“Si Josue nga Propeta,” Mga Sugilanon sa Daan nga Katipan (2022)
“Si Josue nga Propeta,” Mga Sugilanon sa Daan nga Katipan
Deuteronomio 10; 31; 34; Josue 1; 3–6; 10–11; 21; 24
Si Josue nga Propeta
Katapusan nga pagtilaw antes magsulod sa duta nga ginpanaad
Gintawag sang Ginuo si Josue agud mangin bag-o nga propeta matapos nga ginkuha ang propeta nga si Moises pa-langit. Samtang nagakampo ang mga Israelnon malapit sa Suba sang Jordan, nagsiling ang Ginuo nga oras na nila nga magsaylo sa duta nga ginpanaad.
Deuteronomio 34:1–9; Josue 1:1–4; Alma 45:19
Ang duta nga ginpanaad ara sa Canaan, pero malain nga mga tawo ang nagapuyo didto. Ginsilingan sang Ginuo si Josue nga mangin mabakod kag mangin maisog. Upod ang bulig sang Ginuo, sarang sang mga Israelnon nga sakupon ang kadutaan sang Canaan.
Nagtipon si Josue sang kasoldaduhan. Ginhambalan sila sang Ginuo nga dalhon ang tapi-tapi nga mga bato sang Napulo ka Sugo kag iban pa nga balaan nga mga kasulatan. Ginkarga sang mga pari ining sagrado nga mga butang sa kahon nga ginatawag ang kaban sang kasugtanan. Dayon naghanda ang mga soldado nga magtabok sa Suba sang Jordan. Madalom ang suba kag masulog.
Deuteronomio 10:5; 31:25–26; Josue 1:10–11; 3:1–11
Ginpromisa ni Josue sa mga Israelnon nga buligan sila sang Ginuo nga makatabok sa suba.
Ginpangabay ni Josue ang 12 ka mga pari nga dalhon ang kaban sang kasugtanan kag mag-ubog sa tubig. Sang mismo pagtapak sang mga pari sa suba, nagtunga ang tubig.
Gintabok sang mga Israelnon ang suba nga mamala ang duta. Ginpangabay ni Josue ang mga Israelnon nga magdala sang 12 ka bato halin sa nagmala nga suba. Gintangkas-tangkas niya ang mga bato para padumdumon ang mga Israelnon sang milagro sang Ginuo sina nga adlaw.
Ginpangunahan ni Josue ang kasoldaduhan sang Israel padulong sa kadutaan sang Canaan. Nag-abot sila sa siyudad nga ginatawag Jerico. Mabaskog kaayo ang siyudad kag may matag-as nga mga pader. Ginsugiran sang Ginuo si Josue kon paano dag-on ang Jerico. Siling niya nga dapat magmartsa ang mga Israelnon palibot sa Jerico kada adlaw sa anum ka adlaw. Gintuman ni Josue ang Ginuo.
Ginhambalan ni Josue ang mga pari nga dalhon ang kaban sang kasugtanan sa atubang sang mga Israelnon. Kada adlaw, nagmartsa ang mga soldado palibot sa Jerico, kag pito ka mga pari ang nagapatunog sang ila mga budyong. Ang tanan nga iban pa nga mga Israelnon naghipos lang.
Sa ikapito nga adlaw, nagmartsa ang mga soldado palibot sa Jerico sing pito ka beses. Samtang ginapatunog sang mga pari ang ila mga budyong, ginhambalan ni Josue ang mga Israelnon nga magsinggit. Gulpi lang nagkalarusdak ang mga pader sang Jerico, kag ginsulod sang kasoldaduhan ni Josue ang siyudad.
Ginbuligan sang Ginuo ang mga Israelnon, pareho sang Iya ginpromisa. Ang kasoldaduhan ni Josue padayon nga nagsakop sang kadutaan sang Canaan, kag nagsugod ang mga Israelnon nga magpuyo didto. Ginpadumdom sila ni Josue sang mga milagro kag promisa sang Ginuo. Ginpangabay niya ang mga Israelnon nga magpili nga mag-alagad sa Ginuo.