Chʼol 9

Ebʼ lix profeet li Dios

Ebʼ li profeet nekeʼxbʼaanu ruuchil li Dios saʼ li ruchichʼochʼ

Kʼaʼruhebʼ lix wankil ut lix maatan jun li profeet?

“Li Qaawaʼ maakʼaʼ tixbʼaanu wi inkʼaʼ xye xbʼeen wa rehebʼ laj kʼanjel chiru, aʼebʼ li profeet” (Amos 3:7).

Wankebʼ naabʼal li nekeʼwan saʼ qʼojyin, chi inkʼaʼ nekeʼxnaw kʼaʼru li rajom li Dios. Ebʼ aʼan nekeʼxkʼoxla naq tzʼaptzʼo ru li choxa, ut naq tento naq qajunes taqanumsi li chʼaʼajkilal saʼ li ruchichʼochʼ. Qʼaxal usilanbʼilebʼ laj Santil Paabʼanel saʼ Rosoʼjikebʼ li Kutan! Laaʼo naqanaw naq li Dios naraatina lix Iglees rikʼiin xtzʼuumal re lix profeet. Rikʼin bʼantioxink saʼ xchʼoolebʼ, ebʼ laj santil paabʼanel saʼ chixjunil li ruchichʼochʼ nekeʼxbʼicha li bʼich, “Bʼantiox xaq aawe naq jun profeet naxkʼam li qabʼe anajwan” (Ebʼ li Bʼich).

Li profeet aʼan jun li winq bʼoqbʼil xbʼaan li Dios re tixbʼaanu ruuchil Aʼan saʼ li ruchichʼochʼ. Naq naʼaatinak jun profeet saʼ xkʼabʼaʼ li Dios, chanchan yoo raj chi aatinak li Dios (chiʼilmanq Tz. ut S. 1:38). Jun profeet aʼan ajwiʼ jun sikʼbʼil ru aj yehol nawom chirix li Kristo, li naxchʼolobʼ xyaalal lix choxahilal ut naxkʼut lix evangelio. Jun profeet naxkʼut li yaal, ut naxkʼut kʼaʼru xyaalal li raatin li Dios. Naxbʼoqebʼ li moko tiikebʼ ta xchʼool re teʼxjal xkʼaʼuxlebʼ. Naxkʼul rikʼin li Qaawaʼ li kʼutbʼesinbʼil naʼlebʼ ut li bʼeresink choqʼ re li qachaabʼilal. Wan naq naril li kʼaʼru taakʼulmanq ut naxye resil li taaʼuxmanq, re naq taawanq li ruchichʼochʼ chi tijbʼil.

Jalan jalanq paay li naru naʼel wiʼ chaq junaq profeet. Naru naq saaj malaj naq cheek, naru naq nim xnawom, ut naru naq moko tzolbʼil ta. Naru naq aj kʼalebʼaal, aj chʼolobʼanel chaqʼrabʼ, malaj aj kʼutunel. Ebʼ li profeet najter keʼxtiqibʼ chaq ribʼ rikʼin li bʼatal aqʼ ut keʼxkʼam li xuqʼ. Ebʼ li profeet anajwan nekeʼxtiqibʼ ribʼ rikʼin wex ut kamiis, ut nekeʼxkʼam li xokebʼaal hu. Chi joʼkan, chanru naru nanawman ru jun li tzʼaqal profeet? Jun li tzʼaqal profeet junelik sikʼbʼil ru xbʼaan li Dios ut bʼoqbʼil rikʼin tzʼaqal lix wankil li tijonelil (chiʼilmanq R. li P. 1:5).

Ebʼ laj Santil Paabʼanel saʼ Rosoʼjikebʼ li Kutan nekeʼxxaqabʼ xwankilebʼ li Xbʼeenil Awaʼbʼejil ut li Kabʼlaju chi Apostol joʼ profeet. Aʼbʼanan, naq nokoʼaatinak chirix li “profeet re li Iglees,” yooko chixyeebʼal li Awaʼbʼej saʼ xbʼeen li Iglees, aʼan li Awaʼbʼej re li taqenaqil tijonelil.

Chalen chaq saʼ xtiklajik li Dios naxbʼoqebʼ li profeet re xkʼambʼalebʼ xbʼe li winq

Chan ru naq ebʼ li profeet keʼxkʼamebʼ xbʼe li ralal xkʼajol li Dios najter?

Chalen chaq saʼ xkutankil laj Adan keʼwan li profeet saʼ li ruchichʼochʼ. Naxkawobʼresi qachʼool naq naqabʼi resil li kʼaʼru keʼxkʼul li xninqal ru winq aʼin. Laj Moises, jun profeet saʼ li Najter Chaqʼrabʼ, kixkʼamebʼ xbʼe kʼiila mil rehebʼ lix tenamit naq keʼel chaq chi moosil saʼ Egipto ut keʼwulak saʼ li yechiʼinbʼil chʼochʼ. Aʼan kitzʼiibʼank re li oobʼ chi hu li wankebʼ saʼ xtiklajik li Najter Chaqʼrabʼ, ut kixtzʼiibʼa resil li Lajeebʼ chi Taqlahom. Laj Nefi, jun profeet saʼ lix Hu laj Mormon, kiʼel chaq Jerusalen waqibʼ cient chihabʼ ma nayoʼla li Kristo. Aʼan xnimal ru aj jolominel ut aj yiibʼanel tenamit, ut kixkanabʼ choqʼ qe naabʼal li xninqal ru aatin saʼ lix Hu laj Mormon. Laj Jwan aj Kubʼsihom Haʼ kisikʼman ru re xkawresinkil li ruchichʼochʼ choqʼ re lix kʼulunik li Qaawaʼ Jesukristo. Rikʼin laj Jose Smith, jun li profeet saʼ rosoʼjikebʼ li kutan, li Qaawaʼ kixkʼojobʼ wiʼchik li Iglees. Laj Jose Smith kixjaltesi ru lix Hu laj Mormon naq toj saaj winq.

Kʼaʼruhebʼ li naʼlebʼ xatzol laaʼat rikʼin rabʼinkil resil lix yuʼamebʼ ut lix kʼutumebʼ li profeet?

Wan jun li yoʼyookil profeet saʼ li ruchichʼochʼ anajwan

Kʼaʼut naq aajel ru choqʼ qe naq wan jun li yoʼyookil profeet anajwan?

Wan jun li profeet li yoʼyo saʼ li ruchichʼochʼ anajwan. Li profeet aʼin, aʼan li Awaʼbʼej re Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan. Aʼan wan xwankil chixkʼulbʼal li kʼutbʼesinbʼil naʼlebʼ choqʼ re chixjunil li Iglees. Aʼan nakʼamok re “lix lawil li awaʼbʼejihom,” aʼan naraj naxye naq kʼeebʼil xwankil chixbʼeresinkil chixjunil li Iglees ut lix awaʼbʼejihom li Dios saʼ li ruchichʼochʼ, ut naxbʼeresi xkʼanjelankilebʼ li kʼojobʼanbʼil kʼanjel re li tijonelil (chiʼilmanq Mateo 16:19). Maajun chik naru chixkʼulbʼal li rajom li Dios choqʼ re chixjunil lix komonil li Iglees, kaʼajwiʼ li profeet sikʼbʼil ru li wan choqʼ Awaʼbʼej. Li Qaawaʼ kixye: “Maajun wa taawanq chik numenaq jun saʼ li ruchichʼochʼ chiru li jun kutan li taakʼojobʼamanq wiʼ lix wankilal ut lix lawil li tijonelil aʼin” (Tz. ut S. 132:7). Li Awaʼbʼej re li Iglees tenqʼanbʼil xbʼaanebʼ lix tenqʼ aj kʼehol naʼlebʼ saʼ li Xbʼeenil Awaʼbʼejil ut ebʼ li komon saʼ lix Chʼutamebʼ li Kabʼlaju, ut chixjunilebʼ aʼanebʼ ajwiʼ profeetebʼ, aj ilol naʼlebʼebʼ, ut aj kʼutbʼesinelebʼ.

Tento taqabʼaanu joʼ kʼihal li teʼxye li profeet naq taqabʼaanu. Li Awaʼbʼej Wilford Woodruff kixye naq jun li profeet maajun wa taakanabʼaaq chixsachbʼal xbʼe li Iglees:

“Li Qaawaʼ maajoʼqʼe tinixkanabʼ laaʼin, chi moko yalaq ani chik chi winq li xaqxo joʼ Awaʼbʼej re li Iglees aʼin chixsachbʼal eebʼe. Moko kʼuubʼanbʼil ta chi joʼkan. Moko wan ta saʼ xkʼaʼuxl li Dios. Wi ta laaʼin tinyal aʼan, li Qaawaʼ tinrisi raj chaq saʼ lin naʼaj” (Enseñanzas de los Presidentes de la Iglesia: Wilford Woodruff 2005, perel 207).

Kʼaʼru junjunq li naʼlebʼ bʼeresinbʼil wiʼ li Iglees anajwan xbʼaan li yoʼyookil profeet?

Aajel ru Naq taqaxaqabʼ xwankil lix profeet li Qaawaʼ

Kʼaʼru naru taqabʼaanu re xtaaqenkil ut xxaqabʼankil xwankil li profeet?

Wankebʼ naabʼal li inkʼaʼ nachʼaʼajkoʼ chiruhebʼ xpaabʼankilebʼ li profeet li xeʼwan chaq junxil. Aʼut qʼaxal us wiʼchik xpaabʼankil ut xtaaqenkil li yoʼyookil profeet. Laaʼo naqataqsi li quqʼ re xxaqabʼankil xwankil li Awaʼbʼej re li paabʼaal joʼ profeet, aj ilol naʼlebʼ, ut aj kʼutbʼesinel.

Chan ru naru taqaxaqabʼ xwankil li profeet? Us naq tootijoq chirix. Aal li iiq li wan saʼ xbʼeen ut naʼajman naq taakawobʼresiik xmetzʼew xbʼaan lix tijebʼ laj Santil Paabʼanel.

Us naq taqatzʼil rix li raatin. Us naq taqabʼi li kʼaʼru naxye saʼebʼ li chʼutubʼaj-ibʼ. Naru ajwiʼ naqakʼul li puktesinbʼil hu joʼ li Ensign malaj Liahona, re taaruuq taqil li raatin saʼebʼ li chʼutubʼaj-ibʼ, malaj jalan chik li aatin naxye.

Aajel ru naq taqataaqe chi tzʼaqal tzʼaqal li musiqʼanbʼil aatin naxye. Inkʼaʼ us naq yal taqapaabʼ jun raqal lix musiqʼanbʼil naʼlebʼ ut taqatzʼeq li bʼarwan inkʼaʼ nawulak chiqu, malaj li chʼaʼaj chiqu. Li Qaawaʼ koxtaqla chixtaaqenkil lix musiqʼanbʼil kʼutum lix profeet.

“Taakʼe aaxik rikʼin chixjunil li raatin ut taqlahom li tixkʼe eere joʼ chanru naxkʼul, rikʼin bʼeek chi anchal li santilal chiwu;

“Xbʼaan naq li raatin aʼan teekʼul, chanchan saʼ tzʼaqal xtzʼuumal we chalenaq chaq, rikʼin anchal li kuyuk ut paabʼaal” (Tz. ut S. 21:4–5).

Li Qaawaʼ maajoʼqʼe tixkanabʼ li Awaʼbʼej re li Iglees chixsachbʼal li qabʼe.

Kʼaʼru xkʼut malaj xchʼolobʼ chi us li Awaʼ bʼej re li Iglees saʼ li kutan aʼin?

Wan ninqi osobʼtesink li nekeʼchal rikʼin abʼink chiru li profeet

Wi nokoʼabʼin chiru, li Qaawaʼ naxye: “Li rokebʼaal xbʼalbʼa inkʼaʼ taanumtaaq saʼ eebʼeen; relik chi yaal, ut li Dios tixjekʼi chaq cheru li wankilal re qʼojyin, ut tixkʼe chi chiqʼmank li choxa choqʼ re lee chaabʼilal, ut lix loqʼal lix kʼabʼaʼ” (Tz. ut S. 21:6). Wi naqabʼaanu joʼ naxye li qaprofeet, nahoyman chaq li osobʼtesink saʼ choxa.

Re taakanaaq chi xaqxo, tento naq li tzʼaqal yaal Iglees taawanq chi kabʼlanbʼil “saʼ xbʼeen rubʼelahomebʼ li apostol ut ebʼ li profeet, ut li Jesukristo aʼan lix nimal ru pek saʼ li kabʼl” (Efesios 2:20). Saʼ li ruchichʼochʼ aʼin li nanumta wiʼ li chʼaʼajkilal, wan qikʼin jun li profeet li naru wiʼ li Dios chixkʼuʼtbʼesinkil li rajom.

Kʼaʼru xakʼul laaʼat naq xapaabʼ li naʼlebʼ kʼeebʼil xbʼaan li profeet?

Ebʼ li loqʼlaj hu

Numeros 12:6 (li Dios naʼaatinak rikʼin xtzʼumalebʼ re li profeet)
1 Samuel 9:9 (li profeet, aj ilol naʼlebʼ yeebʼil re)
Amos 3:7 (li Dios naxkʼutbʼesi lix muqmuukil naʼlebʼ chiruhebʼ li profeet)
Mosiah 8:16–18 (jun aj ilol naʼlebʼ naru chixnawbʼal chirix li kʼaʼaq re ru wanjenaq ut li toj taawanq)
Lukas 1:70 (li Dios naʼaatinak rikʼin xtzʼumalebʼ re li profeet)
Tz. ut S. 45:10, 15 (li Dios naʼaatinak anajwan joʼ saʼ najter kutan)
1 Nefi 22:2 (rikʼin li Musiqʼej nakʼeheʼ chi nawmank li kʼaʼaq re ru chiruhebʼ li profeet)
Tz. ut S. 68:3–5 (Naq ebʼ lix moos li Qaawaʼ nekeʼaatinak chi eekʼasinbʼil xbʼaan li Santil Musiqʼej, aʼan lix kʼoxlahom, li rajom ut lix yaabʼ xkux li Qaawaʼ)
Tz. ut S. 107:65–67, 91–92 (lix tenebʼankil li Awaʼbʼej re li Iglees)
Tz. ut S. 43:1–7 (kaʼajwiʼ li profeet kʼeebʼil xwankil chixkʼulbʼal li kʼutbʼesinbʼil naʼlebʼ choqʼ re li Iglees)