ aʼin:

Taarahebʼ li ani nakatzolebʼ.
Tatkʼutuq rikʼin li Musiqʼej.
Taakʼut li tzolʼlebʼ.
Taabʼoqebʼ re teʼxyal xqʼe chi tzolok.

Taarahebʼ li ani nakatzolebʼ

Naq nakakʼut li rahok choqʼ rehebʼ li ani nakatzol, ebʼ aʼan qʼaxal wiʼchik teʼruuq chixkʼulbʼal lix Musiqʼ li Qaawaʼ. Anchalaq wiʼchik xchʼoolebʼ chirix li tzolok, ut kʼaʼjoʼ wiʼchik naq teʼraj tzolok aawikʼin laaʼat ut rikʼin jalanebʼ chik. Kʼe aachʼool chixnawbʼalebʼ ru li ani tzolbʼil aabʼaan, ut cheʼxnaw ebʼ aʼan naq laaʼat nakakʼoxlahebʼ chi yaal. Kʼe reetal kʼaʼru aajel ru choqʼ rehebʼ li ani wan xchʼaʼajkilal saʼ xyuʼam. Taakʼuubʼ li naʼajej taaʼuxq wiʼ li tzolok re naq tuqtuuq, re naq ebʼ li komon teʼxnaw naq nekeʼru chixpatzʼbʼal xtenqʼankilebʼ aawikʼin rikʼin lix patzʼomebʼ chirix li jar raqal chi naʼlebʼ re li evangelio ut chanru roksinkil saʼ lix yuʼamebʼ.

Lix Musiqʼ li Qaawaʼ taawanq eerikʼin naq wan li rahok ut li junajil. Li Qaawaʼ kixye, “Jun akʼ chaqʼrabʼ ninkʼe eere, naq chera eeribʼ cheribʼil eeribʼ. Joʼ naq xexinra laaʼin, joʼkan ajwiʼ naq chera eeribʼ cheribʼil eeribʼ” (Jwan 13:34).

Re xtawbʼal chik li naʼlebʼ chirix aʼin, chiʼilmanq La enseñanza: El llamamiento más importante, ebʼ li perel 33–43.

Tatkʼutuq rikʼin li Musiqʼej

Li jun chi naʼlebʼ qʼaxal nim li taakʼut, aʼan lix tzolʼlebʼ li Kristo, joʼ chanru kʼutbʼesinbʼil xbʼaanebʼ li loqʼlaj hu ut ebʼ li profeet saʼ li kutan aʼin, ut joʼ kʼojobʼanbʼil xyaalal xbʼaan li Santil Musiqʼej. Re xbʼaanunkil aʼin chi us, tento taakʼul aawikʼin lix Musiqʼ li Qaawaʼ. “Li Musiqʼej taakʼeemanq eere xbʼaan li tijok chi wank eepaabʼaal,” chan li Qaawaʼ, “ut wi moko nekekʼul ta li Musiqʼej inkʼaʼ texkʼutuq” (Tz. ut S. 42:14; chiʼilmanq ajwiʼ Tz. ut S. 50:13–22). Li Santil Musiqʼej aʼan tzʼaqal li ani nakʼutuk, joʼkan naq aajel ru naq kʼuubʼanbʼilaq li tzolebʼaal choqʼ jun naʼajej taaruuq wiʼ taawanq lix Musiqʼ li Qaawaʼ.

Re xtawbʼal chik li naʼlebʼ chirix aʼin, chiʼilmanq La enseñanza: El llamamiento más importante, ebʼ li perel 45–52.

Taakʼut li tzolʼlebʼ

naq majiʼ taakʼut li kʼaʼru wan saʼ li jun chʼol, taatzol chi us re taataw ru li tzolʼlebʼ. Joʼkan ajwiʼ, taawilebʼ li jar raqal saʼebʼ li loqʼlaj hu li tzʼiibʼanbʼil resil saʼ rosoʼjik li jun chʼol. Wi li naʼlebʼ li natawman saʼ li jun chʼol ak wanjenaq saʼ laa yuʼam, nimaq wiʼ chik lix anchalil aachʼool ut li wankilal tatkʼutuq wiʼ. Maamin taaye li yal naʼlebʼanbʼil aabʼaan laaʼat chirix lix tzolʼlebʼ li Iglees. Kaʼajwiʼ taakʼut li kʼaʼru kʼeebʼil xyaalal saʼ ebʼ li loqʼlaj hu, li raatinebʼ li profeet ut apostol re rosoʼjikil kutan, ut xbʼaan li Loqʼlaj Musiqʼej (chiʼilmanq Tz. ut S. 42:12-14; 52:9).

Wi bʼoqbʼilat chixtzolbʼal junaq molam malaj saʼ junaq tzolebʼaal rikʼin li hu aʼin, maawoksi kʼaʼruhaq chik chi hu choqʼ reeqaj aʼin, maakʼaʼ naxye ma chaabʼil li naʼlebʼ wan saʼ li hu aʼan. Mat-el rikʼin xyaalalil li aatin li wan saʼebʼ li loqʼlaj hu ut saʼ li hu aʼin. Aʼ yaal joʼ naʼajman ru, taaye resil li kʼaʼru xakʼul saʼ laa yuʼam, ut li aatin saʼ li perel hu re li Iglees saʼ xkʼutbʼalebʼ li jar chʼol chi naʼlebʼ.

Re xtawbʼal chik li naʼlebʼ chirix aʼin, chiʼilmanq La enseñanza: El llamamiento más importante, ebʼ li perel 56–64.

Taabʼoqebʼ re teʼxyal xqʼe chi tzolok

Naq yookat chixkʼutbʼal li naʼlebʼ, tenqʼahebʼ li komon chirilbʼal chan ru naq li jar raqal chi naʼlebʼ re li evangelio nekeʼkʼanjelak saʼ lix yuʼamebʼ wulaj wulaj. Tenqʼahebʼ chi aatinak chiribʼilebʼ ribʼ chirix chan ru naq li jar raqal chi naʼlebʼ aʼin naxkʼe chiqeekʼa li kʼaʼaq re ru chirix li Dios, chiqix laaʼo, chirixebʼ li qajunkabʼal, ut chirixebʼ li qas qiitzʼin. Tenqʼahebʼ li komon chixbʼaanunkil saʼ lix yuʼamebʼ joʼ chanru li jar raqal chi naʼlebʼ aʼan.

Kʼe aachʼool chixtenqʼankil lix kʼihalebʼ li komon chi tzʼaqonk saʼebʼ li tzolok. Naru taabʼaanu aʼin rikʼin xpatzʼbʼal rehebʼ naq teʼxyaabʼasi li aatin tzʼiibʼanbʼil, naq teʼxsume li patzʼom, malaj naq teʼxye resil li kʼaʼru xeʼxkʼul saʼ xyuʼamebʼ, aʼut kaʼajwiʼ taabʼaanu aʼin naq nakanaw naq inkʼaʼ teʼxutaanaq rikʼin. Naq toj yookat chixkʼuubʼankil li tzolok, naru naq taapatzʼ re junjunq komon naq teʼtenqʼanq naq yoo chi uxmank li tzolok. Kʼe reetal kʼaʼru nekeʼraj ru li komon, ut chan ru xchʼoolebʼ. Wan naq taʼajmanq aatinak aajunes rikʼin junaq komon naq majiʼ naʼok li tzolok, re xpatzʼbʼal kʼaʼru naxkʼoxla chirix li tzʼaqonk.

Re xtawbʼal chik li naʼlebʼ chirix aʼin, chiʼilmanq La enseñanza: El llamamiento más importante, ebʼ li perel 66–81.

Xkomon li naʼlebʼ re xtenqʼankilebʼ laj kʼutunel

Saʼ li junjunq chʼol wan jun malaj wibʼ naʼlebʼ choqʼ re laj kʼutunel. Li naʼlebʼ aʼin naru chatenqʼankil naq yookat chixkʼeebʼal aachʼool chixraabʼalebʼ li tzolbʼilebʼ aabʼaan, chi kʼutuk rikʼin li Musiqʼej, chixkʼutbʼal li tzolʼlebʼ, ut chixbʼoqbʼalebʼ li ani tzolbʼilebʼ aabʼaan re naq teʼxyal xqʼe chi tzolok.