“Si Abraham kag si Sara,” Mga Sugilanon sa Daan nga Katipan (2021)
“Si Abraham kag si Sara,” Mga Sugilanon sa Daan nga Katipan
Genesis 11–15; 17; Abraham 1–2
Si Abraham kag si Sara
Isa ka promisa nga bugayan ang pamilya sang katawhan
Si Abraham nagaistar sa banwa sang Ur. Gusto sang malain nga mga pari didto nga ihalad sia sa ila mga dios-dios. Nagpangamuyo si Abraham, kag ginluwas sia sang Ginuo.
Dayon ginsugo sang Ginuo si Abraham kag ang iya asawa nga si Sara nga maghalin sa Ur kag magkadto sa malayo nga lugar. Nagpromisa Sia sa ila nga pakamaayohon sila sa ila pagpanglakaton.
Nagsalig si Abraham kag Sara sa Ginuo kag nagbiya sa Ur. Pero nasuboan sila tungod indi sila makabata. Ginpaumpawan sila sang Ginuo. Ginpromisahan Niya sila nga makabata gid sila.
Genesis 11:30–31; 15:1–6; 17:2–16; Abraham 2:6–9
Nagpangamuyo si Abraham sa Ginuo para makilala pa gid Sia. Ginduaw sang Ginuo si Abraham kag gintawag ang Iya Kaugalingon nga si Jehova. Si Jehova naghimo sang kasugtanan kay Abraham. Nagpromisa Sia nga makaangkon si Abraham sang priesthood. Nagpromisa man Sia nga paagi sa pamilya ni Abraham, ang tanan nga pamilya sa duta pakamaayohon.
Samtang nagapanglakaton sila ni Abraham kag Sara, kinahanglan nila nga mangita sang pagkaon. Gintilawan nila nga mag-istar sa lugar nga ginatawag nga Canaan. Wala sang pagkaon didto, gani kinahanglan nila nga magkadto sa Egipto. Pero delikado ang mag-istar sa Egipto para sa ila.
Genesis 12:10–20; Abraham 2:21–25
Naghalin si Abraham kag Sara sa Egipto kag nagbalik para mag-istar sa Canaan. Nagdala sila sang pagkaon kag mga kasapatan halin sa Egipto. Ang Canaan bahin sang duta nga ginpromisa sang Ginuo sa ila.
Genesis 13:1–4, 12; Abraham 2:19
Gintuman man sang Ginuo ang Iya promisa nga mabaton ni Abraham ang priesthood. Isa ka adlaw nakilala nanday Abraham kag Sara ang isa ka matarong nga hari nga ginatawag Melquisedec. Nagbayad si Abraham sang ika-pulo sa iya.
Nabaton ni Abraham ang priesthood halin kay Melquisedec. Amo man ini ang priesthood nga nabaton sang mga propeta nga sanday Adan kag Noe.
Joseph Smith Translation, Genesis 14:36–40; Abraham 1:2–4; Doktrina kag mga Kasugtanan 84:14
Malipayon si Abraham kag si Sara sa Canaan, pero nabalaka sila gihapon kay wala pa sila sing bata. Kinahanglan nila nga magsalig sa promisa sang Ginuo nga pila ka adlaw magadako ang ila panimalay kag magapakamaayo sa bilog nga kalibutan.