Eb’ li hu ut li tzolok
Chʼol 21: Li maatan re li Santil Musiqʼej

Chʼol 21

Li maatan re li Santil Musiqʼej

A young girl being confirmed. Two men are standing behind her with their hands on her head.

Li Santil Musiqʼej

Saʼ li chʼol 7, xqatzol naq li Santil Musiqʼej aʼan xkomonebʼ li Roxichal li Dios. Aʼan “musiqʼejil winq” (Tz. ut S. 130:22). Maakʼaʼ xjunxaqalil re tibʼ ut bʼaq. Yalaq bʼar naʼeekʼaman lix wankilal. Lix kʼanjel aʼan xkʼutbʼal xyaalal li Yuwaʼbʼej ut li Kʼajolbʼej, joʼ ajwiʼ chixjunil li yaal. Joʼkan ajiwiʼ, li Santil Musiqʼej naxsaqobʼresi qu, malaj nokoxsantobʼresi, re qakawresinkil chi wank rikʼin li Dios. Li Santil Musiqʼej naxsaqobʼresi ru li qachʼool re naq maakʼaʼaq chik li qajom chixbʼaanunkil li inkʼaʼ us.

Jalan wiʼ li Santil Musiqʼej rikʼin li maatan re li Santil Musiqʼej. Saʼ li jun chʼol aʼin, taqatzol kʼaʼru li maatan re li Santil Musiqʼej, ut chan ru naq naru taqakʼul li nimla maatan aʼin rikʼin li Dios.

Li maatan re li Santil Musiqʼej

  • Chan ru naq jalan wiʼ li Santil Musiqʼej rikʼin li maatan re li Santil Musiqʼej?

Li maatan re li Santil Musiqʼej aʼan jun li maatan kʼeebʼil rehebʼ li ani xeʼpaabʼank re li Jesukristo, xeʼkubʼe xhaʼ, ut xeʼkʼojobʼaak choqʼ komon saʼ li Iglees, re naq rajlal teʼxkʼul xtenqʼankil ut musiqʼanbʼilaqebʼ xbʼaan li Santil Musiqʼej.

Laj Jose Smith kixye naq laaʼo naqapaabʼ naq nakʼuleʼ xchaabʼilal li maatan re li Santil Musiqʼej saʼ li kutan aʼin joʼ chanru ajwiʼ naq kikʼuleʼ xchaabʼilal saʼ xkutankilebʼ li najter Apostol. Naqapaabʼ li maatan aʼin rikʼin anchal lix tzʼaqalil, lix wankilal, lix nimal ru, ut lix loqʼalil. (Chiʼilmanq Enseñanzas de los Presidentes de la Iglesia: José Smith 2007, perel 102–103.)

Naru junaq chi kʼameʼk xbʼe chiru jun kʼamok xbʼaan li Santil Musiqʼej chi majiʼ naxkʼul li maatan re li Santil Musiqʼej (chiʼilmanq Tz. ut S. 130:23). Aʼbʼanan lix kʼambʼal xbʼe chi joʼkan inkʼaʼ taakanaaq chi rajlal toj reetal naq taakubʼeeq xhaʼ ut tixkʼul lix kʼeebʼal li uqʼej choqʼ re li maatan re li Santil Musiqʼej. Naqil saʼ Hechos 10 naq laj Kornelio, jun aj pleet aj Romano, kimusiqʼaak xbʼaan li Santil Musiqʼej re tixnaw naq yaal lix evangelio li Jesukristo. Aʼbʼanan laj Kornelio inkʼaʼ kixkʼul li maatan re li Santil Musiqʼej toj reetal naq ak kubʼenaq xhaʼ. Li Profeet aj Jose Smith kixye naq wi ta laj Kornelio inkʼaʼ kixkʼul li kubʼihaʼ ut li maatan re li Santil Musiqʼej, kiʼel raj chaq li Santil Musiqʼej rikʼin (chiʼlmanq Enseñanzas de los Presidentes de la Iglesia: José Smith perel 102).

Anajwan wankebʼ li moko komonebʼ ta saʼ li Iglees li nekeʼxtzol rikʼin lix wankil li Santil Musiqʼej naq tzʼaqal yaal lix Hu laj Mormon (chiʼilmanq Moroni 10:4–5). Aʼut li xbʼeen xkʼutbʼal xyaalal aʼin naʼel chaq rikʼinebʼ wi inkʼaʼ nekeʼxkʼul li maatan re li Santil Musiqʼej. Inkʼaʼ nekeʼxkʼul rajlal li kʼojobʼank chʼoolej li nachal rikʼinebʼ li xeʼkʼuluk re li maatan re li Santil Musiqʼej.

Xkʼulbʼal li maatan re li Santil Musiqʼej

  • Kʼaʼru tento taqabʼaanu re naq tooʼochbʼeeniiq rajlal xbʼaan li Santil Musiqʼej?

Chirix naq nakubʼe li qahaʼ, nokokʼojobʼaak choqʼ komon saʼ li Iglees ut nakʼeeman qe li maatan re li Santil Musiqʼej rikʼin xkʼeebʼal li uqʼej saʼ qabʼeen. Li Qaawaʼ kixye: “Ut yalaq ani wan xpaabʼaal teekʼojobʼ saʼ lin iglees, rikʼin xkʼeebʼal li uqʼej, ut laaʼin tinkʼe li maatan re li Santil Musiqʼej saʼ xbʼeenebʼ” (Tz. ut S. 33:15).

Li junjunq xbʼeenil saʼ li Iglees, naq kʼeebʼil xlisens, naru chixkʼeebʼal li maatan re li Santil Musiqʼej re jalan chik. Aʼbʼanan moko chʼolchʼo ta naq li ani xkʼuluk re tixkʼul xmusiqʼankil ut xbʼeresinkil xbʼaan li Santil Musiqʼej yal rikʼin naq ebʼ li xbʼeenil xeʼxkʼe li ruqʼ saʼ xbʼeen xjolom. Li junjunq tento “tixkʼul li Santil Musiqʼej.” Aʼin naraj naxye naq li Santil Musiqʼej kaʼajwiʼ nachal qikʼin wi tiiko chi paabʼank ut wi naqaj qatenqʼankil rikʼin li choxahil aj taql aʼin.

Re naq kʼulubʼejaqo re taqakʼul qatenqʼankil xbʼaan li Santil Musiqʼej, tento taqasikʼ chi anchal qachʼool xpaabʼankil chixjunilebʼ lix taqlahom li Dios. Tento taqakʼuula chi saq ru li qanaʼlebʼ ut li qabʼaanuhom.

Xkʼeebʼal reetal naq naʼeekʼaman li Santil Musiqʼej

Naabʼal sut li Santil Musiqʼej nokoraatina chi chʼanchʼo. Nayeeman chi kokʼ aj xsaʼ naq lix wankil aʼan chanchan jun li “chʼina xyaabʼ kuxej li qʼun naʼaatinak” (chiʼilmanq 1 Reyes 19:9–12; Helaman 5:30; Tz. ut S. 85:6). Li Awaʼbʼej Boy K. Packer kixye: “Li Santil Musiqʼej naʼaatinak rikʼin jun li xyaabʼ kuxej li mas wiʼchik nakaweekʼa chiru naq nakawabʼi. … Us ta nokoʼaatinak chirix «rabʼinkil» li naqabʼi li hasbʼanbʼil xbʼaan li Musiqʼej, kʼiila sut nekeʼxye li ani xeʼeekʼasiik xbʼaan li Musiqʼej naq «xwan jun li weekʼahom …»” Aʼan kixye ajwiʼ: “Lix yaabʼ xkux li Musiqʼej qʼun naʼaatinak, ut naxkʼe chanaw kʼaʼru taabʼaanu malaj kʼaʼru taaye, malaj naru ajwiʼ tatixtij malaj taaʼaatinaq re aakolbʼal chiru li inkʼaʼ us” (Liahona, enero 1995, perel 69, 70).

Jun rehebʼ li maatan qʼaxal nim li naxkʼe li Dios

  • Kʼaʼru li osobʼtesink naru naqakʼul rikʼin li maatan re li Santil Musiqʼej?

Li maatan re li Santil Musiqʼej aʼan jun rehebʼ li maatan qʼaxal nim naxkʼe li Dios qe laaʼo. Rikʼin li Santil Musiqʼej naru naqanaw naq li Dios yoʼyo, naq li Jesus aʼan tzʼaqal li Kristo, ut naq xkʼojobʼaman wiʼchik lix Iglees saʼ li ruchichʼochʼ. Naru nokoʼeekʼasiik xbʼaan li Santil Musiqʼej re xkʼutbʼal chiqu chixjunil li kʼaʼaq re ru li tento taqabʼaanu (chiʼilmanq 2 Nefi 32:5)). Li Santil Musiqʼej naxsaqobʼresi qu re qakawresinkil chi wank chiru rilobʼaal li Dios. Naru naqakʼul xchaabʼilal li jar maatan naxkʼe li Musiqʼej (chiʼilmanq li chʼol 22 saʼ li hu aʼin). Li nimla maatan aʼin li naxkʼe li qaChoxahil Yuwaʼ naru ajwiʼ chixkʼeebʼal xkʼojobʼankil li qachʼool ut qanawom chirix li kʼaʼaq re ru re li Dios (chiʼilmanq 1 Korintios 2:9–12).

  • Kʼaʼut naq li maatan re li Santil Musiqʼej aʼan jun rehebʼ li maatan qʼaxal nim naxkʼe li Dios qe?

Ebʼ li loqʼlaj hu