Chʼol 6
Lix tʼanik laj Adan ut li xEva
Laj Adan ut li xEva aʼanebʼ li xbʼeenil li keʼchal saʼ ruchichʼochʼ
-
Kʼaʼru naxkʼut chiqu naq laj Adan ut li xEva aʼanebʼ chaq chaabʼil musiqʼej?
Li Dios kixyiibʼ li ruchichʼochʼ aʼin choqʼ rochochebʼ li ralal xkʼajol. Laj Adan ut li xEva keʼsikʼman ru re naq aʼanaqebʼ li xbʼeenil winq ut ixq li teʼwanq saʼ li ruchichʼochʼ (chiʼilmanq Moises 1:34; 4:26). Li kʼanjel kʼeebʼilebʼ re saʼ lix kʼuubʼanbʼil naʼlebʼ li qaYuwaʼ aʼan naq teʼxtikibʼ saʼ li ruchichʼochʼ li yuʼam aʼin li naraqeʼ rikʼin li kamk. Aʼanaqebʼ li teʼwanq choqʼ xbʼeenil qanaʼ qayuwaʼ. (Chiʼilmanq Tz. ut S. 107:54–56.)
Laj Adan ut li xEva aʼanebʼ xkomonebʼ li ralal xkʼajol li qaYuwaʼ li qʼaxal chaabʼilebʼ xchʼool. Saʼ li ruchichʼochʼ rehebʼ chaq li musiqʼej, laj Adan kiwan choqʼ aj Miguel, li taqenaqil anjel (chiʼilmanq Tz. ut S. 27:11; Judas 1:9). Kisikʼeʼ ru xbʼaan li qaChoxahil Yuwaʼ re taajolominq rehebʼ li tiikebʼ xchʼool naq keʼxpleeti laj Satanas (chiʼilmanq Apokalipsis 12:7–9). Laj Adan ut li xEva keʼkʼojobʼaman chi junxilaj re teʼok choqʼ xbʼeenil qanaʼ qayuwaʼ. Li Qaawaʼ kixyeechiʼi kʼiila osobʼtesink re laj Adan: “Katinkʼojobʼ re tatwanq saʼ li jolomej; xkʼihal li ninqi tenamit teʼelq chaq aawikʼin, ut laaʼat awaʼbʼejat saʼ xbʼeenebʼ chi junelik (Tz. ut S. 107:55).
Li xEva aʼan chaq “lix naʼebʼ chixjunil li yoʼyo” (Moises 4:26). Li Dios kixjunaji laj Adan ut li xEva rikʼin li sumlaak, xbʼaan naq “moko us ta naq taawanq li winq xjunes” (Moises 3:18; chiʼilmanq ajwiʼ 1 Korintios 11:11). Li xEva kixwotz li kʼaʼru tenebʼanbʼil saʼ xbʼeen laj Adan, ut tixwotz ajwiʼ lix qʼajkamunkil saʼ li junelik qʼe kutan.
-
Kʼaʼru naru taqatzol rikʼin rilbʼal li keʼxbʼaanu laj Adan ut li xEva?
Li Awimq Eden
-
Chan ru naq keʼwan laj Adan ut li xEva naq keʼwan saʼ li Awimq Eden?
Naq keʼkʼeheʼ laj Adan ut li xEva saʼ li Awimq Eden, toj majiʼ nachal li kamk saʼ xbʼeenebʼ. Naq wankebʼ chi joʼkan, “maakʼaʼaqebʼ raj xkokʼal” (2 Nefi 2:23). Toj maakʼaʼ chaq li kamk. Ak yoʼyookebʼ saʼ li tzʼejwalej xbʼaan naq lix musiqʼebʼ wan chik xtzʼejwal, pakʼbʼil rikʼin xpoqsil li chʼochʼ (chiʼilmanq Moises 6:59; Abrahan 5:7). Yoʼyookebʼ ajwiʼ saʼ musiqʼej xbʼaan naq wankebʼ chiru rilobʼaal li Dios. Toj majiʼ nekeʼxsikʼ ru li us malaj li inkʼaʼ us.
Li Dios kixtaqlahebʼ naq teʼwanq ralal xkʼajol. Aʼan kixye: “Chexʼuuchinq, ut chexkʼihanq, ut chenujobʼresi li ruchichʼochʼ, ut chiwanq eewankil saʼ xbʼeen … li junjunq li kʼaʼru yoʼyo li naʼeekʼan chiru li chʼochʼ” (Moises 2:28). Li Dios kixye rehebʼ naq taaruuq teʼxkʼux li ru joʼ kʼihal xtoonal li cheʼ wan saʼ li awimq chi moko rambʼil ta, kaʼajwiʼ li ru li cheʼ re xnawbʼal ru li us ut li inkʼaʼ us, inkʼaʼ teʼxkʼux. Chirix li ru li jun toon chi cheʼ aʼan, li Dios kixye, “saʼ li kutan nakakʼux wiʼ, chi yaal tatkamq” (Moises 3:17).
Laj Satanas inkʼaʼ kixnaw lix kʼoxlahom li Dios, aʼut kiraj raj xsachbʼal lix kʼuubʼanbʼil naʼlebʼ, ut chi joʼkan naq kikʼulun rikʼin li xEva saʼ li Awimq Eden. Aʼan kiraale re tixkʼux li ru li jun toon li cheʼ re xnawbʼal ru li us ut li inkʼaʼ us. Kixye re naq aʼan ut laj Adan inkʼaʼ teʼkamq, teʼwanq bʼan “chanchanebʼ li Dios, [teʼxnaw] ru li us ut li inkʼaʼ us” (Moises 4:11). Li xEva kixqʼaxtesi ribʼ chiru li aaleek, ut kixkʼux li ru li cheʼ. Naq laj Adan kixkʼe reetal kʼaʼru xkʼulman, aʼan ajwiʼ kixsikʼ ru xkʼuxbʼal. Li jalanoʼk li keʼxkʼul laj Adan ut li xEva rikʼin xkʼuxbʼal li ru li cheʼ, aʼan li tʼaneʼk nayeeman re.Laj Adan ut li xEva keʼjacheʼ chaq chiru li Dios
-
Kʼaʼru keʼxkʼul laj Adan ut li xEva saʼ tzʼejwalej ut saʼ musiqʼej saʼ xkʼabʼaʼ li qʼetok aatin keʼxbʼaanu?
Rikʼin naq laj Adan ut li xEva keʼxkʼux li ru li cheʼ re xnawbʼal ru li us ut li inkʼaʼ us, li Qaawaʼ kirisihebʼ chaq saʼ li Awimq Eden ut kixkʼehebʼ saʼ li ruchichʼochʼ. Keʼjalanoʼ saʼ li tzʼejwalej saʼ xkʼabʼaʼ naq keʼxkʼux chaq li ru cheʼ li xyeeman naq inkʼaʼ taakʼuxmanq. Joʼ kixye chaq li Dios, kiʼok chi wank li kamk saʼ xbʼeenebʼ. Rochbʼeenebʼ lix kokʼal, teʼok chixkʼulbʼal li yajel, li rahilal, ut li kamk saʼ li tzʼejwalej.
Saʼ xkʼabʼaʼ li qʼetok aatin keʼxbʼaanu, laj Adan ut li xEva keʼxkʼul ajwiʼ li kamk saʼ li musiqʼej. Aʼin naraj naxye naq chi moko ebʼ aʼan chi moko ebʼ li ralal xkʼajol keʼru chi bʼeek ut chi aatinak rikʼin li Dios chi kʼutkʼu aʼan chiruhebʼ. Laj Adan ut li xEva ut ebʼ li ralal xkʼajol keʼkana chi jachjo ru rikʼin li Dios, saʼ tzʼejwalej joʼ ajwiʼ saʼ musiqʼej.
Kichal li nimla osobʼtesiik saʼ xkʼabʼaʼ li qʼetok aatin aʼin
-
Chan ru naq lix tʼanik laj Adan ut li xEva nokoxtenqʼa chi wulak chanchan li qaChoxahil Yuwaʼ?
Wankebʼ li nekeʼkʼoxlank re naq nimla maak keʼxbʼaanu laj Adan ut li xEva naq keʼxkʼux li ru li cheʼ re xnawbʼal ru li us ut li inkʼaʼ us. Aʼbʼanan, rikʼinebʼ li loqʼlaj hu re rosoʼjik li kutan, naqataw ru naq lix tʼanikebʼ kiʼajman ru re taaʼuxmanq li naʼlebʼ kʼuubʼanbʼil choqʼ re li yuʼam aʼin, ut rikʼin aʼan nokoʼosobʼtesiik chiqajunilo. Xbʼaan lix tʼanik laj Adan ut li xEva, nokoʼosobʼtesiik rikʼin li tzʼejwalejil junxaqalil, rikʼin li qawankil chixsikʼbal ru li us ut li inkʼaʼ us, ut rikʼin naq naru chiqu xkʼulbʼal li qayuʼam chi junelik. Maajun rehebʼ li chaabʼilal aʼin taaruuq raj taqakʼul wi ta keʼkana laj Adan ut li xEva saʼ li awimq.
Chirix li tʼaneʼk, li xEva kixye, “Wi ta inkʼaʼ xooqʼetok aatin maajun wa raj kiwan qiyajil, ut maajun wa raj kiqanaw ru li us ut li inkʼaʼ us, ut li sahil chʼoolejil re lix tojbʼal qix, ut li junelik yuʼam li naxkʼe li Dios re chixjunilebʼ li nekeʼabʼin chiru” (Moises 5:11).
Li profeet aj Lehi kixye:
“Ut anajwan, kʼehomaq reetal, wi ta inkʼaʼ kiqʼetok aatin laj Adan, inkʼaʼ raj kitʼaneʼ [kiʼisiik chaq chiru li Dios]; kikana raj bʼan saʼ li awimq Eden. Ut chixjunil li kʼaʼaq re ru yoʼobʼtesinbʼil kikana raj joʼ chanru naq kiyoʼobʼtesiik. …
“Ut maakʼaʼaqebʼ raj xkokʼal; joʼkan naq keʼkana raj chi maakʼaʼ nekeʼxnaw, inkʼaʼ raj keʼwan xsahilebʼ xchʼool, xbʼaan naq inkʼaʼ raj keʼxnaw ru li rahilal; maajun chaabʼilal raj keʼxbʼaanu, xbʼaan naq inkʼaʼ raj keʼxnaw ru li maak.
“Aʼbʼanan kʼehomaq reetal, xbʼaanuman chixjunil li kʼaʼaq re ru saʼ lix chaabʼilal xnaʼlebʼ li nanawok re chixjunil li kʼaʼaq re ru.
“Laj Adan kitʼaneʼ re naq teʼwanq li winq; ut nekeʼwan li winq re naq teʼwanq xsahilebʼ xchʼool” (2 Nefi 2:22–25).
-
Kʼaʼut nakakʼoxla laaʼat naq aajel ru xnawbʼal chirix li tʼaneʼk ut kʼaʼru naxbʼaanu qe?
Ebʼ li loqʼlaj hu
-
1 Nefi 5:11; 2 Nefi 2:20 (laj Adan ut li xEva joʼ xbʼeen qana qayuwaʼ, ut xbʼeen junkabʼal)
-
2 Nefi 2:14–21 (lix kaʼpakʼalil li kʼaʼaq re ru ut li tʼaneʼk; li yuʼam aʼan xyalbʼal qix)
-
2 Nefi 2:22–26 (li tʼaneʼk aʼan jun raqal li kʼuubʼanbʼil naʼlebʼ re li kolbʼa-ibʼ)