Chʼol 5

Li yoʼobʼtesink

Lix kʼuubʼanbʼil naʼlebʼ li Dios choqʼ qe

• Kʼaʼut naq aajel ru choqʼ qe naq koochal saʼ li ruchichʼochʼ?

Naq laaʼo koowan chaq saʼ musiqʼej joʼ ralal xkʼajol li qachoxahil naʼ qayuwaʼ, li qaChoxahil Yuwaʼ kixye qe resil li naʼlebʼ kixkʼuubʼ re naq laaʼo toowulaq joʼ chanchan Aʼan. Laaʼo kiqajap qe rikʼin xsahil qachʼool naq kiqabʼi lix kʼuubʼanbʼil naʼlebʼ (chiʼilmanq Job 38:7). Anchal qachʼool naq kiqaj xtawbʼal li qanaʼlebʼ. Re taaruuq taʼuxq li kʼaʼaq re ru aʼin, kiʼajman naq tooʼelq chaq rikʼin li qaYuwaʼ ut taqakʼul li qajunxaqalil re ruchichʼochʼ. Kiʼajeʼ naq taawanq jun li qanaʼaj bʼar wiʼ taqakawresi qibʼ chi wulak joʼ chanru naq wan Aʼan. Li naʼajej aʼan, li ruchichʼochʼ kiyeeman re.

• Kʼaʼut nakakʼoxla naq kiqajap qe rikʼin sahil chʼoolejil naq kiqabʼi resil li kʼuubʼanbʼil naʼlebʼ re li kolbʼa-ibʼ?

Choqʼ re laj kʼutunel: Wankebʼ li komon moko sa ta teʼreekʼa wi napatzʼman naq teʼxyaabʼasi li aatin saʼ li hu. Junxilaj naq taapatzʼ naq teʼxyaabʼasi, naru taapatzʼ, “Ani taraj xyaabʼasinkil li aatin?” Tojaʼ naq taapatzʼ rehebʼ li komon li xeʼxye naq teʼxbʼaanu.

Li Jesus kixyoʼobʼtesi li ruchichʼochʼ

Li Jesukristo kixyoʼobʼtesi li ruchichʼochʼ ut chixjunil li kʼaʼru wan chi sa. Wankebʼ ajwiʼ chik kʼiila ruchichʼochʼ kixyoʼobʼtesi. Kixbʼaanu aʼin rikʼin lix wankil li tijonelil, chi bʼeresinbʼil xbʼaan li qaChoxahil Yuwaʼ. Li Dios Yuwaʼbʼej kixye, “ebʼ li ruchichʼochʼ chi maakʼaʼ rajlankilebʼ kebʼinyoʼobʼtesi … ut rikʼin li Walal kebʼinyoʼobʼtesi, aʼan li Junaj Yoʼlajenaq chiwu” (Moises 1:33). Wankebʼ chik li keʼchʼolobʼank xyaalal li naʼlebʼ aʼin. Laj Jose Smith ut laj Sidney Rigdon keʼril li Jesukristo saʼ jun li kʼutbʼesink. Ebʼ aʼan keʼxchʼolobʼ xyaalal “naq xbʼaan aʼan, ut rikʼin aʼan, ut saʼ xkʼabʼaʼ aʼan, nekeʼyiibʼaman ut keʼyiibʼaman chaq li ruchichʼochʼ, ut li ani wankebʼ chi saʼ yoʼlajenaqebʼ choqʼ alalbʼej ut rabʼinbʼej chiru li Dios” (Tz. ut S. 76:24).

Li kʼanjel re li yoʼobʼtesink

• Kʼaʼru rajbʼal li yoʼobʼtesink?

Li ruchichoʼchʼ ut joʼ kʼihal li wan chi saʼ keʼyoʼobʼtesiik saʼ musiqʼej naq majiʼ nekeʼyhoʼobʼtesiik saʼ tzʼejwalej (chiʼilmanq Moises 3:5). Naq yoo chixkʼuubʼankil xyoʼobʼtesinkil li ruchichʼochʼ, li Kristo kixye rehebʼ li wankebʼ rikʼin, “Tookubʼeeq, xbʼaan naq wan li naʼajej aran … ut taqayiibʼ jun ruchichʼochʼ saʼ li teʼruuq wiʼ chi wank ebʼ aʼin [aʼanebʼ li ralal xkʼajol saʼ musiqʼej li qaChoxahil Yuwaʼ]” (Abrahan 3:24).

Chi bʼeresinbʼil xbʼaan li Yuwaʼbʼej, li Kristo kixyiibʼ ut kixtuqubʼ li ruchichʼochʼ. Kixjach ru li aakʼabʼ rikʼin li saqen re naq taawanq kutan ut qʼojyin. Kixyiibʼ li saqʼe, li po, ut ebʼ li chahim. Kixjach ru li haʼ rikʼin li chaqʼi chʼochʼ re xyiibʼankilebʼ li palaw, li nimaʼ, ut li kaqʼnabʼ. Kixkʼe xchʼina-usal li chʼochʼ, ut kixkʼe chi uchink. Kixyiibʼ li pachʼayaʼ, lix toonal li cheʼ, li utzʼuʼuj, ut xkomon chik li pim. Ebʼ li cheʼ aʼin keʼwan riyajil re teʼmoq chik xkomon li cheʼ. Tojaʼ naq kixyoʼobʼtesihebʼ li xul—li kar, li ketomq, li kokʼ xul, ut li jar paay chi xikʼanel xul. Ebʼ li xul nekeʼru chi wank ralebʼ aʼ yaal kʼaʼ chi xulil.

Chi joʼkan kawresinbʼil chik li ruchichʼochʼ choqʼ re li jun chi yoʼobʼtesihom qʼaxal nim—aʼan li winq. Ebʼ li qamusiqʼ teʼkʼeheʼq xjunxaqalil li tibʼ ut bʼaq okenaq, re taaruuq toowanq saʼ li ruchichʼochʼ. “Ut laaʼin, li Dios, kinye re li Junaj Yoʼlajenaq chiwu, li kiwan wikʼin chalen chaq saʼ xtiklajik: Chiqayiibʼ li winq joʼ qajalam-uuch, joʼ chanru li qilobʼaal; ut joʼkan kiwan” (Moises 2:26). Joʼkan naq kiyoʼobʼtesiman li xbʼeen winq, aʼan laj Adan, ut li xbʼeen ixq, aʼan li xEva, ut keʼkʼeheʼ xjunxaqalilebʼ joʼ chanru xjunxaqalilebʼ li qanaʼ qayuwaʼ saʼ choxa. “Joʼ xjalam u li Dios naq kixyoʼobʼtesi; teelom ut ixq naq kixyoʼobʼtesihebʼ” (Genesis 1:27). Naq li Qaawaʼ kixchoy lix yoʼobʼtesihom, kisahoʼ saʼ xchʼool ut kixnaw naq chaabʼil lix kʼanjel, ut kihilan chiru jun kʼamok.

Lix yoʼobʼtesihom li Dios naxkʼut chiqu lix rahom

• Chan ru naq lix yoʼobʼtesihom li Dios naxkʼut chiqu naq nokoxra?

Anajwan wanko saʼ li chʼina-usil ruchichʼochʼ aʼin. Kʼoxla li saqʼe li naqʼixnank qe ut nakutanobʼresink qe. Kʼoxla li habʼ, li naxkʼe chi nimank li cheʼ ut naxchʼajbʼilobʼresi li ruchichʼochʼ. Kʼoxla chanru nasahoʼ saʼ aachʼool rikʼin rabʼinkil lix yaabʼ jun li chʼina xul, malaj lix xyaabʼ lix seʼ junaq laa komon. Kʼoxla chanru xchaabʼilal li qatibʼel—naru tookʼanjelaq, taqajsi qu, ut toohilanq. Naq naqakʼoxla chixjunilebʼ lix yoʼobʼtesihom li Jesukristo ut li qaChoxahil Yuwaʼ, nokoʼok chixkʼeebʼal reetal chanru xnimal lix naʼlebʼebʼ, lix wankilalebʼ, ut lix rahomebʼ. Xeʼxkʼut chiqu chanru naq nokoeʼxra rikʼin naq xeʼxkʼe chaq chixjunil li nakʼanjelak qe.

Joʼkan ajwiʼ li cheʼ ut li xul keʼyiibʼaman re xkʼeebʼal xsahil qachʼool. Li Qaawaʼ kixye, “Relik chi yaal, chixjunil li kʼaʼaq re ru nachal chaq saʼ li chʼochʼ, saʼ xhoonalil aʼan, yiibʼanbʼil choqʼ re lix chaabʼilal li winq ut re taaroksi, re xsahobʼresinkil li uhej ut xkʼeebʼal xsahil xchʼool li aamej; relik chi yaal, choqʼ tzakemq ut choqʼ aqʼej, re xyalbʼal xsahil ut re rutzʼbʼal, re xkʼeebʼal xmetzʼew li tzʼejwalej ut re xkʼeebʼal xseebʼal xyuʼam li aamej” (Tz. ut S. 59:18–19). Us ta kʼaʼjoʼ xkʼihalebʼ lix yoʼobʼtesihom li Dios, Aʼan naxnawebʼ ru ut naxrahebʼ chixjunil. Aʼan kixye, “Chixjunil li kʼaʼaq re ru ajlanbʼil chiwu laaʼin, xbʼaan naq wehebʼ ut nekebʼinnaw ru: (Moises 1:35).

• Kʼaʼru junjunq li naʼlebʼ li nasahoʼ wiʼ aachʼool chirix lix kʼiila yoʼobʼtesihom li Dios?

Ebʼ li loqʼlaj hu

• Genesis 1; 2:1–7; Abrahan 3:22–23; 4-5; Moises 1:27–42; 2–3 (resil li yoʼobʼtesink)

• Hebreos 1:1–3; Kolosenses 1:12–17; Tz. ut S. 38:1–3 (li Jesus joʼ aj Yoʼobʼtesinel)

• Tz. ut S. 59:18–20; Moises 2:26–31; Tz. ut S. 104:13–17; Mateo 6:25–26 (li yoʼobʼtesink naxkʼut lix rahom li Dios)