Chʼol 26
Li mayejak
Kʼaʼru xyaalalil li mayejak
Li mayejak naraj naxye xkʼeebʼal re li Qaawaʼ joʼ kʼihal li naxpatzʼ, wi qakutan, malaj li kʼaʼru wan qe saʼ li ruchichʼochʼ, malaj li qametzʼew, re taabʼaanumanq lix kʼanjel. Li Qaawaʼ kixtaqla: “Sikʼomaq xbʼeen wa lix nimajwal awaʼbʼejihom li Dios ut li tiikilal li nachalk rikʼin” (Mateo 6:33). Aʼ yaal joʼ chan ru wan qachʼool chi mayejak, aran nakʼutun chan ru naq naqapaabʼ li Dios. Chalen chalen junelik nekeʼyaleʼ rix ut nekeʼtzʼileʼ rix li tenamit re taanawmanq ma teʼxkʼe li kʼaʼaq re ru re li Dios xbʼeen wa saʼ lix yuʼamebʼ.
-
Kʼaʼut naq aajel ru naq toomayejaq joʼ naxpatzʼ li Qaawaʼ, chi inkʼaʼ taqapatzʼ kʼaʼruhaq choqʼ reeqaj?
Najter kipaabʼaman li chaqʼrabʼ re li mayejak
-
Kʼaʼru xyaalalil li mayejak bʼaanunbʼil xbʼaan lix tenamit li Qaawaʼ re li sumwank najter?
Chalen chaq saʼ xkutankil laj Adan ut li xEva toj reetal naq kixtaw chaq xqʼehil li Jesukristo, lix tenamit li Qaawaʼ keʼxpaabʼ li chaqʼrabʼ re li mayejak. Ebʼ aʼan keʼtaqlaak chixqʼaxtesinkil choqʼ mayej li xbʼeen ralebʼ lix ketomq. Kiʼajman naq ebʼ li xul aʼin teʼwanq chi tzʼaqalebʼ re ru, chi maakʼaʼaqebʼ xtzʼajnil. Kikʼeeman li kʼojobʼanbʼil kʼanjel aʼin re xjultikankil rehebʼ li tenamit naq li Jesukristo, li Xbʼeen Yoʼlajenaq chiru li Yuwaʼbʼej, taachalq saʼ li ruchichʼochʼ. Aʼan tzʼaqalaq re ru saʼ chixjunil, ut tixqʼaxtesi ribʼ joʼ jun mayej choqʼ re li qamaak. (Chiʼilmanq Moises 5:5–8.)
Li Jesus kichal chi yaal, ut kixqʼaxtesi ribʼ choqʼ mayej, tzʼaqal joʼ chanru li kiyeeman chaq rehebʼ li tenamit naq tixbʼaanu. Saʼ xkʼabʼaʼ li mayej kixkʼe, chixjunilebʼ teʼkoleʼq chiru li tzʼejwalejil kamk xbʼaan li wakliik chi yoʼyo, ut chixjunilebʼ nekeʼru chi koleʼk chiruhebʼ lix maak rikʼin xpaabʼankil li Jesukristo (chiʼilmanq li chʼol 12 saʼ li hu aʼin).
Naq kiʼux lix mayej li Kristo re xtojbʼal rix li maak, kikʼeheʼ xraqik li mayejak rikʼin hoyok kikʼ. Ruuchil li kʼutkʼuukil mayej joʼ aʼin, kikʼeeman li kʼojobʼanbʼil kʼanjel re li loqʼlaj waʼak. Li kʼojobʼanbʼil kʼanjel re li loqʼlaj waʼak kikʼeeman choqʼ re xjultikankil qe li xnimal ru mayej li kixkʼe li Kolonel. Aajel ru naq taqakʼul li loqʼlaj waʼak chi kokʼ aj xsaʼ. Li kaxlan waʼ ut li haʼ nekeʼwan choqʼ reetalil lix tibʼel li Kolonel, joʼ ajwiʼ lix kikʼel li kixhoy choqʼ qe (chiʼilmanq li chʼol 23 saʼ li hu aʼin).
-
Kʼaʼut naq nayeeman naq lix tojbʼal rix li maak aʼan li xnimal ru ut rosoʼjikil mayejak?
Toj naʼajman ru naq taqabʼaanu li mayejak
-
Chan ru naqapaabʼ li chaqʼrabʼ re li mayejak saʼ li kutan aʼin?
Us ta ak xraqeʼ li mayejak rikʼin hoyok kikʼ, li Qaawaʼ toj naxpatzʼ naq taqabʼaanu li mayejak. Aʼbʼanan jalan wiʼ li mayej naraj naq taqakʼe anajwan. Aʼan kixye: “Ut moko teeqʼaxtesi ta chik chiwu li hoybʼil kikʼ; relik chi yaal, taakʼeheʼq xraqik … lee kʼatbʼil mayej. … Ut teeqʼaxtesi choqʼ mayej we jun yotʼbʼil chʼoolej ut jun tuulanil musiqʼej” (3 Nefi 9:19–20). Jun “yotʼbʼil chʼoolej ut jun tuulanil musiqʼej” naraj naxye naq naqaqʼaxtesi choqʼ mayej lix yotʼik qachʼool xbʼaan li qamaak, naq naqatuulanobʼresi qibʼ ut naqajal qakʼaʼuxl chirix.
Tento taawanq qachʼool chixmayejankil re li Qaawaʼ chixjunil li kʼaʼru qe
-
Kʼaʼut naq ebʼ li komon wankebʼ xchʼool chi mayejak?
Li Apostol aj Pablo kixye naq tento toowanq choqʼ yoʼyookil mayej, sant ut kʼulubʼajel xbʼaan li Dios (chiʼilmanq Romanos 12:1).
Re toowanq choqʼ yoʼyookil mayej, tento taawanq qachʼool chixmayejankil chixjunil li wan qe choqʼ re Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan—re xwaklesinkil lix awaʼbʼejihom li Dios saʼ li ruchiochʼochʼ ut re kʼanjelak chixkʼeebʼal chi kʼutmank Sion (chiʼilmanq 1 Nefi 13:37).
Jun li saaj aj taqlanel kixpatzʼ re li Kolonel, “Kʼaʼru tinbʼaanu re tinweechani li junelik yuʼam? Li Jesus kixsume: “Laaʼat nakanawebʼ li chaqʼrabʼ: «Matmuxuk sumlaak, matkamsink, mat-elqʼak, matyoobʼank tikʼtiʼ, chawoxloqʼi laa naʼ laa yuwaʼ.» Ut li saaj bʼihom kixye: “Chixjunil aʼin ak inpaabʼahom chalen chaq saʼ insaajilal.” Naq kirabʼi aʼin li Jesus, kixye: “Toj jun chik ma nakabʼaanu: kʼayi joʼ nimal wank aawe, jekʼi rehebʼ li nebʼaʼ, ut taawanq aabʼihomal saʼ choxa; tojaʼ naq tatchalq ut tinaataaqe.” Naq kirabʼi aʼin li saaj winq, kichal xrahil xchʼool. Qʼaxal bʼihom aʼan, ut kʼeekʼo xchʼool rikʼin lix bʼihomal. (Chiʼilmanq Lukas 18:18–23; chiʼilmanq ajwiʼ li jalam-uuch saʼ li jun chʼol aʼin.)
Chaabʼil winq li saaj aj taqlanel aʼin. Aʼbʼanan naq kiyaleʼ rix, moko kiwan ta xchʼool chixmayejankil chixjunil li kʼaʼaq re ru re ruchichʼochʼ li wan re. Aʼut chi junpakʼal chik, ebʼ lix tzolom li Qaawaʼ, laj Pedro ut laj Andres, keʼwan xchʼool chixmayejankil chixjunil choqʼ re lix awaʼbʼejihom li Dios. Naq li Jesus kixye rehebʼ, “Chineetaaqe, … saʼ junpaat keʼxkanabʼ lix yooyebʼ ut keʼxtaaqe li Jesus” (Mateo 4:19–20).
Joʼ chanruhebʼ li tzolom, laaʼo ajwiʼ naru naqaqʼaxtesi li kʼaʼru naqabʼaanu wulaj wulaj choqʼ mayej chiru li Qaawaʼ. Naru naqaye, “Chiʼuxq ta laa wajom.” Laj Abrahan kixbʼaanu aʼin. Aʼan kiwan saʼ ruchichʼochʼ naq toj majiʼaq li Kristo, saʼebʼ li kutan naq tenebʼanbʼil li mayejanbʼil xul ut li kʼatbʼil mayej. Re xyalbʼal rix lix paabʼaal laj Abrahan, li Qaawaʼ kixtaqla chixqʼaxtesinkil laj Isaak li ralal choqʼ jun mayej. Laj Isaak aʼan li alalbʼej junaj chiribʼil chiru laj Abrahan rikʼin li xSara. Qʼaxal ra choqʼ re laj Abrahan xqʼaxtesinkil aʼan choqʼ mayej.
Aʼbʼanan rochbʼeen laj Isaak kixchap lix bʼe toj chi najt saʼ li tzuul Moria, bʼar wiʼ taabʼaanumanq li mayej. Chiru oxibʼ kutan keʼbʼeek. Kʼoxla kʼaʼru lix kʼaʼuxl laj Abrahan, ut chan ru lix yotʼik xchʼool. Tento taaqʼaxtesimanq li ralal choqʼ mayej chiru li Qaawaʼ. Naq keʼwulak saʼ li tzuul Moria, laj Isaak kixkʼam li siʼ ut laj Abrahan kixkʼam li ru xam ut li qʼesnal chʼiichʼ toj saʼ li naʼajej teʼxyiibʼ wiʼ li artal. Laj Isaak kixye: “Waʼ! … wayeʼ li xam ut li siʼ, aʼbʼanan bʼar wank li karneer re li mayej?” Laj Abrahan kixsume: “Matkʼoxlak, at walal. Li Dios taanawoq re li karneer re li mayej.” Tojaʼ naq laj Abrahan kixyiibʼ jun li artal ut kixtusubʼ li siʼ saʼ xbʼeen. Kixbʼakʼ laj Isaak ut kixyokobʼ saʼ xbʼeen li siʼ. Chirix aʼan kixchap li qʼesnal chʼiichʼ re xkamsinkil laj Isaak. Saʼ li hoonal ajwiʼ aʼan jun lix anjel li Qaawaʼ kixram, ut kixye: “Abrahan … maataqsi laa wuqʼ saʼ xbʼeen li chʼina al ut mikʼaʼ aabʼaanu re: anajwan ninnaw naq nakaxuwa ru li Dios, xbʼaan naq inkʼaʼ xaram chiwu laa walal, li junaj chiribʼil.” (Chiʼilmanq Genesis 22:1–14.)
Numtajenaq tanaʼ xsahil xchʼool laj Abrahan naq inkʼaʼ chik kiʼajeʼ naq tixmayeja li ralal. Aʼbʼanan kʼaʼjoʼ naq kixra li Qaawaʼ, joʼkan naq kiwan xchʼool chixbʼaanunkil joʼ kʼihal kixpatzʼ li Qaawaʼ.
-
Kʼaʼru li mayejak aawilom laaʼat chi uxmank saʼ lix yuʼamebʼ laa was aawiitzʼin? Kʼaʼru li mayejak kiʼuxman saʼ lix yuʼamebʼ laa xeʼ aatoon? saʼ lix yuʼamebʼ li keʼwan junxil choqʼ komon saʼ li Iglees? saʼ xyuʼamebʼ li ani yeebʼilebʼ resil saʼebʼ li loqʼlaj hu? Kʼaʼruhebʼ li naʼlebʼ xatzol rikʼinebʼ li esil aʼin?
Li mayejak nokoxtenqʼa chixkawresinkil qibʼ chi wank rikʼin li Dios
Kaʼajwiʼ rikʼin li mayejak naru toowanq chi kʼulubʼej chi wank chiru rilobʼaal li Dios. Kaʼajwiʼ rikʼin li mayejak naru naqayal li junelik yuʼam. Naabʼalebʼ li keʼwan chaq xyuʼam chi junxilaj chiqu laaʼo xeʼxkʼe choqʼ mayej chixjunil li kʼaʼru wankebʼ re. Laaʼo tento taawanq ajwiʼ qachʼool chixbʼaanunkil chi joʼkan wi naqaj xkʼulbʼal xnimal li qaqʼajkamunkil joʼ li xeʼxkʼul aʼan.
Maare inkʼaʼ taapatzʼmanq naq taqamayeja chixjunil li kʼaʼaq re ru. Aʼbʼanan joʼ chanru laj Abrahan, tento naq taawanq qachʼool chixkʼeebʼal chixjunil choqʼ mayej re naq toowanq chi kʼulubʼej chi wank chiru rilobʼaal li Qaawaʼ.
Chalen chaq saʼ xtiklajik lix tenamit li Qaawaʼ xeʼmayejak chi naabʼal, chi kʼiila paay chan ru naq keʼxbʼaanu. Wankebʼ li xeʼxkʼul li chʼaʼajkilal ut xeʼhobʼeʼ saʼ xkʼabʼaʼ li evangelio. Wankebʼ li xeʼisiik chaq saʼ xjunkabʼalebʼ naq xeʼok choqʼ komon saʼ li Iglees. Wankebʼ li xeʼkanabʼaak xbʼaanebʼ li ani xeʼochbʼeenink chaq rehebʼ chalen chalen. Wankebʼ li komon li xeʼsach xtrabʼaaj, ut wankebʼ ajwiʼ li xeʼsach xyuʼamebʼ. Aʼbʼanan li Qaawaʼ naxkʼe reetal li mayej naqakʼe; Aʼan naxye: “Yalaq ani xkanabʼ rochoch, riitzʼin, ranabʼ, xnaʼ xyuwaʼ, ralal xkʼajol malaj ut xchʼochʼ saʼ inkʼabʼaʼ, tixkʼul oʼtaqkʼaal reeqaj saʼ xbʼeen li junjunq ut taareechani li junelik yuʼam” (Mateo 19:29).
Naq naniman lix nawom qachʼool chirix lix yaalal li evangelio, qʼaxal wiʼchik naq nokoru chixbʼaanunkil li mayejak chiru li Qaawaʼ. Naru taakʼe reetal li mayejak saʼebʼ li esil aʼin, li tzʼaqal xeʼkʼulman:
Jun komon saʼ li Iglees saʼ Alemania kixkʼuula lix lajetqil chiru kʼiila chihabʼ toj reetal naq junaq jolominel saʼ li tijonelil taaruuq chi chalk ut chixkʼulbʼal.
Jun li ixq aj ulaʼaninel re li Komonil re Tenqʼank kikʼanjelak chiru 30 chihabʼ ut maajun wa xpaaltoʼ saʼ xbʼaanunkil lix kʼanjel.
Jun chʼuut rehebʼ laj santil paabʼanel saʼ Afrika keʼbʼeek saʼ kamion chi xaqxookebʼ chiru oxibʼ kutan, re teʼrabʼi ut teʼril jun lix profeet li Qaawaʼ.
Saʼ jun li nimla chʼutubʼaj-ibʼ saʼ Mexico, ebʼ li komon re li Iglees xeʼwar chi chʼochʼ ut xeʼxkuy xsaʼ chiru lix kutankil jun li chʼutubʼaj-ibʼ. Xeʼxsach chixjunil lix tuminebʼ re teʼwulaq saʼ li chʼutubʼaj-ibʼ, ut maakʼaʼebʼ chik xtumin re xtojbʼal li tzakemq ut li muhebʼaal.
Jun kabʼal xeʼxkʼayi lix bʼelebʼaal chʼiichʼ re xqʼaxtesinkil lix tuminal re xkabʼlankil jun li santil ochoch.
Jun chik kabʼal xeʼxkʼayi li rochoch re xtawbʼal xtuminebʼ re teʼxik saʼ li santil ochoch.
Wankebʼ naabʼal rehebʼ laj Santil Paabʼanel saʼ Rosoʼjikebʼ li Kutan li inkʼaʼ naabʼal li kʼaʼru rehebʼ, aʼut nekeʼxtoj li lajetqil ut li mayej.
Jun li komon kixkanabʼ lix trabʼaaj xbʼaan naq inkʼaʼ kiraj kʼanjelak saʼ domingo.
Saʼ jun ruqʼ li Iglees, ebʼ li saaj winq ut saaj ixq chi anchalebʼ xchʼool xeʼxmayeja lix kutan re rilbʼalebʼ li kokʼal naq ebʼ lix naʼ xyuwaʼebʼ yookebʼ chixkabʼlankil li chʼutlebʼaal.
Ebʼ li saaj winq ut li saaj ixq nekeʼxkanabʼ malaj ut nekeʼxbʼay usaak saʼ lix trabaajebʼ, saʼ li tzolok, ut saʼ li bʼatzʼunk re teʼkʼanjelaq choqʼ aj kʼamol aatin.
Taaruuq raj taayeemanq resil naabʼal chik li xeʼmayejak choqʼ re li Qaawaʼ. Aʼbʼanan xtawbʼal junaq li qanaʼaj saʼ lix awaʼbʼejihom li qaChoxahil Yuwaʼ, aʼan qʼaxal nim wiʼchik chiru yalaq paay chi mayej taaʼajmanq xkʼeebʼal, us ta li qakutan, li qaseebʼal, li qametzʼew, li qatumin, malaj li qayuʼam. Rikʼin li mayejak naru taqakʼul qanawom rikʼin li Qaawaʼ naq kʼulubʼanbʼilo xbʼaan Aʼan (chiʼilmanq Tz. ut S. 97:8).
-
Kʼaʼut nakakʼoxla laaʼat naq taaʼajmanq naq wanq qachʼool chi mayejak re naq kawresinbʼilaqo chi wank chiru rilobʼaal li Dios?
Ebʼ li loqʼlaj hu
-
Lukas 12:16–34 (bʼar wan wiʼ qabʼihomal, aran wan qachʼool)
-
Lukas 9:57–62 (naʼajman li mayejak re naq qakʼulubʼaq li awaʼbʼejihom)
-
Tz. ut S. 64:23; 97:12 (anajwan jun kutan re mayejak)
-
Tz. ut S. 98:13–15 (ebʼ li nekeʼsach xyuʼamebʼ choqʼ re li Qaawaʼ teʼxtaw wiʼchiik)
-
Alma 24 (ebʼ lix tenamit laj Ammon keʼxmayeja lix yuʼamebʼ xbʼeen wa chiru xqʼetbʼal li xaqabʼanbʼil aatin keʼok wiʼ rikʼin li Qaawaʼ)