Chʼol 4

Li wankilal re tihok

Li xtaql li chʼoolej aʼan jun li naʼlebʼ li junelik nawan

• Wi ta taapatzʼmanq aawe, kʼaʼut naq aajel ru naq wan xtaql li qachʼool, kʼaʼru raj taaye?

“Naru taasikʼ ru aajunes, xbʼaan naq kʼeebʼil aawe” (Moises 3:17).

Li Dios xye qe rikʼin xtzʼuumalebʼ re lix profeet naq kanabʼanbʼilo chixsikʼbʼal ru li us malaj li inkʼaʼ us. Naru naqasikʼ ru li achʼabʼaak ut li junelik yuʼam rikʼin xtaaqenkil li Jesukristo. Kanabʼanbʼilo ajwiʼ chixsikʼbʼal ru li preexil ut li kamk rikʼin xtaaqenkil laj Satanas. (Chiʼilmanq 2 Nefi 2:27). Naru naqasikʼ ru li us malaj li inkʼaʼ us, ut aʼin lix taql li qachʼool nayeeman re.

Saʼ li qayuʼam naq majiʼ nokochal saʼ li ruchichʼochʼ, ak wan chaq xtaql li qachʼool . Jun li ajom koochal wiʼ saʼ li yuʼam saʼ li ruchichʼochʼ, aʼan re taakʼeemanq reetal kʼaʼru taqasikʼ ru xbʼaanunkil (chiʼilmanq 2 Nefi 2:15–16). Wi ta taamineʼq qu chixsikʼbʼal ru li us, inkʼaʼ raj taaruuq taqakʼut kʼaʼru naraj qachʼool xbʼaanunkil yal xjunes. Joʼkan ajwiʼ, nasahoʼ wiʼchik qachʼool rikʼin li qabʼaanuhom naq xqasikʼ kʼaʼru naqaj xbʼaanunkil.

Lix taql li qachʼool aʼan jun xnimal ru naʼlebʼ li kinaʼlebʼaman chaq saʼ li Chʼutam saʼ Choxa naq majiʼ nokochal saʼ li ruchichʼochʼ. Aʼan jun rehebʼ li naʼlebʼ keʼwan wiʼ chi jachbʼil ru li ani keʼtaaqenk re li Kristo rikʼinebʼ li keʼtaaqenk re laj Satanas. Laj Satanas kixye: “Kʼe reetal, wahiʼin, taqlahin laaʼin, ut laaʼin tinwanq choqʼ aawalal, ut tintojebʼ rix chixjunilebʼ li winq, re naq maajun aamej taasachq, ut chi yaal tinbʼaanu, joʼkan ut, kʼe chaq we lix nimal aawu” (Moises 4:1). Rikʼin xyeebʼal aʼin, aʼan “kixpoʼresi xchʼool [chiru li Dios], ut kixsikʼ xsachbʼal lix taql xchʼool li winq” (Moises 4:3). Kitzʼeqtaanaman li kixyeechiʼi, ut aʼan kiʼisiik chaq saʼ choxa, rochbʼeenebʼ li ani keʼtaaqenk chaq re (chiʼilmanq Tz. ut S. 29:36–37).

Lix taql li chʼoolej aʼan jun raqal aajel ru saʼ li kʼuubʼanbʼil naʼlebʼ re li kolbʼa-ibʼ

Rikʼin naq wan xtaql li qachʼool, li qayuʼam saʼ li ruchichʼochʼ nakʼanjelak choqʼ jun xyalbʼal qix. Naq toj yoo chaq chixkʼuubʼankil xyoʼobʼtesinkilebʼ li ralal xkʼajol saʼ li ruchichʼochʼ, li Dios kixye, “Taqayalebʼ rix rikʼin aʼin, re taqil ma teʼxbʼaanu chixjunil li kʼaʼaq re ru li bʼarwan tixtaqlahebʼ wiʼ li Qaawaʼ lix Dios” (Abrahan 3:25). Wi ta inkʼaʼ kikʼeeman qe choqʼ maatan lix taql li qachʼool, inkʼaʼ raj tooruuq chixkʼutbʼal chiru li Dios naq taqabʼaanu chixjunil li nokoxtaqla wiʼ. Rikʼin naq nokoru chi tihok, laaʼo aj eechal re li qabʼaanuhom (chiʼilmanq Helaman 14:30–31).

Wi naqasikʼ ru xtaaqenkil lix kʼuubʼanbʼil naʼlebʼ li Dios choqʼ qe, naniman li qawankil chi tihok. Rikʼin xsikʼbʼal ru li us, qʼaxal wiʼchik naq wan qawankil chixsikʼbʼal wiʼchik ru li us.

Naq naqapaab li junjunq rehebʼ lix taqlahom li qaYuwaʼ, nokoniman saʼ xchaabʼilal li qanaʼlebʼ ut xchaabʼilal li qachʼool. Naniman li qapaabʼaal. Naqakʼe reetal naq inkʼaʼ chik qʼaxal chʼaʼaj choqʼ qe xsikʼbʼal ru li us.

Kooʼok chixsikʼbʼal ru li qabʼe naq koowan choqʼ musiqʼejil alal kʼajolbʼej rikʼin li qaChoxahil Yuwaʼ. Rikʼin li kʼaʼru xqasikʼ ru aran, kookana chi qakʼulubʼ chi chalk saʼ li ruchichʼochʼ. Li qaChoxahil Yuwaʼ naraj naq toonimanq rikʼin paabʼaal, wankilal, nawom, xchaabʼilal li naʼlebʼ, ut chixjunil chik li kʼaʼaq re ru chaabʼil. Wi naqapaabʼ lix taqlahom ut naqasikʼ ru li us, tootzoloq ut taawanq qanawom. Toowulaq joʼ chanru naq wan Aʼan. (Chiʼilmanq Tz. ut S. 93:28.)

• Chan ru naq xsikʼbʼal ru li us nokoxtenqʼa chixsikʼbʼal ru xkomon chik li us?

Re taawanq xtaql li qachʼool, aajel ru naq taawanq kaʼ paay chi bʼe

• Kʼaʼut naq aajel ru naq taawanq xkaʼpakʼalil li bʼe chiqu?

Inkʼaʼ naru taqasikʼ ru li tiikilal wi inkʼaʼ kʼutkʼu chiqu li us joʼ ajwiʼ li inkʼaʼ us. Laj Lehi, jun xnimal ru profeet saʼ lix Hu laj Mormon, kixye re laj Jakob li ralal naq re naq taaʼuxq lix tiik ruhil naʼlebʼ li Dios, tento naq “taawanq chixkaʼpakʼalil chixjunil li kʼaʼaq re ru. Wi ta inkʼaʼ joʼkan, … inkʼaʼ raj taaruuq taakʼeheʼq chi uxmank li tiikilal, chi moko li maaʼusilal, chi moko li santilal chi moko li rahilal, chi moko li us chi moko li inkʼaʼ us” (2 Nefi 2:11).

Li Dios naxkanabʼ laj Satanas chixyalbʼal xqʼe chixrambʼal li kʼaʼru us. Chirix laj Satanas, li Dios kixye:

“Kintaqla naq taakutmanq taqʼa;

Ut aʼan kiʼok choqʼ aj Satanas, relik chi yaal, aʼ laj tza ajwiʼ, lix yuwaʼil chixjunil li tikʼtiʼ, re xbʼalaqʼinkil ut xmutzʼobʼresinkil ruhebʼ li winq, ut xkʼambʼalebʼ xbʼe chi preexil joʼ chanru li rajom xchʼool, joʼ kʼihalebʼ li inkʼaʼ teʼabʼinq chiru lix yaabʼ inkux” (Moises 4:3–4).

Laj Satanas naxbʼaanu chixjunil li naru chiru re xsachbʼal lix kʼanjel li Dios. Aʼan naxsikʼ “lix rahilalebʼ chixjunil li winq. … Aʼan naxsikʼ naq chixjunilebʼ li winq teʼwanq saʼ rahilal joʼ chanru ajwiʼ aʼan” (2 Nefi 2:18, 27). Aʼan inkʼaʼ nokoxra. Maajun chaabʼilal naraj choqʼ qe (chiʼilmanq Moroni 7:17). Inkʼaʼ naraj naq sahaq qachʼool. Naraj qakʼeebʼal choqʼ xmoos aʼan. Kʼiila paay li bʼalaqʼik naroksi re qachapbʼal choqʼ xmoos.

Naq naqataaqe li aaleek naxbʼaanu laj Satanas, naqajebʼ li qawankil re tihok. Naru naqataw ru aʼin rikʼin jun li jaljookil ru aatin. Qayehaq naq wanko chiru jun li nimaʼ, ut wan aran jun li eetalil bʼar wiʼ tzʼiibʼanbʼil: “Xiwxiw, xsut li haʼ. Matnumxik arin.” Maare taqakʼoxla naq rambʼil qu xbʼaan li kʼaʼru tzʼiibʼanbʼil. Aʼbʼanan ma yaal aʼin? Toj wan naabʼal li kʼaʼru naru taqati xbʼaanunkil. Kanabʼanbʼilo chixtawbʼal chik jalan li naʼajej re toonumxik. Kanabʼanbʼilo chi bʼeek, ut chixsikʼbʼal li pur chire li haʼ. Kanabʼanbʼilo chirilbʼal li rokik li saqʼe naq taaʼewuq. Kanabʼanbʼilo chi xik saʼ kabʼl. Naru ajwiʼ toʼok chi numxik saʼ li naʼajej xiwxiw us ta yeebʼil naq inkʼaʼ taabʼaanumanq. Aʼbʼanan naq chapbʼilo xbʼaan xsut li haʼ, inkʼaʼ chik kʼi li taaruuq xbʼaanunkil. Naru taqayal qaqʼe chi elk, malaj naru taqajap qe re xkolbʼal qibʼ, aʼut maare tookamq chi haʼ.

Choqʼ re laj kʼutunel: Jun li jalam-uuch naru naxtenqʼahebʼ chixkʼoxlankil aʼin. Wi nakaye li jaljookil ru aatin chirix li eetalil joʼ yeebʼil saʼ li jun chʼol aʼin, naru taayiibʼ reetalil jun li eetalil aʼin chiru li tzʼak, malaj chiru jun perel li hu.

Us ta achʼabʼanbʼilo chixsikʼbʼal ru li kʼaʼru taqabʼaanu, inkʼaʼ kanabʼanbʼilo chixsikʼbʼal ru kʼaʼru taqakʼul xbʼaan li qabʼaanuhom. Taqakʼul li xtojbʼal rix, li us malaj li inkʼaʼ us, joʼ ruuchihom li kʼaʼru xqasikʼ ru xbʼaanunkil (chiʼilmanq Galatas 6:7; Apokalipsis 22:12).

Li qaChoxahil Yuwaʼ ak ak xye qe chanru taaruuq taqakol qibʼ chiru lix preexil laj Satanas. Junelik tento tooyoʼleeq ut tootijoq, ut taqatzʼaama chiru li Dios naq toxkol chiru li aaleek xbʼaan laj Satanas (chiʼilmanq 3 Nefi 18:15). Li qaChoxahil Yuwaʼ inkʼaʼ toxkanabʼ chi aaleek toj inkʼaʼ ta chik taqakuy (chiʼilmanq 1 Korintios 10:13; Alma 13:28).

Ebʼ lix taqlahom li Dios nekeʼxkʼam li qabʼe re naq taqakol qibʼ chiru li kʼaʼru xiwxiw, ut re taqakʼam li bʼe li naxik saʼ li junelik yuʼam. Rikʼin tihok chi chaabʼil, taqakʼul li taqenaqil loqʼal, yooqo chi chaabʼiloʼq saʼ li junelik qʼe kutan, ut taqayal xtzʼaqalil li sahil chʼoolejil (chiʼilmanq 2 Nefi 2:27–28).

• Kʼaʼru junjunq li bʼaanuhom li nekeʼramok qu chixsikʼbʼal ru li kʼaʼru naqaj? Kʼaʼru junjunq li bʼaanuhom li nokoeʼxkanabʼ chi achʼabʼanbʼil chi tihok?

Ebʼ li loqʼlaj hu

• Moises 7:32 (kanabʼanbʼilo chi sikʼok)

• Abrahan 3:24–25 (li qayuʼam saʼ li ruchichʼochʼ aʼan jun xyalbʼal qix)

• Alma 41:3; Moroni 7:5–6 (taaraqeʼq aatin chirix li qabʼaanuhom)

• 2 Nefi 2:11–16 (aajel ru naq taawanq chixkaʼpakʼalil li kʼaʼaq re ru)

• Moroni 7:12–17 (xsikʼbʼal ru li us ut li inkʼaʼ us)

• 2 Pedro 2:19; Jwan 8:34 (li maak, aʼan moosil)

• 2 Nefi 2:28–29; Alma 40:12–13 (li qʼajkamunk joʼ chanru li bʼaanuhom)